1 አራመ ካዋስ ምኖ ቶራ ሞጮና ግድዳ ንእማን፥ ባ ጎዳን ዳሮ ዶሰትዳነ ቦንቸትዳ አስ። እያ ባጋራ ጎዳይ አራመ ኦላንቾታስ ፆኖ እሚስ። ንእማኔይ ቶራ ቃራ፤ ሽን ጎጋ ሀርገይ እያ ቦላ ደኤስ።

2 እስ ዎደ አራመ ቢታፈ ፓኖት እስራኤለ ቢታ ብድ፥ እስ ማጫ ናአ እስራኤለፐ ድእዶሶና። ሄ ናእያ ንእማነ ማቼስ አይለ ግዳሱ። 3 ሄ ናእያ ባ ጎዳተኮ፥ “ታ ጎዳይ ሳማረን ደእያ ናብያኮ ብዳ ግድያኮ፥ እ ፓፃናሽን” ያጋሱ።

4 ንእማን ባ ጎዳኮ ብድ፥ እስራኤለፐ ይዳ ናእያ ግዳይሳ እያዉ ኦድስ። 5 አራመ ካዎይ ንእማነኮ፥ “ባ፥ ታኒ እስራኤለ ካዋስ ዳብዳበ ፃፋና” ያግስ። ንእማን 3,000 ብራ ሳንትመ፥ 6,000 ዎርቃ ሳንትመ ታሙ ኩመꬃ ማኦ ኤክድ ብስ። 6 እ፥ ኤክድ ብዳ ዳብዳበይ፥ “ሀ ጎጋ ሀርግያፈ ኔኒ ታ አይልያ፥ ንእማነ ፓꬃና መላ ሀ ዳብዳብያራ ታኒ እያ ኔኮ የዳስ” ያግስ።

7 እስራኤለ ካዎይ ዳብዳብያ ናባብዳ ዎደ፥ ባ ማኡዋ ዳክድ፥ “ታኒ እያ ዎꬋናዉነ ፓꬃናዉ ፆሰዬ? ታኒ እስ አስ እያ ጎጋ ሀርገፈ ፓꬃና መላ ሀ አደይ ታኮ አይስ ኪትዴ? እ ታራ ኦየታናዉ ጋሶ ኮየይሳ በእተ” ያግስ።

8 ፆሳ አስ ግድዳ ኤልስ እስራኤለ ካዎይ ባ ማኡዋ ዳክዳይሳ ስእዳ ዎደ አሰ ኪትድ፥ “ነ ማኡዋ አይስ ዳካዲ? እያ ሃ ታኮ የዳ፤ እስራኤለን ናበይ ደኤይሳ ታኒ እያ ኤርሳና” ያግስ።

9 ንእማን ባ ፓራታነ ፓራ ጋረታራ ብድ፥ ኤልሳ ካረን ኤቅስ። 10 ኤልስ፥ “ባዳ ዮርዳኖሰ ሻፋን ላፑን ቶሆ ሜጨታ፤ ነ ሀርግያፈ ኔኒ ፓፃናነ ጌያና” ያግድ ኦዳና መላ ባ አይልያ እያኮ ኪትስ።

11 ሽን ንእማን ሀንቀትድ፥ “እ ታኮ ይድ፥ ጎዳ ባ ፆሳ ሱንꬃ ፄግድ፥ ባ ኩሽያ ታ ማዱንꬃ ቦላ ዎꬅድ፥ ታና ሀ ጎጋ ሀርግያፈ ፓꬄስ ጋዳ ቆፓስ። 12 ዳማስቆ ሻፋት፥ አባንነ ፋርፋር እስራኤለን ደእያ ሻፋታፐ አꬎኮናዬ? ያትን ታኒ ኤንታን ሜጨታዳ ጌይክና?” ያግድ ሀንቀትድ፥ ጉየ ስምስ።

13 እያ አይለት እያኮ ሺቅድ፥ “ኑ ጎዳዉ፥ ናበይ ግታባ ኦꬃና መላ ነዉ ኦድዳኮ፥ ኔኒ ኦꬅክዬ? እ ነና፥ ‘ባዳ ሜጨታዳ ጌይያ’ ግዳይስ አይስ ዴፅዴ?” ያግዶሶና። 14 እ ዱገ ዎꬍድ፥ ፆሳ አደይ እያዉ ኦድዳይሳዳ ዮርዳኖሰ ሻፋን ላፑን ቶሆ ሙከትድ ሜጨትስ። እያ አሳተꬃይ ናአ አሳተꬃዳ ሀንስ፤ ፓፅድ ጌይስ።

15 ሄሳፈ ጉየ፥ ንእማንነ እያራ ይዳ አሳ ኡባይ ኤልሳኮ ጉየ ብዶሶና። ንእማን እያ ስንꬃን ኤቅድ፥ “ሄኮ፥ እስራኤለ ፆሳፈ አትሽን፥ ሀራ ፆሲ ባይናይሳ ታኒ ሀእ ኤራስ። ሀያና ሀእ ታኒ፥ ነ አይለይ እምያ እሞታ ኤካ” ያግስ።

16 ኤልስ፥ “ታኒ እያዉ ኦꬅያ ጎዳይ ኤርያ መላ፥ ታኒ ኔፐ አይባካ ኤክከ” ያግስ። ኤልስ እሞታ ኤካናዳ ንእማን ዎስን እፅስ።

17 ንእማን፥ “ኔኒ ኤኮና እፅኮ፥ ታዉ ናምኡ ባቁሎ ጫና ቢታ እማና መላ ታኒ ነና ዎሳይስ። ታኒ ነ አይለይ ሀችፈ ዶማዳ ፁሳ ያርሾ ነ ፆሳ ያርሻናፐ አትሽን፥ ሀራ ፆሳታስ ያርሽከ። 18 ሽን ጎዳይ ታዉ ነ አይልያስ እስባ አቶ ጎ። ታ ካዎይ እርሞና ኤቃ ጎይናናዉ ገልያ ዎደ፥ ታንካ እያ አጃባዳ ገላዳ ጎይናናዉ ኮሼስ። ጎዳይ ታዉ ነ አይልያስ ሄሳ አቶ ጎ” ያግስ።

19 ኤልስ፥ “ሳሮ ጋካ!” ያግስ። ንእማን ደንድድ ብስ።

እ ጉꬁ ሃክድ ብሽን፥ 20 ፆሳ አስ ግድዳ ኤልሳ አይለይ ግያዝ፥ “ታ ጎዳይ፥ ኤልስ ሶረ ንእማን ኤህዳባፐ አይባካ ኤኮና ጮ የድስ። ጎዳይ ኤርያ መላ፥ ታኒ እያ ጌዶ ዎፃ ባዳ፥ እያፐ እስባ ኤካና” ያግድ ቆፕስ። 21 ሄሳ ግሾ፥ ግያዝ ንእማነ ካልስ። ባ ጌዶ ዎፅያ ንእማነ በእድ፥ እያራ ጋሄታናዉ ፓራ ጋርያፐ ዎꬍድ፥ “አይበ፥ ሳሮ ግደኔ?” ያግድ ኦይችስ።

22 ግያዝ፥ “አይኮይ ባዋ፤ ሳሮ! ሽን ታና ታ ጎዳይ፥ ‘ደረይ ዳርያ ኤፍሬማ ቢታፈ ናበታ ባጋ ግድዳ ናምኡ ፓንꬃት ታኮ ይዶሶና። ሀያና ኤንታዉ ሄꬑ ሙኩሉ ብራ ሳንትመነ ናምኡ ኩመꬃ ማኦ እማ’ ያግድ ኪትስ” ያግስ።

23 ንእማን፥ “ህዛ ሀያና ኡሱፑን ሙኩሉ ብራ ሳንትመ ኤካ” ያግስ። ንእማን ግያዛ ሾቢድ፥ ብራ ናምኡ ካርፂታን የግድ፥ ናምኡ ኩመꬃ ማኦነ ናምኡ አይለታ ቶስድ፥ ግያዛፐ ስን የድስ። 24 ግያዝ ደእያ ዙማ ኤንቲ ጋክዳ ዎደ፥ ብራነ ማኡዋ ኤንታፈ ኤክድ፥ ሶ ገልስስ። ያትድ ኤንታ ሞይዝን፥ ኤንቲ ብዶሶና።

25 ሄሳፈ ጉየ፥ ሶ ገልድ፥ ባ ጎዳ ኤልሳ ስንꬃን ኤቅስ። ኤልስ፥ “አዉ ባዲ?” ያግድ ኦይችስ።

ግያዝ፥ “ታኒ ነ አይለይ አዉካ ባብከ” ያግድ ዛርስ።

26 ሽን ኤልስ፥ “አደይ ኔራ ጋሄታናዉ ፓራ ጋርያፐ ዎꬍያ ዎደ፥ ታ አያናይ ኔራ ደኤስ ግደኔ? ሀ ዎደይ፥ ሚሸነ ማኦ፥ ዎይኮ ሻማሆነ ዎይነ ጋደ፥ ዎይኮ ዶርሳ ዉደነ ሚዛ ዉደ፥ ዎይኮ አደነ ማጫ አይለ ኤክያ ዎዴ? 27 ሄሳ ግሾ፥ ንእማነ ኦይክዳ ጎጋ ሀርገይ ነናነ ነ ኮቻ ኡባ መርናዉ ኦይካና” ያግስ። ግያዝ ኤልሳ ስንꬃፈ ከይድ ብሽን፥ ሄ ሀርገይ እያ ኦይክን፥ እያ ጎጋይ ሻቻዳ ቦፅስ።