1 ናበታ ጩጋይ፥ ኤልሳኮ፥ “ሄኮ፥ ኑኒ ደእያ በሳይ ኑስ ዳሮ ፁምስ። 2 ኑኒ ኡባይ ምꬅ ቃንፃናዉ ዮርዳኖሰ ሻፋ ቦስ። ያን ኑስ ዱሳ በሲ ኬፆስ” ያግዶሶና። ኤልስ፥ “ቢተ” ያግስ።

3 ናበታፐ እሶይ፥ “ሀያና ኔንካ ኑራ ነ አይለታራ የꬋርኪ?” ያግስ። ኤልስ፥ “ኤሮ ባና” ያግድ ዛርስ፤ 4 ኤንታራ እስፈ ብስ። ኤንቲ ዮርዳኖሰ ጋክዳ ዎደ ምꬅ ቃንፆ ዶምዶሶና። 5 ሽን ኤንታፈ እሶይ ምꬅ ቃንፅሽን፥ ቤፅያ አይፈይ ከስ ኤክድ፥ ሃꬃን ዎꬍስ። ሄ አደይ፥ “ታ ጎዳዉ፥ ታኒ ጋርፃ ኤክዳ ቤፀ፤ ታኒ ህዛ ዋኖ!” ያግድ ዋስስ።

6 ኤልስ፥ “አዉን ገልዴ?” ያግድ ኦይችስ፤ አደይ ገልዳ በሳ በስስ። ኤልስ ፃምአ ቃንፅድ፥ ሃꬃን ሆልስ፤ ቤፅያ አይፈይ ሃꬃ ቦላ ቶከትስ። 7 ኤልስ አድያ፥ “ከሳዳ ኤካ” ያግስ። አደይ ባ ኩሽያ የድድ ኤክስ።

8 አራመ ካዎይ እስራኤለታራ ኦለትሸ ደኤስ። እ ባ ቶራ ሞጮናታራ፥ “ታኒ ዱማ ዱማ በሳን ሚፃ መꬋና” ያግስ።

9 ኤልስ፥ “አራመ አሳይ ሄ በሳን ቆሰትዳ ግሾ፥ ሄ በሳራ ያ ቦፓ” ያግድ እስራኤለ ካዋስ ኪታ የድስ። 10 ሄሳ ግሾ፥ እስራኤለ ካዎይ ፆሳ አስ ማልዳ በሳ አሰ ኪትድ፥ ያን ደእያ አሳይ ናገታና መላ ኦድስ። ካዎይ ናገታና መላ ኤልስ ዎደን ዎደን ኦዴስ።

11 ሀ ሀኖታይ አራመ ካዋ ዳሮ ሀንቀꬅን፥ ባ ቶራ ሞጮናታ ፄግድ፥ “ኑ ግዶን እስራኤለ ካዋ ባጋ ግድድ ደኤይ ኦነኮ አነ ታዉ ኦድተ” ያግድ ኦይችስ።

12 እያ ቶራ ሞጮናታፐ እሶይ፥ “ታ ጎዳዉ፥ ካዋዉ፥ ኑ ግዶን ሄሳ ኦꬅያ ኦንካ ባዋ። ሽን ኔኒ ነ ቆልአን ኦደትያባ ኡባ እስራኤለን ደእያ ናበይ ኤልስ እስራኤለ ካዋስ ኦዴስ” ያግስ።

13 ካዎይ፥ “ታኒ አሰ ኪታዳ እያ ድአና መላ ብድ አዉን ደእያኮ ኮይተ” ያግስ። ኤንቲ፥ “ሄኮ፥ እ፥ ዶታነን ደኤስ” ያግድ ኦድዶሶና።

14 ካዎይ ዳሮ ኦላንቾታ ፓራታራነ ፓራ ጋረታራ ያ የድስ። እ የድዳ አሳት ቃማ ይድ፥ ካታማ ተቅዶሶና። 15 ኤልሳ አይለይ ዎንተꬃ ጋላስ ጉራ ደንድድ፥ ካረ ከይያ ዎደ፥ ኦላንቾት ፓራታራነ ፓራ ጋረታራ ካታማ ተቅዶሶና። ሄ አይለይ፥ “ሄኮ፥ ኑኒ ꬋይዳ! ታ ጎዳዉ፥ ኑ ዋንኖ?” ያግድ ኦይችስ።

16 ኤልስ፥ “ያዮፋ! ኑራ ደኤይሳት ኤንታራ ደኤይሳታፐ አꬎሶና” ያግድ ዛርስ።

17 ሄሳፈ ጉየ፥ ኤልስ፥ “አቤት ጎዳዉ፥ እ በአና መላ እያ አይፍያ ዶያ” ያግድ ዎስስ። ጎዳይ ኤልሳ አይልያ አይፍያ ዶይን፥ ሄኮ፥ ኤልሳ ዩሾ ኡባን ደእያ ታማ ፓራትነ ፓራ ጋረት ዙማ ማእስ።

18 ሶረት እያ ተቅዳ ዎደ ኤልስ፥ “ሀ አሳታ አይፍያ ቆቅሳርክ” ያግድ ጎዳ ዎስስ። ኤልስ ዎስዳይሳዳ ጎዳይ ኤንታ አይፍያ ቆቅስስ። 19 ሄሳፈ ጉየ፥ ኤልስ፥ “ኦገይ ሀይሳራ ዴና፤ ካታማይ ሀይሳ ግደና። ህንተ ኮይያ ኡራ ታ ህንተና በሳና፤ ታና ካልተ” ያግድ፥ ኤንታ ካለꬅድ፥ ሳማረ ካታማ ኤፍስ።

20 ኤንቲ ሳማረ ካታማ ገልዳ ዎደ ኤልስ፥ “አቤት ጎዳዉ፥ ሀ አሳት ፄላና መላ ኤንታ አይፍያ ዶያ” ያግስ። ጎዳይ ኤንታ አይፍያ ዶይን፥ ሄኮ፥ ኤንቲ ሳማረ ግዶን ደኤይሳ በእዶሶና። 21 እስራኤለ ካዎይ ኤንታ በእዳ ዎደ፥ “ታ አዋዉ፥ ታኒ ኤንታ ዎꬎ? ታኒ ኤንታ ዎꬎ?” ያግድ ኦይችስ።

22 ኤልስ፥ “አካይ፥ ዎꬎፓ! ሀር አቶሽን፥ ኔኒ ነ ማሻንነ ነ ዶንግያን ድእዳይሳታካ ዎꬋናዉ በሰና። ኤንቲ ምድ ኡይድ ባንታ ጎዳኮ ባና መላ ካꬅ ኤንታ ሙዛ” ያግስ። 23 ሄሳ ግሾ፥ እስራኤለ ካዎይ ኤንታዉ ግብራ ጊግስን፥ ኤንቲ ምዳፐነ ኡይዳፐ ጉየ፥ ኤንታ የድን፥ ባንታ ጎዳኮ ስምዶሶና። ሄ ዎደፐ ዶምን፥ አራመት እስራኤለታ ቦላ ደንደይሳ አጋግዶሶና።

24 ሄሳፈ ጉየ፥ አራመ ካዎይ ዎልደ-አዳር ባ ኦላንቾታ ኡባ ሺሽድ፥ ሳማረ ካታማ ተቅስ። 25 ሄሳ ጋሶን ሳማረ ካታማን ግታ ኮሽ ገልን፥ እስ ሀረ ሁጰይ ሆስፑን ታሙ ብራ ሳንትመን፥ ናምኡ ፄቱ ግራመ ግድያ ሆለ ሽእ እቻሹ ብራ ሳንትመን ባይዘትስ።

26 እስራኤለ ካዎይ ካታማ ድርሳ ግምብያ ቦላራ አꬍሽን፥ እስ ማጫስያ፥ “ታ ጎዳዉ፥ ካዋዉ፥ ታና ማዳርክ” ያጋዳ ዋሳሱ።

27 ካዎይ፥ “ነና ጎዳይ ማዶና እፅኮ፥ ታኒ ነዉ ማዶ አዉፐ ኤሀኔ? ካꬃ ቡክያ ዉዱማፈየ፥ ዎይነ አይፍያ ጉምእያ በሳፌ?” ያግስ። 28 ካዎይ፥ “ነ መቶይ አይቤ?” ያግድ ኦይችስ።

ማጫስያ ዛራዳ፥ “ሀ ማጫስያ፥ ‘ሀች ማናዉ ነ ናአ ኤካዳ ያ፤ ቃስ ዎንቶ ታ ናኣ ማና’ ያጋሱ። 29 ያትን፥ ታ ናኣ ካꬅድ ምዳ፤ ዎንተꬃ ጋላስ ታኒ፥ ‘ኑኒ ማናዉ ነ ናኣ ኤካዳ ያ’ ያጋስ። ሽን እያ ባ ናኣ ቆሳሱ” ያጋሱ።

30 ካዎይ ማጫስያ ኦድዳይሳ ስእድ፥ ባ ማኡዋ ዳክስ። እ ግምብያ ቦላራ አꬍሽን፥ አሳይ ጋርሳ ባጋራ እ ማእዳ ካዮ ማኡዋ በእዶሶና። 31 ካዎይ፥ “ሳፋፃ ናኣ ኤልሳ ጉገይ እያ ቦላ ሀች ፔእኮ፥ ፆሲ ታና ፕርዶ!” ያግስ።

32 ሄ ዎደ ኤልስ ባ ሶን ኡትስ፤ ጭማትካ እያራ እስፈ ደኦሶና። ካዎይ ባፐ ስን አሰ ኪትስ፤ ሽን ሄ አደይ ጋካናፐ ስን፥ ኤልስ ጭማታኮ፥ “ሀ ሸምፖ ዎይስ ታ ቆꬍያ ሙጭሳናዉ አሰ ኪትዳይሳ ህንተ በኤቲ? ሄ ኪተትዳይስ ይዳ ዎደ እብ ጎርድድ ገልሶፍተ፤ እያ ጎዳይካ እያ ካልድ ይሸ ደኤስ” ያግስ። 33 እ ጭማታራ ኦደትሽን፥ ሄኮ፥ ኪተትዳይስ ጋክ ዎꬍስ፤ እ፥ “ሀ መቶይ ጎዳፐ ይስ። ያትን፥ ታኒ ጎዳ አይስ ናግያና?” ያግስ።