1 ፆሳ ሸነን ክርስቶስ የሱሳ ሀዋረ ግድዳ ጳዉሎሳፐ፥ ኤፈሶናን ደእያ ጌሻታስነ ክርስቶስ የሱሳ አማነይሳታስ ፃፈትዳ ኪታ። ሀዋ 18:19-21፤ 19:1.

2 ፆሳ ኑ አዋፐነ ጎዳ የሱስ ክርስቶሳፐ አꬎ ኬሀተꬃይነ ሳሮተꬃይ ህንተዉ ግዶ።

3 ሳሎን ደእያ አያና አንጆ ኡባን ክርስቶሳ ባጋራ ኑና አንጅዳ፥ ኑ ጎዳ የሱስ ክርስቶሳ አዋይ፥ ፆሳይ ጋላተቶ። 4 ኑኒ እያ ስንꬃን ጌሻታነ ቦረይ ባይናይሳታ ግዳና መላ ፆሳይ አላመይ መታናፐ ካሰ ክርስቶሳ ባጋራ ባ ሲቁዋን ኑና ዶርስ። 5 ፆሳይ ባ ሸንያን ባ ዶስዳይሳዳ የሱስ ክርስቶሳ ባጋራ ኑና ባ ናይታ ኦꬃናዉ ካሰትድ ቆፕ ዎꬅስ። 6 ፆሳይ ባ ሲቅያ ናኣ ባጋራ ኑስ ጮ እምዳ አꬎ ኬሀተꬃይ ቦንቸታና መላ ሄሳ ኦꬅስ።

7 ፆሳ አꬎ ኬሀተꬃ ዱረተꬃዳ ክርስቶሳ ሱꬃን ዎዘትድ ናጋራ አቶተꬃ ደምዳ። 8 ባ አꬎ ኬሀተꬃ ጭንጫተꬃንነ ኤራተꬃን ኩንꬅድ ኑስ እሚስ። ቆላ 1:14. 9 ፆሳይ ባ ዶስዳይሳዳ ክርስቶሳ ባጋራ እያ ሸንያ ፁራ ኑ ኤራና መላ ኦꬅስ። 10 ዎደይ ጋክያ ዎደ ፆሳይ ፖላናዉ ቆፕዳ ቆፋይ፥ ሳሎንነ ሳአን ደእያ መተꬃ ኡባይ ክርስቶሳፐ ጋርሳን ግዳና መላሳ።

11 ኡባባ ባ ሸንያዳ ኦꬅያ ፆሳይ፥ ካሰትድ ሀልችዳይሳ ክርስቶሳ ባጋራ ኑኒ እያባ ግዳና መላ ኑና ዶርስ። 12 ሄሳ እ ኦꬅዳይ፥ ክርስቶሳን ኡፋይስ ዎꬅድ ናጎን ኮይሮ ግድዳ ኑኒ ፆሳ ቦንቹዋ ጋላታን ቆንጭሳና መላሳ። 13 ህንተካ ህንተ አቶተꬃ ዎንገላ፥ ሄስካ ቱማ ቃላ ስእዳ ዎደ ክርስቶሳ አማንደታ። ፆሳይ ህንተዉ እማና ግዳ ጌሻ አያናን ህንተ አታመትደታ። 14 ፆሳ ቦንቾይ ጋላተታና መላ ፆሳይ ባ አሳ ዎዛና ጋካናዉ ጌሻ አያና ኑስ ኦይꬁ ኦꬅድ እሚስ።

15 ሄሳ ግሾ፥ ጎዳ የሱሳ ህንተ አማነይሳነ ጌሻታ ኡባ ህንተ ሲቀይሳ ታ ስእዳ ዎደ 16 ታ ዎሳን ህንተና ቆፓሸ ህንተ ግሾ ፆሳ ጋላተይሳ አጋብከ። 17 ጎዳ የሱስ ክርስቶሳ ፆሳይ፥ ቦንቾ አዋይ፥ ፆሳ ህንተ አꬅድ ኤራናዳ ጭንጫተꬃነ ቆንጨꬃ አያና ህንተዉ እማናዳ ታኒ ፆሳ ዎሳይስ። 18 ፆሳይ ህንተና ፄግዳ ኡፋይሳይነ ጌሻት ላትያ ቦንቾ ላታይ አይ መላ ዳሮኮ ህንተ ኤራና መላ ፆሳይ ህንተ ዎዛና አይፍያ ዶያና መላ ታኒ ፆሳ ዎሳይስ።

19 ቃስ እያ አማንያ ኑናን ኦꬅያ እያ ዎልቃይ አይ መላ አꬍዳ ግቴኮ ህንተ ኤራና መላ ዎሳይስ። ሄ ዎልቃይ ፆነቶናነ ዳቡሮና ዎልቃ። ሀ ኑናን ደእድ ኦꬅያ ዎልቃይነ፥ 20 ክርስቶሳ ሀይቆፐ ደንꬅድ፥ ሳሎን ፆሳፈ ኡሻቻ ባጋራ ኡትስዳ ግታ ዎልቃይ እስኖ። ማዝ 110:1. 21 እያ ሱንꬃይ፥ አይሰይሳታፐነ ማታ አዋታፐ፥ ሃረይሳታፐነ ጎዳታፐ፥ ቦላ ግድድ ሀ አላምያ ፃላላን ግዶናሽን፥ ስንꬃፈ ያና አላምያንካ ሀራ ሱንꬃታ ኡባፈ ꬎቃ። 22 ፆሳይ ኡባ ክርስቶሳ ቶሆፐ ጋርሳን ሃርስስ፤ ቃስ ዎሳ ኬꬃን፥ ኡባባን ጎዳ ግዳና መላ እያ ሹምስ። ማዝ 8:6፤ ቆላ 1:22-23፤ 1:18. 23 ዎሳ ኬꬅ ክርስቶሳ ኩመꬅ ኦꬅያ እያ አሳተꬅ። መተꬃይ ደእያ በሳ ኡባን ክርስቶስ ባ ሁጰን ኡባባ ኩንይሳ።