1 ሄሳ ግሾ፥ ታኒ፥ ጳዉሎስ፥ አይሁደ ግዶና ህንተ ግሾ ክርስቶስ የሱሳን ቃሾ አስ ግዳስ። 2 ታ ህንተና ማዳና መላ ፆሳይ ባ አꬎ ኬሀተꬃን ታዉ እምዳ ሀ ኦሱዋባ ህንተ ሎይꬅ ስእደታ። 3 ታ ህንተዉ ካሰ ቃንꬃን ፃፍዳይሳዳ ፆሳይ ባ ፁራ ቆንጨꬃን ታዉ ቆንጭስስ። 4 ታ ፃፍዳይሳ ህንተ ናባብያ ዎደ ክርስቶሳ ፁራ ታ አይ መላ ኤርዳኮ ህንተ አኬካናዉ ዳንዳኤታ። ቆላ 1:26-27. 5 ሀ ፁራይ ጌሻ ሀዋረታስነ ናበታስ ሀእ አያና ባጋራ ቆንጭዳይሳዳ በን ዎደ አሳስ ሄሳዳ ቆንጭስቤና። 6 ፁራይ ሀይሳ: አይሁደ ግዶና አሳይ ዎንገላ ባጋራ እስራኤለታራ እስፈ ፆሳ አንጁዋ ላቶሶና። እስራኤለታራ እስ ኬꬃ አስ ግዶሶና፤ ክርስቶስ የሱሳ ባጋራ ፆሳ ኡፋይሳ ቃላ ኤኮሶና።

7 ፆሳይ ባ ኦꬅያ ዎልቃ ባጋራ ታዉ እምዳ አꬎ ኬሀተꬃን ሀ ዎንገላስ ኦሳንቾ ግዳስ። 8 ታኒ ጌሻታ ኡባፈ ላፋ ግድኮካ አይሁደ ግዶና አሳስ ዛው ባይና ክርስቶሳ ዱረተꬃ ዎንገላ ኦዳና መላ ሀ አꬎ ኬሀተꬃይ ታዉ እመትስ። 9 ቃስ ካሰ ዎድያን ኡባ መꬍዳ ፆሳን ቆሰትድ ደእያ ፁራስ፥ ፆሳ ቆፋይ አይበኮ ቆንጭሳናዉ አꬎ ኬሀተꬃይ ታዉ እመትስ። 10 ፆሳይ ሄሳ ኦꬅዳይ ሀእ ዎድያን ዎሳ ኬꬃ ባጋራ ሳሎን ደእያ ሀላቃታስነ ሃረይሳታስ ባ ዱማ ዱማ ቆንጨꬃ ኤርሳናሳ። 11 ፆሳይ ባ መርና ቆፋ ኑ ጎዳ ክርስቶስ የሱሳ ባጋራ ፖላናዉ ሄሳ ኦꬅስ። 12 ኑ አማኖን ያሽ ባይና ፆሳኮ ሺቃና መላ ክርስቶስ ኑስ ምኖተꬅነ ላአተꬅ እሚስ።

13 ታኒ ህንተ ግሾ ዋየ ኤክያ ግሾ፥ ህንተ ታ ዋያን ዬላቶናዳ ህንተና ዎሳይስ፤ ታኒ ህንተ ቦንቹዋስ ዋየታይስ።

14 ታኒ አዋ ስንꬃን ጉልባታዳ ዎሰይ ሄሳ ግሾሳ። 15 ሳሎንነ ሳአን ደእያ እስ እስ ሶ አሳይ እያን ሱንቴስ። 16 ፆሳይ ባ ቦንቾ ዱረተꬃፈ ህንተ ጋርሳ አሳተꬃ ምንꬅያ ዎልቃ ባ አያና ባጋራ እማና መላ ህንተዉ ዎሳይስ። 17 ቃስ አማኖን ክርስቶስ ህንተ ዎዛናን ዳና መላነ ህንተ ሲቆን ፃጶ የድድ ምንድ ዳና መላ ዎሳይስ። 18 ሄሳዳካ፥ ክርስቶሳ ሲቆይ አይ መላ ዳልገኮ፥ አዱሰኮ፥ ꬎቀኮነ ጪሞኮ ጌሻታ ኡባራ፥ ህንተ አኬካና ዎልቃ ደማና መላ ዎሳይስ። 19 ኤራተꬃፈ አꬍያ ክርስቶሳ ሲቁዋ ህንተ ኤራና መላ ቃስ ደኦ እምያ ፆሳ ዎልቃን ህንተ ኩማና መላ ታ ዎሳይስ።

20 ህዛ፥ ኑ ግዶን ኦꬅያ ባ ዎልቃ ባጋራ ኑኒ ዎሰይሳፈ ዎይኮ ቆፐይሳፈ አꬅድ ኦꬃናዉ ዳንዳእያ ፆሳስ፥ 21 ዎሳ ኬꬃንነ ክርስቶስ የሱሳን ዎደ ኡባን መርናፐ መርና ጋካናዉ ቦንቾይ ግዶ። አምንእ።