1 ህንተኖ፥ አኬክ ባይና ጋላትያ አሳቶ፥ ህንተ አይፍያ ስንꬃን ክርስቶስ ማስቃለ ቦላ ካቀትዳ ምስለዳ ቆንጭድ በንቴስ። ያትን፥ ቱማስ ህንተ ኪተቶና መላ ህንተና ብትዳይ ኦኔ?ዛረ 27:26. 2 ታ እስባ ኤራናዉ ኮያይስ፤ ህንተ ጌሻ አያና ኤክዳይ ህገ ናግድየ ዎይኮ ህንተ ስእዳ ዎንገላ አማንድ ኤክደቲ? 3 ህንተ ሄሳ መላ ኤዬ? ህንተ ፆሳ አያናን ዶምድ፥ ሀእ ዎልቃን ፖላናዉ ኮዬቲ? 4 ህንተ ዎንገላ ጋሶን ዳሮ ዋየትዳይ መሌ? ሄ ዋየ ኡባይ ጮ ግድዴ? 5 ፆሳይ ህንተዉ ጌሻ አያና እመይነ ህንተ ግዶን ማላታታ ኦይ፥ ህንተ ህገ ናግዳ ግሾየ ዎይኮ ዎንገላ ስእድ አማንዳ ግሾ?

6 አነ አብራሃመ በእተ፥ “እ ፆሳ አማንስ፤ ፆሳይ እያዉ ሄሳ ፅሎተꬅ ኦꬅድ ኤክስ”መ 15:6፤ ሮመ 4:3. ጌተትድ ፃፈትስ። 7 ህዛ፥ አማነይሳት አብራሃመ ናይታ ግደይሳ ኤርተ። ሮመ 4:16. 8 ፆሳይ አይሁደ ግዶና አሳ አማኖን ፅልሳናይሳ ጌሻ ማፃፋይ በእድ፥ “ካዎተꬃ ኡባይ ነናን አንጀታና” ያግድ፥ ዎንገላ አብራሃመስ ካሰትድ ኦድስ። መ 12:3. 9 ሄሳ ግሾ፥ አማንያ ኡባይ አማንዳ አብራሃመራ እስፈ አንጀትዶሶና።

10 ህገ ናግድ ፅላና ግያ ኦንካ ባደትዳይሳ። አይስ ጊኮ፥ ጌሻ ማፃፋን፥ “ህገ ማፃፋን ፃፈትዳ ኡባ ናጎና ኦንካ ባደትዳይሳ ግዶ” ጌተትድ ፃፈትስ። ዛረ 27:26. 11 “ፅሎይ አማኖን ዳና” ጌተትድ ፃፈትዳ ግሾ፥ ኦንካ ፆሳ ስንꬃን ህገ ናግድ ፅሎናይስ ኤረትዳባ። እብራ 2:4. 12 ህገይ አማኖን ዘምፐና። ሽን፥ “ህግያ ናግያ ኦንካ ህግያን ደኦን ዳና” ያጌስ። ሌወ 18:5.

13 “ምꬃ ቦላ ካቀትድ ሀይቅያ ኦንካ ባደትዳይሳ” ጌተትድ ፃፈትዳ ግሾ፥ ክርስቶስ ኑ ግሾ ባደትዳይሳ ግድድ፥ ኑና ህገ ባደꬃፈ ዎዝስ። ዛረ 21:23. 14 ፆሳይ አብራሃመስ እምዳ አንጆይ፥ የሱስ ክርስቶሳ ባጋራ አይሁደ ግዶና አሳ ጋካና መላነ ፆሳይ እማና ግዳ ጌሻ አያና ኑኒ አማኖን ኤካና መላ ሄሳ ኦꬅስ።

15 ታ እሻቶ፥ ታ ህንተዉ አሳ ደኦን ሜዘ ግድድ ደእያባ ሌምሶ ኦꬃዳ ኦዳይስ። አስ ጫቅዳ ጫቆይ ምንዳፐ ጉየ፥ ኦንካ ሄ ጫቁዋ ሻራናዉ ዎይኮ እያ ቦላ ሀራ ጉጃናዉ ዳንዳኤና። 16 ፆሳይ ሄ ኬከ ቃላ አብራሃመስነ እያ ዘረꬃስ እሚስ። ጌሻ ማፃፋይ፥ ዳሮ አሳስ ኦድያዳ፥ “ነ ዘረꬃታስ” ጌና። ሽን እስ አሳስ ኦድያዳ፥ “ነ ዘረꬃስ” ያጌስ፤ እካ ክርስቶሳ። መ 12:7.

17 ታኒ ገይ ሀይሳ፤ ኦይዱ ፄታነ ሀስታሙ ላይꬃፈ ጉየ እመትዳ ህገይ፥ ኮይሮ ፆሳይ ምንꬅዳ ጫቁዋ ሻርድ ኡፋይሳ ቃላ ꬋይሳናዉ ዳንዳኤና። ከሳ 12:40. 18 ፆሳይ እምያ ላታይ ህገን ኤከትያባ ግድያኮ ፆሳይ እምዳ ኡፋይሳ ባጋራ ግደይስ አቴስ። ሽን ፆሳይ ባ አꬎ ኬሀተꬃን ላታ አብራሃመስ ኡፋይሳ ቃላ ባጋራ እሚስ። ሮመ 4:14.

19 ያትን፥ ህገይ አይስ እመትዴ? ህገይ እመትዳይ፥ አብራሃመስ ኡፋይሳ ቃል እመትዳ ኮቻይ ያና ጋካናዉ ኢታ ኦሶይ አይበኮ ኤርሳናሳ። ህገይ ኪታንቾታ ባጋራ እመትድ፥ ግዶ ግድድ ስገꬅያ እስ አሳ ባጋራ ኦሶ ቦላ ፔእስ። 20 ግዶ ግድድ ስገꬅያ ኡራይ እስ አሳ ፃላላስ ግደና፥ ሽን ፆሳይ እስኖ።

21 ያትን፥ ህገይ ፆሳ ኡፋይሳ ቃላራ ኤቀትዬ? አካይ፥ ግደና! ህገይ እመትዳይ አሳስ ደኦ እማናዉ ግድያኮ፥ ፅሎተꬅ ህገ ባጋራ በንታናሽን። 22 ሽን የሱስ ክርስቶሳ አማንን በንትያ ኡፋይሳ ቃላይ አማነይሳታስ እመታና መላ ኩመꬃ አላመይ ናጋራስ ሃረትድ ደኤይሳ ጌሻ ማፃፋይ ኦዴስ።

23 ሽን አማኖይ ያናፐ ካሰ ህገይ ኑና ቃች ዎꬅስ። ሄ አማኖይ ቆንጫና ጋካናዉ ህገይ ኑ ቦላ ጎርድ ዎꬅስ። 24 ሄሳ ግሾ፥ ኑኒ አማኖን ፅላና መላ ክርስቶስ ያና ጋካናዉ ህገይ ናአ ናግያ አሳ መላ ኑና ናገይሳ ግድስ። 25 ሽን ሀእ አማኖይ ይዳ ግሾ፥ ህገይ ህዛፐ ጉየ ናአ ናግያ አሳ መላ ኑና ናገይስ አትስ።

26 ህንተ ኡባይ የሱስ ክርስቶሳ አማንድ ፆሳ ናይታ ግድደታ። 27 ክርስቶሳራ እስኖ ግዳናዉ ፃማቀትዳ ኡባይ ክርስቶሳ ማኦዳ ማእደታ። 28 ህንተ ኡባይ ክርስቶሳን እስኖ ግድያ ግሾ፥ አይሁደ አሳ ግዶንነ ግርከ አሳ ግዶን፥ አይለ ግዶንነ ዎማኖ ግዶን፥ አደ ግዶንነ ማጫሳ ግዶን ዱማተꬅ ባዋ። 29 ህዛ፥ ህንተ ክርስቶሳባ ግድኮ ህንተ አብራሃመ ዛረ። ፆሳ ኡፋይሳ ቃላዳ ህንተ ላተይሳታ። ሮመ 4:13.