1 ታማነ ኦይዱ ላይꬃፈ ጉየ፥ ባርናባሳራ ዛራዳ የሩሳላመ ባስ። ሄ ዎደ ትቶ ታራ ኤካዳ ባስ። ሀዋ 11:30፤ 15:2. 2 ፆሳይ ታዉ ቆንጭስዳ ቆንጨꬃን ያ ባዳ አይሁደ ግዶና አሳ ግዶን ታ ሳባክያ ዎንገላ ኤንታዉ ቆንጭሳስ። ካሰ ታ ዎፅዳ ዎꬃይነ ሀእካ ታ ዎፅያ ዎꬃይ ሀዳ ግዶና መላ ጋዳ ካለይሳታ ዱማ ሺሻዳ ኤንታዉ ኦዳስ። 3 ሀር አቶሽን፥ ታራ ደእያ ትቶይ ግርከ አስ ግድኮካ፥ ቃፃረቶ ግድ ኡንኤꬅቦኮና። 4 ግዶሽን፥ አማንያ እሻታ ዳንድ ኑ ግዶ ገልዳ እሶት እሶት እ ቃፃረታና መላ ኮይዶሶና። ሄ አሳት ክርስቶስ የሱሳን ኑስ ደእያ ላአተꬃ ዎችድ በአናዉ ጌማን ኑ ግዶ ገልድ ዛሪድ ኑና አይለ ኦꬃናዉ ኮዮሶና። 5 ሽን ቱማ ዎንገላይ ህንተናን ምንድ ዳና መላ ኑኒ ሀር አቶሽን፥ ጉꬃ ዎደስካ ኤንታዉ ኩሸ እምቦኮ።

6 ሽን ሀላቃ ዳንያ አሳታ ኦናተꬃይ ታዉ አይኮካ ግደና። ፆሳይ አሳ ሶምኦ በእድ ፕርደና። ሀ አሳት ታ ማርካትያ ዎንገላ ቦላ ጉጅዳባይ ባዋ። ዛረ 10:17. 7 ሽን ጰፅሮስ፥ አይሁደታስ ዎንገላ ኦዳና መላ ፆሳይ እያዉ ሀዳራ እምዳይሳዳ ታዉካ አይሁደ ግዶና አሳስ ዎንገላ ኦድያ ሀዳራ እምዳይሳ ኤንቲ ጉየፐ በእዶሶና። 8 ህዛ፥ ጰፅሮስ አይሁደታ ሀዋረ ግዳና መላ ኦꬅዳ ፆሳይ፥ ታካ አይሁደ ግዶና አሳስ ሀዋረ ግዳና መላ ኦꬅስ። 9 ቃስ ቱሱ ዳንድ በንትያ ያይቆብ፥ ጰፅሮስነ ዮሃንስ፥ ታዉ እመትዳ አꬎ ኬሀተꬃ በእዳ ዎደ ኑራ እስፍዳይሳ ቆንጭሳናዉ ታ ኩሽያነ ባርናባሳ ኩሽያ ኦይክዶሶና። ኑኒ አይሁደ ግዶና አሳኮ፥ ቃስ ኤንቲ አይሁደ አሳኮ ባናዉ ጊግዶሶና። 10 ኤንቲ ኑና ምንꬅድ ሀዳራ ግዳይ፥ ኑኒ ማንቆታስ ቆፓናይሳ። ካሰካ ታ ሄሳ ኦꬃናዉ አሞታይስ።

11 ጰፅሮስ አንፆከ ካታማ ይዳ ዎደ እ ባልዳ ግሾ ታኒ እያ ሶምኦን “ኔኒ ባላዳሳ” ጋስ። 12 ያይቆብ ኪትዳ ጉꬃ አሳይ ያናፐ ስን እ አይሁደ ግዶና አሳራ ሜስ፥ ሽን ኤንቲ ይዳፐ ጉየ፥ “አይሁደ ግዶና አሳፐ አማንዳይሳት ቃፃረታናዉ በሴስ” ግያ አሳስ ያይድ ኤንታፈ ሻከትስ። 13 ቃስ ሀንኮ አማንዳ አይሁደት ጰፅሮሳ ሀኑዋ ካልዶሶና። ሀር አቶሽን፥ ባርናባስካ እያ ቆፋን ጎሸትስ።

14 ሽን ኤንቲ ዎንገላ ቱማተꬃን ሱረ ሄመቶናይሳ በአዳ፥ ጰፅሮሳ አሳ ኡባ ስንꬃን፥ “ኔኒ አይሁደ ግዳሸ፥ አይሁደ ዎጋꬆ ግዶናሽን፥ አይሁደ ግዶና አሳዳ ደኣሳ፤ ያትን፥ ዋናዳ አይሁደ ግዶናይሳታ፥ ‘አይሁደ ዎጋን ደእተ ጋዳ ዎልቃታይ?’ ” ያጋስ።

15 ኑኒ የለታን አይሁደ፥ ሽን ናጋራንቾ ግድዳ አይሁደ ግዶና አሳ መላ ግዶኮ። 16 ሽን አስ የሱስ ክርስቶሳ አማንድ ፅሌስፐ አትሽን፥ ህገ ናግድ ፅሎናይሳ ኤሮስ። ኦንካ ህገ ናግድ ፅሎና ግሾ፥ ኑካ ህገ ናግድ ግዶናሽን፥ ክርስቶሳን አማንድ ፅላና መላ ክርስቶስ የሱሳ አማንዳ። ማዝ 143:2፤ ሮመ 3:20፥ 22.

17 ኑ አይሁደትካ ክርስቶሳ ባጋራ ፅላናዉ ኮሼስ። ሄሳ ግድኮ ኑካ ሀራ አሳዳ ናጋራንቾ ግደይሳ በኦስ። ያትን፥ ኑ ናጋራ ኦꬃና መላ ደንይ ክርስቶሳ ጉሰዬ? ኡባካ ግደና! 18 ህዛ፥ ታ ላልዳይሳ ዛራዳ ኬፅያባ ግድኮ ታኒ ታ ሁጰን ህገ መንይሳ ግደይሳ ቆንጭሳይስ። 19 ታኒ ፆሳስ ዳና መላ ህገ ባጋራ ህገስ ሀይቃስ። 20 ታኒ ክርስቶሳራ ማስቃልያ ቦላ ካቀታስ። ታኒ ህዛፐ ታዉ ደእከ፥ ሽን ክርስቶስ ታናን ደኤስ። ታ ሀእ ደእያ ደኦይ፥ ታና ዶስድ ታ ግሾ ባና አꬅድ እምዳ ፆሳ ናኣ አማናዳ ደአይስ። 21 ታኒ ፆሳ አꬎ ኬሀተꬃ ሀዳ ኦꬅከ። ፅሎተꬅ አሳስ ህገ ባጋራ በንትያባ ግድያኮ፥ ክርስቶስ ጮ ሀይቅስ ጉሱ።