1 ታ እሻቶ፥ እስ አስ ናጋራን ኩንድኮ፥ አያናን ደእያ ህንተ ሄ ኡራ አሽከተꬃን ሱርስተ። ሽን ኔኒ ሄሳ መላባን ፓጨቶና መላ ነና ናጋ። 2 እሶይ እሱዋ ዴፆ ቶሁዋ ቶክተ። ያትኮ ክርስቶሳ ህግያ ፖሌታ። 3 እስ አስ አይኮይካ ባዋሽን፥ ባና ሀራታፐ ሎኦ ግድ ቆፕኮ፥ እ ባና ጭሜስ። 4 ሽን እስ እስ አስ ባ ኦሱዋ ፓጮ። ሄሳፈ ጉየ፥ ሀራታራ ባና ጋደየይሳ አግድ ባዉ ጬቀትያባ ደሜስ። 5 እስ እስ አስ ባ ቶሁዋ ባዉ ቶካናዉ በሴስ።

6 ፆሳ ቃላ ታማርያ ኦንካ ሎኦባ ኡባ ባ አስታማርያራ ሻከቴስ።

7 ህንተ፥ ህንተና ጭሞፍተ። አስ ባ ዘርዳባ ዛሪድ ጫክያ ግሾ ፆሳ ቦላ ቀልቅሶፕተ። 8 ባ አሾ አሙዋ ኩንꬃናዉ ዘርያ ኦንካ፥ ባ አሾ አሙዋፐ ሀይቆ ቡጫና። ሽን አያና ኡፋይሳናዉ ዘርያ ኦንካ አያናፐ መርና ደኦ ጫካና። 9 አነ ሎኦ ኦሶ ኦꬃናዉ አዛለይሳ አጎስ። ኑኒ አዛሎና እፅኮ ዎደይ ጋክያ ዎደ ኑ ዘርዳይሳ ጫካና። 10 ኑ እንጀ ዎደ ደምኮ፥ አሳ ኡባስ፥ አꬅድካ አማንያ አሳስ ሎኦባ ኦꬆስ።

11 ታኒ ታ ኩሸን፥ አይ መላ ግታ ፕዳለን ህንተዉ ፃፍዳኮ በእተ። 12 አሳ ስንꬃን ሎኦ ግድድ በንታናዉ ኮይያ አሳት ህንተ ቃፃረታና መላ ኮዮሶና። ሽን ሄሳ ኤንቲ ኦይ፥ ክርስቶሳ ማስቃልያ ግሾ ኤንታና ጎድ ጋኮና መላሳ። 13 ኤንቲ ህንተ ቃፃረተꬃን ጬቀታናዉ ኮይድ ህንተና ቃፃረቶ ጎሶናፐ አትሽን፥ ቃፃረትዳይሳትካ ባንታ ሁጰን ህግያ ናጎኮና።

14 ሽን አላመይ ታዉ ካቀትዳይሳፈነ ታንካ አላምያስ ካቀትዳ፥ ጎዳ የሱስ ክርስቶሳ ማስቃልያፐ አትሽን፥ ሀራ ጬቆይ ታፐ ሃኮ። 15 ህዛ፥ ቃፃረትን ቃፃረቶና አግን አይኮካ ማደና። ማደይ ኦራꬃ መተꬅ ግዶ። 16 ሀ ዎጋ ካልያ ኡባስነ ፆሳ ደረ ግድዳ እስራኤለስ ሳሮተꬅነ ማሮተꬅ ግዶ።

17 ታኒ የሱሳስ ማዱንፅዳ ቤታ ታ አሳተꬃን ቶክዳ ግሾ፥ ህዛፐ ታና ኦንካ ዋይሶፖ።

18 ታ እሻቶ፥ ኑ ጎዳ የሱስ ክርስቶሳ አꬎ ኬሀተꬃይ ህንተራ ግዶ። አምንእ።