1 ኤልስ፥ “ጎዳ ቃላ ስአ! ጎዳይ ሀይሳዳ ያጌስ። ዎንቶ ሀኖደ ሄꬑ ክሎ ግራመ ግስተ ꬊለይ ዎይኮ ኡሱፑን ክሎ ግራመ ባንግ ሳማረ ካታማ ፐንገን እስ ብራ ሳንትመን ባይዘታና” ያግስ። 2 ካዋስ ማታትያ ሀላቃይ ፆሳ አድያኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ሽን ኤልስ ዛሪድ፥ “ኔኒ ሄሳ ነ አይፍያን በአና፤ ሽን እያፐ ማካ” ያግስ።

3 ካታማ ገልያ ፐንግያን ግታ ጎጋ ሀርገይ ኦይክዳ ኦይዱ አሳት ደኦሶና። ኤንቲ እሶይ እሱዋኮ፥ “ኑኒ ሀይቃና ጋካናዉ፥ ሀይሳን አይስ ጋምአኔ? 4 ኑኒ ካታማ ገልኮ፥ ኮሽ ደእያ ግሾ፥ ኑኒ ያን ሀይቃና። ቃስ ሀይሳን ጋምእኮካ ሀይቃና። ሄሳ ግሾ፥ አራመታ ሚፃ አነ ቦስ። ኤንቲ ኑና አሽኮ አታና፤ ኤንቲ ዎꬍኮ ሀይቃና” ያግዶሶና። 5 ሳእ ꬉምያ ዎደ ደንድድ፥ አራመታ ሚፃ ብዶሶና። ኤንቲ ብድ ሚፃ ጋክያ ዎደ፥ ሄኮ፥ እስ አስካ ያን ባዋ። 6 ሄስ ሀንዳይ፥ ጎዳይ ፓራ ጋረታ፥ ፓራታነ ዳሮ ኦላንቾታ ቃላ አራመ አሳ ስስስ። ያትን ኤንቲ እሶይ እሱዋኮ፥ “ሄኮ፥ እስራኤለ ካዎይ ኑና ኦልሳናዉ፥ ህተነ ግብፀ ካዎታ ኡነይድ ኤህስ” ያግዶሶና። 7 ሄሳ ግሾ፥ ኤንቲ ደንድድ፥ ባንታ ሚፃ፥ ባንታ ዱንካንያ፥ ባንታ ፓራታነ ባንታ ሀረታ ኩመꬅ የግ አግድ፥ ሳእ ꬉማ ደእሽን፥ ባንታ ሸምፑዋ አሻናዉ ባቃትዶሶና።

8 ሄ ግታ ጎጋ ሀርገይ ኦይክዳ አሳት አራመታ ሚፃ ጋክድ፥ ኤንታ ዱንካነታፐ እሱዋ ገልድ፥ ምዶሶናነ ኡይዶሶና፤ ብራ፥ ዎርቃነ ማኦ ኤክድ ቆትዶሶና። ናምአንꬆ ስሚድ፥ ሀራ ዱንካንያ፥ ገልድ እያፐ ኤክዳይሳ ቆትዶሶና።

9 ሄሳፈ ጉየ፥ ኤንቲ እሶይ እሱዋ፥ “ኑኒ ሎኦባ ኦꬅቦኮ። ሀች ምሽራቾ ጋላስ፤ ሽን ኑኒ ስእ ግዳ። ሳእ ዎንታና ጋካናዉ፥ ስእ ግድ ኡትኮ፥ ኑኒ ሴረታና። አነ፥ ሀእ ብድ፥ ካዎ ጋꬎን ደእያ አሳስ ኦዳና” ያግዶሶና። 10 ሄሳ ግሾ፥ ኤንቲ ብድ፥ ካታማ ፐንግያ ናገይሳታ ፄግድ፥ “ኑኒ አራመ ሚፃ ብዳ፤ ሽን፥ ሄኮ፥ እስ አስ ዎይኮ አሳ ግርስ ሄ በሳን ባዋ። ቃሸትዳ ፓራታ ፃላልነ ሀረት ደኦሶና፤ ቃስ ኤንቲ አግድ ብዳ ዱንካነት ደኦሶና” ያግዶሶና። 11 ፐንግያ ናገይሳት ፄግድ፥ ካዎ ጋꬎን ደእያ አሳስ ኦድዶሶና። 12 ካዎይ ቃማ ደንድድ፥ “አራመት ኑና ኦꬅዳባ ታኒ ህንተዉ ኦዳና። ኑኒ ኮሻትዳይሳ ኤንቲ ኤሮሶና። ሄሳ ግሾ፥ ባንታ ሄራፐ ከይድ፥ ጋፃርያን ቆሰትድ፥ ኤንቲ ካታማፐ ካረ ከይን፥ ኑኒ ኤንታ ፓፃ ኦይክድ፥ ካታማ ገላና ያግድ ቆፕዶሶና” ያግድ ባ ሹማታስ ኦድስ።

13 ካዋ ሀላቃታፐ እሶይ፥ “ሀ ካታማን አትዳ አሳይ ካሰ ሀይቅዳ አሳ መላ ሀይቆፐ አተና። ሄሳ ግሾ፥ ሀንዳባ ኤራናዉ አነ አሳ ዶሮስ። አትዳ እቻሹ ፓራታራ አነ ኤንታ ሶረታ ሚፃ የዶስ” ያግስ። 14 ጉꬃ አሳታነ ናምኡ ፓራ ጋረታ ዶርዶሶና። ካዎይ ኤንታ ሶረ ኦላንቾታ ጌዶ የድድ፥ “ብድ ሀንያባ በእተ” ያግድ ኪትስ። 15 አሳት ኤንታ ጌዶ ካልድ፥ ዮርዳኖሰ ሻፋ ጋካናዉ ብዶሶና። አራመ አሳት ባቃትሸ የግዳ ማኦይነ ኦላ ሚሸይ ኦግያን ኩምስ። ኪተትዳ አሳት ጉየ ስሚድ፥ ካዋስ ኦድዶሶና።

16 አሳይ ብድ፥ አራመታ ሚፃ ቦንቅዶሶና። ጎዳይ ግዳይሳዳ ሄꬑ ክሎ ግራመ ግስተ ꬊለይ ዎይኮ ኡሱፑን ክሎ ግራመ ባንግ እስ ብራ ሳንትመን ባይዘትስ። 17 ካዎይ ባዉ ማትያ ሀላቃ ፐንገ ናገይሳታ ሀላቃ ኦꬅድ ሹምስ፤ ሽን አሳይ እያ ፐንገን የꬍስ። ካዎይ ኤልሳኮ ብዳ ዎደ፥ ኤልስ ሀ ሀላቃ ቦላ ኦድዳይሳዳ አደይ ሀይቅስ። 18 ፆሳ አስ ግድዳ ኤልስ ካሰ ካዋስ፥ “ዎንቶ ሀኖደ ሄꬑ ክሎ ግራመ ግስተ ꬊለይ ዎይኮ ኡሱፑን ክሎ ግራመ ባንግ ሳማረ ካታማን እስ ብራ ሳንትመን ባይዘታና” ያግስ።

19 ሄ ዎደ ሀላቃይ ኤልሳኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ኤልስ፥ “ሄኮ፥ ኔኒ ሄሳ ነ አይፈን በአና፤ ሽን እያፐ ማካ” ያግድ ዛርስ። 20 ኤልስ ኦድዳይሳዳ፥ ሄ አደይ፥ አሳይ ፐንገን የꬍን ሀይቅስ።