1 ታ ገይስ ሀይሳ። ላተይ ናኣ ግድ ደእሸ፥ ሻሎ ኡባይ እያባ ግድኮካ፥ እ አይለፈ አይኮካ ዱማተና። 2 ሽን እያ አዋይ ግዳ ዎደይ ጋካናዉ እ ሀዳራ ኤክዳይሳታ ኩሸንነ ናገይሳታ ኩሸን ደኤስ። 3 ሄሳዳካ፥ ኑኒ ናአተꬃን ደእያ ዎደ አላምያ ዎጋስ አይለትድ ደእዳ። 4 ሽን ዎደይ ጋክዳ ዎደ ፆሳይ ህገፈ ጋርሳን፥ ማጫሳፐ የለትዳ ባ ናኣ ኪትስ። 5 እ ሄሳ ኦꬅዳይ፥ ህገስ ሃረትድ ደኤይሳታ ዎዛናዉነ ኑና ባ ናይታ ኦꬃናሳ።ሮመ 8:15-17.

6 ኑ ፆሳ ናይታ ግድያ ግሾ፥ “አባ፥ አዋዉ” ግድ ፄግያ ባ ናኣ አያና ኑ ዎዛና ግዶ ኪትስ። 7 ሄሳ ግሾ፥ ህዛፐ ኔኒ ፆሳ ናአፐ አትሽን፥ አይለ ግዳካ። ኔኒ እያ ናአ ግድኮ፥ ፆሳ ላተይሳ ግዳዳሳ።

8 ህንተ ካሰ ፆሳ ኤሮና ዎደ ፆሰ ግዶናይሳታስ አይለ ግድድ ሃረትደታ። 9 ሽን ሀእ ህንተ ፆሳ ኤርደታ፤ ኡባራካ ፆሳን ኤረትደታ። ያትን ፓꬆናነ ጎኦና አላመ ዎጋታኮ ጉየ ዋንድ ስመቲ? ዎꬍ ኤቅድ፥ ዋንድ ኤንታዉ አይለ ግዳናዉ ኮዬቲ? 10 ዱማ ግድዳ ጋላሳታ፥ አጌናታ፥ ዎደታነ ላይꬃታ ህንተ ሎይꬅ ቦንቸታ። 11 ታና ህንተባይ ያሼስ፤ ታ ህንተዉ ጮ ዳቡራድናሻ?

12 ታ እሻቶ፥ ታ ህንተዳ ሀንዳ ግሾ፥ ህንተካ ታዳ ሀንተ ጋዳ ህንተና ዎሳይስ። ህንተ ታና አይብንካ ቆህቤከታ። 13 ታኒ ኮይሮ ሀርገታሸ ህንተዉ ዎንገላ ኦድዳይሳ ህንተ ኤሬታ። 14 ታ ሀርገይ ህንተዉ ፓጨ ግድኮካ፥ ታና ሳለትበከታ፤ እፅበከታ። ሽን ታና ፆሳ ኪታንቾ ዎይኮ ክርስቶስ የሱሳ ሞከይሳዳ ሞክደታ።

15 ያትን፥ ሄ ህንተዉ ደእያ ኡፋይሳይ ኡባይ አዉ ብዴ? ህንተዉ ዳንዳኤትዳኮ፥ ህንተ ታዉ፥ ህንተ አይፍያ ከስድ እምያኮ እፆናይሳ ታ ማርካታይስ። 16 ያትን፥ ታ ህንተዉ ቱማ ኦድዳ ግሾ ህንተዉ ሞርከ ግዳድናዬ?

17 ሄ አሳት ህንተና ባንታኮ ዛራናዉ ኮዮሶና፥ ሽን ኤንታ ቆፋይ ሎኦሳ ግደና። ኤንታ ቆፋይ ህንተና ሻካናሳነ ህንተ ኤንታዉ ቆፓና መላ ኦꬃናሳ። 18 ሎኦባ ኦꬃናዉ አሞትኮ ሎኦ፥ ሽን ሄስ ታ ህንተራ ደእያ ዎደ ፃላላ ግዶናሽን ኡባ ዎደ ግዶ።

19 ታ ሲቆ ናይቶ፥ ክርስቶስ ህንተናን ምስለታና ጋካናዉ ማጫስ የሎስ እቀተይሳዳ ታ ህንተ ግሾ እቀታይስ። 20 ህንተባይ ታዉ ሀድርን ታ ኡንኤታስ፤ ሀእ ህንተ ግዶን ታ በንታዳ ሸነታዳ ኦድያኮ አይ መላ ዶሳይናሽን።

21 ሙሰ ህገን ሃረትድ ዳናዉ ኮየይሳቶ፥ አነ ታዉ ኦድተ፤ ህገይ አይ ግያኮ ኤረከቲ? 22 ጌሻ ማፃፋይ፥ “አብራሃመስ ጋꬍንደፈነ ጎዳተፈ የለትዳ ናምኡ ናይት ደኦሶና” ያጌስ። መ 16:15፤ 21:2. 23 ጋꬍንደ ናአይ አስ ናአ የልያ ማራን የለትስ፥ ሽን ጎዳተ ናአይ ፆሳ ኡፋይሳ ቃላን የለትስ።

24 ሀ ማጫሳት ናምኡ ጫቆታስ ሌምሶ ግድድ ኤከቶሶና። ኤንታፈ እስንያ፥ ሲና ዙማፐ ይዳራ፥ ባ ናይታ አይለተꬃስ የላሱ፤ እያካ አጋሮ። 25 አጋራ አራበ ቢታን ደእያ ሲና ዙማን ሌምሰታዳ ሀእ ደእያ የሩሳላመ ዳናዉሱ። አይስ ጊኮ፥ እያ ባ ናይታራ አይለተꬃን ደአዉሱ። 26 ሽን ሳሎን ደእያ የሩሳላመይ አይለተꬃን ደኡኩ፤ እያ ኑ ኡባስ አዮ። 27 ጌሻ ማፃፋይ፥

28 ታ እሻቶ፥ ህንተ ይሳቃዳ ፆሳ ኡፋይሳ ቃላን የለትዳ ናይታ። 29 ሽን ሄ ዎደ አሳ ማራዳ የለትዳይስ፥ አያና ዎልቃን የለትዳይሳ ጎድስ። ሀችካ ሄሳ መላ። መ 21:9. 30 ሽን ጌሻ ማፃፋይ ዎይጊ? “ጋꬍንደ ናአይ ጎዳተ ናኣራ እስፈ ላቶና ግሾ፥ አይልዉ እ ናኣራ ዎላ ከሳ የዳ” ያጌስ። መ 21:10. 31 ሄሳ ግሾ፥ ታ እሻቶ፥ ኑኒ ጎዳተ ናይታፐ አትሽን፥ ጋꬍንደ ናይታ ግዶኮ።