ጳዉሎስ ጋላትያ አሳስ
ፃፍዳ ኪታ
ጋꬃ ቆፋ
ጋላትያን ደእያ ዎሳ ኬꬃስ ፃፈትዳ ኪታን፥ ጳዉሎስ ቱማ ሀዋረ ግደይሳነ እያ ኪታይካ ቱማ ግደይሳ፥ ባ ኪታ ናባብያ አሳይ አኬካና መላ ቆፍሴስ (1:1-10)። እ ሄሳ ግዳይ፥ እስ እስ አሳይ “ጳዉሎስ ዎርዶ ሀዋረ ቃስ እያ ኪታይካ ዎርዶ” ግድ ኦደትያ ግሾሳ። ጳዉሎስ፥ አይሁደ ግዶና አሳስ ዎንገላ ሳባካና መላ ፄገትዳ ቱማ ሀዋረ (1:18—2:10)።
ኦንካ የሱሳ አማንዳ ዎደ ኦራꬃ ደኦ ደምስ፤ ሄሳ ግሾ፥ ሙሰ ህገ ናጋናዉ ኮሸና። ጳዉሎስ፥ “አስ ፆሳ ስንꬃን ፅላናዉ ዳንዳኤይ አማኖ ፃላላን” ያግድ ታማርስስ። ሽን ጉꬃ ኢሰን፥ ጋላትያ ቢታን ደእያ ዎሳ ኬꬃን፥ “አስ ፆሳ ስንꬃን ፅላናዉ የሱሳ አማኖ ፃላላ ግዶናሽን፥ ሙሰ ህገካ ናጋናዉ ኮሼስ” ያግድ ጳዉሎሳ ትምርትያ ጳልቅያ አሳት ደንድዶሶና።
ጳዉሎስ ጋላትያ ኪታ ፃፍዳይ፥ ሀ ዎርዶ ትምርትያን ጭመትዳ አሳ ቱማ አማኖኮነ አማኖ ደኦኮ ዛራናሳ። ጳዉሎስ የሱሳ ሀዋረ ግደይሳ ትላይድ ኦድስ። እያ ሀዋረ ኦꬅድ ፄግዳይ አሰ ግዶናሽን፥ ፆሰ ግደይሳነ እ ኪተትዳይ አይሁደ ግዶና አሳስ ግደይሳ ቆንጭስድ ኦድስ።
መርና ደኦ ኤካናዉ ቁልፐይ አማኖ ፃላላ። ሄሳስ ሌምሶ ግደይ፥ አብራሃመይ ፅልዳይ አማኖናፐ አትሽን፥ ኦሶን ዎይኮ ህገ ናጎን ግዶናይሳ ኤንታዉ ማርካ ኦꬅድ እሜስ። አማኖይ እያዉ አይበኮ ጳዉሎስ ኦድሸ፥ “ታኒ ፆሳስ ዳና መላ ህገ ባጋራ ህገስ ሀይቃስ። ታኒ ክርስቶሳራ ማስቃልያ ቦላ ካቀታስ። ታኒ ህዛፐ ታዉ ደእከ፥ ሽን ክርስቶስ ታናን ደኤስ። ታኒ ሀእ ደእያ ደኡዋ፥ ታና ዶስድ ታ ግሾ ባና አꬅድ እምዳ ፆሳ ናኣ አማናዳ ደአይስ” (2:19-20)።
ማፃፋ አይፈ ቆፋታ
ገሎ ቆፋ (1:1-10)
ጳዉሎስ ሀዋረተꬃስ ዶረትስ (1:11-24)
ጳዉሎስ ባ ኪታስ ሞተቴስ (2:1-21)
አቶተꬃስ ኦገይ አማኖ ፃላላ (3:1—4:31)
ጌሻ አያናንነ ሲቆን ደእተ (5:1—6:10)
አኬክሶነ ሳሮꬆ (6:11-18)
1
1 አሳፐ ዎይኮ አሳ ባጋራ ግዶናሽን፥ የሱስ ክርስቶሳፐነ እያ ሀይቆፐ ደንꬅዳ ፆሳ አዋፐ ሀዋረ ግዳና መላ ኪተትዳ ታ ጳዉሎስ፥ 2 ታራ ደእያ አማንያ እሻት ኡባይ፥ ጋላትያን ደእያ ዎሳ ኬꬃታስ ኪትዳ ኪታ።
3 ፆሳይ ኑ አዋይነ ኑ ጎዳ የሱስ ክርስቶሲ ህንተዉ አꬎ ኬሀተꬃነ ሳሮተꬃ እሞ።
4 ሀ ኢታ ዎድያፐ ኑና አሻናዉ፥ ኑ ፆሳ፥ ኑ አዋ ሸነን ክርስቶስ ኑ ናጋራ ግሾ ባና አꬅድ እሚስ። 5 ፆሳስ መርናፐ መርና ጋካናዉ ቦንቾይ ግዶ። አምንእ።
ቱማ ዎንገላይ እስኖ
6 ክርስቶሳ አꬎ ኬሀተꬃን ህንተና ፄግዳ ፆሳ አግድ፥ ሀራ ዎንገላኮ፥ ህንተ ኤለስድ፥ ዋንድ ስምዳኮ ታና ማላልሴስ። 7 ህንተና ባለꬃናዉነ ክርስቶሳ ዎንገላ ዎብሳናዉ ኮይያ ጉꬃ አሳት ደኦሶናፐ አትሽን፥ ቱማ ዎንገላይ እስኖ። 8 ሽን ኑና ግድን ዎይኮ ሳሎ ኪታንቾ ግድን ኑኒ ህንተዉ ኮይሮ ኦድዳ ዎንገላፐ ዱማትያ ሀራ ዎንገላ ህንተዉ ኦድያባ ግድኮ፥ እ ባደትዳባ ግዶ። 9 ሀይሳፈ ስን ኑኒ ግዳይሳዳ ሀእካ ዛራዳ ጋይስ። ህንተ ኤክዳ ዎንገላፐ ዱማትያ ዎንገላ ኦንካ ህንተዉ ኦድኮ ሄ ኡራይ ባደትዳባ ግዶ።
10 ያትን፥ ታና አስ ናሻና መላ ኮያናዬ? ዎይኮ ፆሲ ናሻና መላ ኮያይና? ዎይኮ ታ አሰ ኡፋይሳናዉ ኮያይና? ታ አሰ ኡፋይሳናዉ ኮያባ ግድኮ፥ ክርስቶሳ አይለ ግድከ።
ጳዉሎሳ ፄገተꬃ
11 ታ እሻቶ፥ ታ ህንተዉ ኦድዳ ዎንገላይ አሳፐ ግዶናይሳ ህንተ ኤራና መላ ታ ኮያይስ። 12 ታዉ ሀ ዎንገላ የሱሲ ክርስቶስ ቆንጭስስፐ አትሽን፥ አሳፐ ኤካብከ ዎይኮ አስ ታና ታማርስቤና።
13 ታ ካሰ አይሁደ አማኖን ደእያ ዎደ ዋና ደእዳኮ፥ ህንተ ስእደታ። ታ ዎሳ ኬꬃ ቃይ ባይና ጎዳናዉነ ꬋይሳናዉ ባፀታስ። ሀዋ 8:3፤ 22:4-5፤ 26:9-11. 14 አይሁደ አማኖ ናጎን፥ ታ ዎደን ደእያ አይሁደ እሻታፐ አꬋይስ። ኑ አዋታ ዎጋስ አꬋዳ ምሸታይስ። ሀዋ 22:3.
15 ሽን ታ ቡሮ ታ አየ ኡሎን ደእሽን ፆሳይ ታና ዶርስ፤ ባ አꬎ ኬሀተꬃን ታና ፄግስ። ሀዋ 9:3-6፤ 22:6-10፤ 26:13-18. 16 አይሁደ ግዶና አሳስ ዎንገላ ኦዳና መላ ፆሳይ ባ ናኣ ታዉ ቆንጭስዳ ዎደ ታ ኦደራካ ዞረታብከ። 17 ዎይኮ ታፐ ስን ሀዋረ ግድዳይሳታራ ጋሄታናዉ የሩሳላመ ባብከ። ሽን ታ ካሰታዳ አራበ ቢታ ባስ፤ ሄሳፈ ስማዳ ዳማስቆ ካታማ ያስ። 18 ሄꬑ ላይꬃፈ ጉየ፥ ጰፅሮሳራ ጋሄታናዉ የሩሳላመ ባዳ እያራ ታማነ እቻሹ ጋላስ ኡታስ። ሀዋ 9:26-30. 19 ሽን ጎዳ እሻ ያይቆባፐ አትሽን፥ ሀንኮ ሀዋረታ በአብከ።
20 ታ ህንተዉ ፃፍይዳይስ ዎርዶ ግዶናይሳ ፆሳ ስንꬃን ህንተዉ ቆንጭሳይስ።
21 ሄሳፈ ጉየ፥ ታኒ ሶረ ቢታነ ክልቅያ ቢታ ባስ። 22 ይሁዳን ደእያ ዎሳ ኬꬃ አሳይ ታና በእድ ኤርቦኮና። 23 ሽን ኤንቲ፥ “ካሰ ኑና ጎድያ ኡራይ፥ ሀእ ሄ እ ꬋይሳናዉ ኮይያ አማኑዋባ ሳባኬስ” ያገይሳ ስእዶሶና። 24 ስእዳ ኡባይ ታ ጋሶን ፆሳ ጋላትዶሶና።