1 ኑኒ ላአተꬃን ዳና መላ ክርስቶስ ኑና አይለተꬃፈ ከስስ። ህዛ፥ ምንድ ኤቅተ፤ ዛሪድ አይለተꬃ ቃምባራን ገሎፕተ።

2 ታ፥ ጳዉሎስ፥ ገይሳ ስእተ። ህንተ ቃፃረታናዉ ኮይኮ፥ ክርስቶስ ህንተና አይኮካ ማደና። 3 ቃፃረትያ ኦንካ ህገይ ኪትያ ኡባ ፖላናዉ በሰይሳ ጉጃዳ ታ ኦዳይስ። 4 ህገ ናግድ ፅላናዉ ኮየይሳቶ፥ ክርስቶሳፐ ሻከትደታ፤ ፆሳ አꬎ ኬሀተꬃፈ ኩንድደታ። 5 ሽን ኑኒ ፆሳ አያና ባጋራ አማኖን ፅላናዉ ኡፋይሳን ናጎስ። 6 ህዛ፥ ክርስቶስ የሱሳን ደእኮ፥ ሲቆን ቆንጭያ አማኖፐ አትሽን፥ ቃፃረትን፥ ቃፃረቶና አግን ኑና አይኮካ ማደና።

7 ካሰ ህንተ ሎኦ ዎፄታ፥ ሽን ሀእ ቱማስ ኪተቶና መላ ህንተና ድግዳይ ኦኔ? 8 ሀይሳ መላ ኢታ ጭሞይ ህንተና ፄግዳ ፆሳፈ ይቤና። 9 ሄስካ፥ “ጉꬃ እርሾይ ሙኑቃ ኡባ ደንꬄስ”2 ቆሮ 5:6. ጌተትድ ፃፈትዳይሳ መላ። 10 ህንተዉ ሀራ ቆፍ ባይናይሳስ ታ ጎዳን አማነታይስ። ሽን ህንተና ቡቅያ ኦንካ ፆሳፈ ባ ፕርዳ ኤካና።

11 ታ እሻቶ፥ ታ ሀእ ጋካናዉ ቃፃአረተꬅ ሳባክያባ ግድኮ፥ ያትን ታና አይስ ጎዶና? ሄስ ቱማ ግድያኮ ክርስቶሳ ማስቃልያባ ታማርሶይ አሳስ ꬉበ ግደናሽን። 12 ህንተና ቡቀይሳት ቃፃረተꬃ ፃላላ ግዶናሽን፥ ባንታና ቃራትያኮካ ታ ዶሳይስ።

13 ታ እሻቶ፥ ህንተ ላአ ዳናዉ ፄገትደታ። ግዶሽን፥ ህንተ ላአተꬃይ አሾ አሞ ፖላናዉ ህንተዉ ጋሶ ግዶፖ፤ ሄሳፈ አꬅድ እሶይ እሱዋ ሲቆን ማድተ። 14 ህገ ኡባይ፥ “አሰ ኔዳ ዶሳ” ግያ እስ ቃላን ቃሸትስ። ሌወ 19:18. 15 ሽን ህንተ እሶይ እሱዋራ ሳፀትያባነ ሜተትያባ ግድኮ፥ ህንተ ዎል ዉርሶና መላ ናገትተ።

16 ህዛ፥ ታ ህንተዉ ኦዳይስ፤ አያናን ደእተ፤ ህንተ አሾ አሙዋ ፖሎፕተ። 17 አሾ አሞይ አያና አሙዋራ ሞርከ፤ ቃስ አያና አሞይካ አሾ አሙዋራ ሞርከ። ኤንቲ እሶይ እሱዋራ እፀትያ ግሾ ህንተ ዶስያባ ኦꬃናዉ ዳንዳኤከታ። ሮመ 7:15-23. 18 ሽን አያናይ ህንተና ካለꬅያባ ግድኮ ህገይ ህንተና ሃረና።

19 አሾ ኦሶት ኤረትዳይሳታ፤ ኤንትካ፥ ላይማተꬅ፥ ቱናተꬅ፥ ቃይፀ፥ 20 ኤቃ ጎይኖ፥ ብታ፥ ሞርከተꬅ፥ ካች፥ ቃናተ፥ ሀንቆ፥ ባና ዶሶ፥ ሻከተꬅ፥ ኢታ ቶቦ 21 ገነ፥ ማꬆ፥ የꬅነ ሄሳ ሄሳ መላታ። ካሰ ታ ህንተዉ ኦድዳይሳዳ ሀእካ ታ ህንተዉ ኦዳይስ። ሀይሳ መላባታ ኦይሳት ፆሳ ካዎተꬃ ላቶኮና።

22 ሽን አያና አይፈይ፥ ሲቆ፥ ኡፋይስ፥ ሳሮተꬅ፥ ዳንዳአ፥ ኬሀተꬅ፥ ሎኦተꬅ፥ አማኖ፥ 23 አሽከተꬅ፥ ባና ሃሮ። ሀይሳ መላባታ እፅያ ህገይ ባዋ።

24 ክርስቶስ የሱሳባ ግድዳይሳት ባንታ አሹዋ እያ ኢታ ቆፋራነ እያ አሙዋራ እስፈ ማስቃልያ ቦላ ካቅዶሶና። 25 ኑ አያናን ደእያባ ግድኮ፥ ኑና አያናይ ካለꬆ። 26 አነ እሶይ እሱዋ ይሎይሸነ ቃናትሸ ጮ ጬቀተይሳ አጎስ።