1 ታ ህንተኮ ብሽን ሀይስ ሄꬓንꬆ። አይ ሞቶይካ ናምኡ ዎይኮ ሄꬑ ማርካን ምኔስ። ዛረ 17:6፤ 19:15. 2 ታኒ ናምአንꬆ ህንተራ ጋሄትዳ ዎደ ህንተ ግዶን ካሰ ናጋራ ኦꬅዳ ኡራነ ሀራታ ኡባ ሴሮና አግከ ጋዳ ኦዳ ዎꬃስ። ሀእ ታ ሃካዳ ደእኮካ ስማዳ ህንተኮ ብያ ዎደ ኦደስካ ቃትከ።

3 ታናን ደእድ ኦደይ ክርስቶሳ ግደይሳ ህንተ ኤራናዉ ኮዬታ። እ ህንተራ ሃሳያ ዎደ ዎልቃማፐ አትሽን፥ ህንተ ግዶን ዳቡራንቾ ግደና። 4 ክርስቶስ ማስቃለ ቦላ ዳቡራን ካቀትስ፥ ሽን ፆሳ ዎልቃን ደኦን ደኤስ። እ ዳቡራንቾ ግድዳይሳዳ፥ ኑካ ዳቡራንቾ። ሽን ህንተና ሀጋዛናዉ ፆሳ ዎልቃን እያራ ደኦን ዳና።

5 አማኖን ምንድ ደእያኮ ህንተና ህንተዉ ፓጭድ በእተ። ፓጨን ህንተ ኩንዶና አትኮ፥ ክርስቶስ ህንተናን ደኤይሳ ህንተ ኤሬታ። ሽን ክርስቶስ ህንተናን ዶና እፅኮ ህንተ ኩንዴታ። 6 ኑኒ ፓጨን ኩንዶናይሳ ህንተ ኤሬታ ጋዳ አማናይስ።

7 ህንተ ኢታባ ኦꬆና መላ ኑኒ ፆሳ ዎሶስ። ኑኒ ምኖ ግደይሳ አሳይ በአና መላ ግዶናሽን፥ ኑኒ ምኖ ግዶና እፅኮካ፥ ህንተ ሎኦ ኦꬃና መላ ኑኒ ዎሶስ። 8 ኑኒ ቱማስ ኦꬆስፐ አትሽን፥ ቱማራ ኤቀትያባ አይባካ ኦꬆኮ። 9 ኑ ዳቡርያ ዎደ ህንተ ቃስ ምንያ ዎደ ኑና ኡፋይሴስ። ህንተ ቦረይ ባይናይሳታ ግዳና መላ ኑ ህንተዉ ፆሳ ዎሶስ።

10 ታኒ ህንተፈ ሃካዳ ደአሸ ፃፍዳይ ሄሳ ግሾሳ። ታኒ ህንተኮ ብያ ዎደ ጎዳይ ታዉ እምዳ ማታን ዘምፓዳ ህንተ ቦላ ጎዳታናዉ ኮይከ። ጎዳይ ታዉ ማታ እምዳይ፥ ህንተና ማዳናሳፈ አትሽን፥ ቆሀናሳ ግደና።

11 ዉርሰꬃን ታ እሻቶ፥ ሳሮ ደእተ። ቦረይ ባይና ደእተ፤ ታ ዞርያ ስእተ። እስ ዎዛናን ግድድ ደእተ፤ ሳሮተꬃን ደእተ። ሲቆነ ሳሮ እምያ ፆሳይ ህንተራ ግዶ።

12 ጌሻ ዬረተꬅ ዬረትሸ፥ እሶይ እሱዋ ሳሮꬅተ። 13 ፆሳ አሳ ኡባይ ህንተና ሳሮ ሳሮ ያጎሶና።

14 ጎዳ የሱስ ክርስቶሳ አꬎ ኬሀተꬃይ፥ ፆሳ ሲቆይ፥ ጌሻ አያና እስፈተꬃይ ህንተ ኡባራ ግዶ።