1 ጬቀተꬃስ ጎእ ባይናይሳ ኤራይስ። ሽን ጬቀታናዉ ኮሽኮ፥ ጎዳፐ ኤክዳ ቆንጨꬃን ጬቃና። 2 ታማነ ኦይዱ ላይꬃፈ ካሰ፥ ክርስቶሳ አማንያ እስ ኡራይ ሄꬓንꬆ ሳሉዋ ብዳይሳ ታ ኤራይስ። ሄ ኡራይ አሾን ዎይኮ አሾፐ ካረራ ብዳኮ ታ ኤርከ፤ ፆሳይ ኤሬስ። 3 ሄ ኡራይ ሄꬓንꬆ ሳሉዋ ኤከትዳይሳ ኤራይስ። ሽን እ አሾን ዎይኮ አሾፐ ካረራ ኤከትዳኮ ታ ኤርከ፤ ፆሳይ ኤሬስ። 4 ሄ ኡራይ ጋናተ ኤከትድ አስ ቆንጭሳናዉነ አስ ኦዳናዉ ዳንዳኦናባ ስእስ። 5 ታኒ ሄ አድያባን ጬቀታና፥ ሽን ታኒ ታ ዳቡራፐ አትሽን፥ ታናን ጬቀትያባይ ባዋ። 6 ታኒ ቱማ ኦደትያ ግሾ፥ ጬቀታናዉ ኮይኮካ ኤያ ግድከ። ሽን አስ ታ ኦይሳ በኤይሳፈነ ስኤይሳፈ አꬅድ ቆፖና መላ ጋዳ ጬቀተꬅ አጋይስ።

7 ታዉ ቆንጭዳ ግታ ቆንጨꬃን ታ ኦቶርቶና መላ ታና ዋይሳናዉ ታ አሹዋን ጫድያ ፃላህያ ኪታንቾይ ታዉ እመትስ። 8 ሀ ዋይስያባ ታፐ ድጋና መላ ታኒ ጎዳ ሄꬑ ቶሆ ዎሳስ። 9 ሽን ጎዳይ፥ “ታ ዎልቃይ ነ ዳቡራን ቆንጭያ ግሾ ታ አꬎ ኬሀተꬃይ ነዉ ግዳና” ያግስ። ክርስቶሳ ዎልቃይ ታናን ቆንጫና መላ ታ ዳቡራን ኡፋይታሸ ጬቀታይስ። 10 ታኒ ክርስቶሳ ግሾ፥ ዳቡርያ ዎደ ጫየትያ ዎደ ዋየትያ ዎደ ጎደትያ ዎደ መቶትያ ዎደ ታ ዳቡራን ኡፋይታይስ። አይስ ጊኮ፥ ታ ዳቡርያ ዎደ፥ ሄ ዎደ ምናይስ።

11 ታኒ ኤያ አሳዳ ጬቀታስ። ሄሳዳ ታ ጬቀታና መላ ኦꬅዳይ ህንተና። ታ፥ ታ ሁጰን ኤረቶና አስ ግድኮካ፥ “ግታ ሀዋረታ” ጌተተይሳታፐ ጉፅከ። ሄሳ ታዉ ማርካታናዉ በሰይ ህንተናሽን። 12 ታ ህንተ ግዶን ደአሸ ዳንዳአን ኦꬅዳ ማላታትነ ማላት ታ ቱማ ሀዋረ ግደይሳ በሶሶና። 13 ታ ህንተዉ ቶሆ ግዶናይሳፈ አትሽን፥ ሀራ ዎሳ ኬꬃታፐ ህንተ አይብን ጉፅደቲ? ሄስ ባላ ግድኮ ታና ማርተ።

14 ታኒ ህንተኮ ባናዉ ጊገትሽን ሀይስ ታዉ ሄꬓንꬆ። ታ ህንተናፐ አትሽን፥ ህንተዉ ደእያባ ኮዮና ግሾ ህንተና ዋይሳናዉ ኮይከ። የልዳይሳት ባንታ ናይታስ ሻሎ ምንጆሶናፐ አትሽን፥ ናይት ባንታና የልዳይሳታስ ሻሎ ምንጆኮና። 15 ታ ህንተ ግሾ፥ ታዉ ደእያባነ ታና አꬃ እምንካ ታና ኡፋይሴስ። ያትን፥ ታኒ ህንተና ሄሳዳ ኬሀ ሲቅያ ዎደ ህንተ ታና ጉꬃራ ሲቀቲ?

16 ግድኮካ፥ ታ ህንተዉ ቶሆ ግድከ፤ ዋይሳብከ፤ ሽን ህንተና ጭሞንነ ገነን ኦይክዳባ ህንተዉ ዳኖና አገና። 17 ሀር አቶሽን፥ ታ ህንተኮ ኪትዳ አሳታፐ ህንተና ጭምዳ አስ ደኢ? 18 ትቶይ ህንተኮ ባና መላ ታኒ ዎሳስ፤ ቃስ አማንያ እሻካ እያራ የዳስ። ያትን፥ ትቶይ ህንተና ጭምዴ? ኑኒ ኑ ኦሱዋ እስ አያናን ኦꬅቦኮ? ቃስ ኑ ሀኖይካ እስኖ ግደኔ?

19 ኑ ኡባ ዎደ ህንተ ስንꬃን ኑና ፅልሳናዉ ሞተትያባ ህንተዉ ዳኒ? ኑ ክርስቶሳን ደእድ ፆሳ ስንꬃን ሀእ ጋካናዉ ኦዶስ። ኑ ሲቆ እሻቶ፥ ኑ ሀ ኡባ ኦይ ህንተና ድቻናሳ። 20 ታ ህንተኮ ብያ ዎደ ኦን ኤር ህንተ ታ ኮየይሳዳ ሀኖና፥ ቃስ ታካ ህንተ ኮየይሳዳ ሀኖና ጋሄቶና አጎኮ ጋዳ ያያይስ። ቃስ ኦን ኤር ህንተ ግዶን ፓላም፥ ቃናተይ፥ ሀንቆይ፥ ዪቀይ፥ ዝግርስ፥ አሳ ሱንꬁ ኢሶይ፥ ኦቶሮይነ ካች ዶና አገና ጋዳ ያያይስ። 21 ታኒ ናምአንꬆ ህንተኮ ብያ ዎደ ፆሳይ ህንተ ስንꬃን ታና ካዉሻና ጋዳ ያያይስ። ካሰ ናጋራ ኦꬅድ ሄ ባንታ ኦꬅዳ ቱናተꬃፈ፥ ላይማተꬃፈነ ዬላይያ ኦሱዋፐ ስምቦና አሳታ በአዳ አዛኖና አግከ ጋዳ ያያይስ።