1 ሀይሳፈ ካሰ ህንተ፥ ህንተ ናጋራነ ህንተ ቆሁዋ ጋሶን ሀይቅዳይሳታ። ቆላ 2:13. 2 ሄ ዎደ ህንተ ሀ አላምያ ኢታ ኦግያ ካልደታ። ጫርኩዋ ቦላ ደእያ አያና ዎልቃታ ሀላቃስነ ሀእካ ፆሳስ ኪተቶና አሳ ሃርያ አያናስ ኪተትደታ። 3 ኑ ኡባይካ ካሰ ሄ አሳታ ግዶን ኑ አሾ አሙዋነ ኑ ዎዛና ሸንያ ካልድ ደእዳ። ኑካ ሀራታ መላ ኑ መተꬃን ፆሳ ሀንቁዋ ኤካናዉ ደኤይሳታ።

4 ሽን ፆሳ ግታ ማሮተꬃፈነ ኑስ ደእያ ግታ ሲቁዋፐ ደንድዳይሳን፥ 5 ሀር አቶሽን ኑኒ ኑ ቆሁዋን ሀይቅድ ደእሽን ክርስቶሳ ባጋራ ኑስ ደኦ እሚስ። ህንተካ አትዳይ ፆሳ አꬎ ኬሀተꬃና። 6 ፆሳይ ኑና ክርስቶሳራ እስፈ ሀይቆፐ ደንꬅድ ሳሎን እያራ እስፈ ዎꬅስ። 7 እ ሄሳ ኦꬅዳይ፥ ክርስቶስ የሱሳ ባጋራ ኑስ ቆንጭስዳ ባ ኬሀተꬃነ ዛው ባይና ባ አꬎ ኬሀተꬃ ዱረተꬃ ያና ላይꬃን ኑና በሳናሳ። 8 ህንተ አꬎ ኬሀተꬃን አማኖን አትደታ። ሄስካ፥ ፆሳ እሞታፐ አትሽን፥ ህንተ ኦሶን በንትዳባ ግደና። 9 ኦንካ ጬቀቶና መላ አቶተꬃይ በንትዳይ ኦሶን ግደና። 10 ኑኒ ፆሳ መተꬅ፤ እ ኑስ ካሰትድ ጊግስ ዎꬅዳ ሎኦ ኦሶታ ኦꬃና መላ ክርስቶስ የሱሳ ባጋራ ኦራꬅ መትዳ።

11 ሄሳ ግሾ፥ ህንተኖ የለታን አይሁደ ግዶናይሳቶ፥ አይሁደት ባንታዉ አሳ ኩሸን ቃፃረትድ፥ ህንተና ቃስ ቃፃረትቦናይሳታ ግድ ፄገይሳ አኬክተ። 12 ሄ ዎደ ህንተ ክርስቶሳፐ ሻከት ደእዳይሳ፥ እስራኤለ አሳስ አላጋ ግድድ ደእዳይሳ፥ ፆሳ ኡፋይሳ ቃላፐ ሃክድ ደእዳይሳነ ሀ አላምያን ኡፋይስነ ፆሲ ባይና ደእዳይሳ አኬክተ። 13 ሽን ህንተ ካሰ ሃክድ ደእዳይሳት፥ ሀእ ክርስቶስ የሱሳን ደእድ ክርስቶሳ ሱꬃን ማታ ሺቅደታ።

14 ክርስቶስ ኑ ሳሮተꬃ፤ እ አይሁደነ አይሁደ ግዶና አሳ ትምድ፥ ናምኣ ሻክ ዎꬅዳ ሞርከተꬃ ጎዳ ላልስ። 15 እ ባናን ሀ ናምኡ ኮቻታፐ እስ ኦራꬃ አሰ መꬍድ፥ ህግያ እያ ኪታራነ ዎጋታራ እስፈ ባ አሳተꬃን ꬋይስድ ሳሮተꬅ እሚስ። ቆላ 2:14. 16 ክርስቶስ ማስቃልያ ቦላ ሀይቅድ ሞርከተꬃ ꬋይስስ፤ ቃስ ናምኡ ኮቻታ እስ አሳተꬅ ኦꬅድ ፆሳራ ስገꬅስ።ቆላ 1:20. 17 ክርስቶስ ይድ፥ ፆሳፈ ሃክድ ደእያ ህንተዉ፥ ቃስ ማትድ ደእያ ኤንታዉ ሳሮተꬃ ዎንገላ ኦድስ። እሳ 57:19. 18 ኑ ኡባይ እያ ባጋራ እስ አያናን አዋ ስን ሺቃናዉ ዳንዳኦስ።

19 ህዛፐ ህንተ አላጋ ዎይኮ እማ ግደከታ፥ ሽን ህንተ ሀእ ጌሻታ ቢታ አስነ ፆሳ ሶ አስ። 20 ህንተ ሀዋረትነ ናበት ባስዳ ባሱዋ ቦላ ኬፀትደታ። ጎዳ ፃጱዋ ምንꬅያ ሹቻይ ክርስቶስ የሱሳ። 21 እያን ኬꬃ ኡባይ እስፈ ኦይከትድ ጎዳን ጌሻ ፆሳ ኬꬅ ግዳናዉ ድጬስ። 22 ህንተ ቃስ ፆሳይ ባ አያናን ደእያ ኬꬅ ግዳናዉ ክርስቶሳን እስፈ ኬፀተታ።