8
ሱናማ ማጫስዉ
1 ኤልስ፥ ሀይቅዳ እ ናኣ ፓꬅዳ ማጫስዉ፥ “ነ ሶ አሳ ኤካዳ ሀይሳፈ ባዳ ኔኒ ዳንዳእያ በሳን አዉንካ ደአ። ጎዳይ ላፑን ላይꬃ ኮሻ ሀ ቢታ ቦላ የድስ” ያግስ። 2 ማጫስያ ኤልስ ኦድዳይሳዳ ባ ሶ አሳራ ባዳ፥ ፍልስፄመ ቢታን ላፑን ላይꬅ ደአሱ። 3 ላፑንꬃ ላይꬃ ዉርሰꬃን ማጫስያ ፍልስፄመ ቢታፈ ስማሱ። ባ ኬꬃነ ባ ጋድያ ኦይቻናዉ ካዋኮ ባሱ።
4 ሄ ዎደ ካዎይ ፆሳ አስ ግድዳ ኤልሳ አይልያ ግያዛራ ኦደትሸ፥ “ኤልስ ኦꬅዳ ግታ ኦሶ ኡባ አነ ታዉ ኦዳ” ያግስ። 5 ኤልስ ሀይቅዳ ናኣ ዋትድ ፓꬅዳኮ፥ ግያዝ ካዋስ ኦድሽን፥ ሄኮ፥ ኤልስ እ ናኣ ፓꬅዳ ማጫስያ ባ ኬꬃነ ባ ጋድያ ኦይቻናዉ ያሱ። ግያዝ፥ “ታ ጎዳዉ፥ ካዋዉ፥ ማጫስያ ሀናሹ፤ ኤልስ ሀይቆፐ ፓꬅዳ እ ናአይካ ሀይስሽ” ያግስ። 6 ካዎይ ማጫስዉ ኦይችን፥ እያዉ ኦዳሱ። ሄሳ ግሾ፥ ካዎይ ሀላቃ ፄግድ፥ “ሀ ማጫሴባ ግድዳ ኡባነ እያ አጋ ብዳ ዎድያፐ ሀች ጋካናዉ እ ጋደን ሞክዳ ኡባ እዉ ዛራ” ያግድ ኪትስ።
7 ኤልስ ዳማስቆ ካታማ ብድ ጋክያ ዎደ፥ ሶረ ካዎይ ዎልደ-አዳር ሳከቴስ። እ፥ “ፆሳ አስ ሀይሳ ይስ” ግያ ዎረ ስእስ።
8 ካዎይ አዛሄላኮ፥ “እምያባ ኤካዳ ፆሳ አድያራ ጋሄታናዉ ባዳ፥ ‘ታኒ ሀ ሀርግያፈ ፓፃኔ?’ ያጋዳ ጎዳ ኦይቻ” ያግስ።
9 ሄሳ ግሾ፥ አዛሄል ዳማስቆን ደእያ ዱማ ዱማ ቆሞ ሙሩታፐ ኦይታሙ ግማለን ጫንድ፥ ኤልሳራ ጋሄታናዉ ብስ። ኤልሳ ስንꬃን ኤቅድ፥ “ነ ናአይ አራመ ካዎይ ዎልደ-አዳር፥ ‘ታኒ ሀ ሀርግያፈ ፓፃኔ?’ ያግድ፥ ነና ኦይቻናዳ ታና ኔኮ ኪትስ” ያግስ።
10 ኤልስ አዛሄላኮ፥ “ኔኒ ባዳ እያኮ፥ ‘ቱማ ኔኒ ፓፃና’ ያጋ። ሽን እ ቱማ ሀይቃናይሳ ታና ጎዳይ በስስ” ያግስ። 11 አዛሄል ዬላታና ጋካናዉ፥ ኤልስ እያ ትሽ ኦꬅድ ፄልድ ዬክስ።
12 ያትን፥ አዛሄል፥ “ታ ጎዳይ አይስ ዬኪ?” ያግድ ኦይችስ።
ኤልስ፥ “ኔኒ እስራኤለ አሳ ቦላ ኦꬃና ኢታባ ታኒ ኤርያ ግሾ ዬካይስ። ኤንታ ሚፃ ኔኒ ታማን ፁጋና፤ ኤንታ ፓንꬃታ ኔኒ ማሻን ዎꬋና። ቃስ ኤንታ ዮጋ ናይታካ ኔኒ ሹቻን መንረꬃና፤ ኤንታ ቃንꬃ ማጫሳታ ኡሉዋ ኔኒ ዳካና” ያግድ ዛርስ።
13 አዛሄል ዛሪድ፥ “ታኒ ነ አይለይ፥ ፓና ካናይ፥ ሀይሳ መላ ግታባ ዋታዳ ኦꬃናዉ ዳንዳእያና?” ያግስ። ኤልስ ዛሪድ፥ “ኔኒ አራመ ቢታን ካዎታናይሳ ታና ጎዳይ በስስ” ያግስ።
14 ሄሳፈ ጉየ፥ አዛሄል ኤልሳፈ ሻከትድ፥ ባ ጎዳኮ ስምስ። ዎልደ-አዳር፥ “ኤልስ ነና ዎይግዴ?” ያግድ ኦይችስ። አዛሄል፥ “ኔኒ ቱማ ፓፃና” ያግስ።
15 ሽን ዎንተꬃ ጋላስ አዛሄል ቡሉኮ ኤክድ፥ ሃꬃን ሙክድ፥ ካዋ እያራ ቱጭን፥ ካዎይ ሀይቅስ። አዛሄል እያ በሳን ባዉ ካዎትስ።
ይሁዳ ካዋ እዮራማ
(2 ታር 21:1-20)
16 አካባ ናአይ፥ እስራኤለ ካዎይ እዮራም ካዎትዳ እቻሻንꬆ ላይꬃን፥ ይሁዳ ካዋ እዮሳፈፃ ናአይ እዮራም ይሁዳን ካዎትስ። 17 እዮራም ካዎትያ ዎደ እያዉ ላይꬃይ ሀስታማነ ናምአ፤ እ የሩሳላመን ሆስፑን ላይꬅ ካዎትስ። 18 እዮራም አካባ ናእዉ ማቾ ኤክዳ ግሾ፥ አካባ ሶ አሳይ ሄመትዳይሳዳ ካሰ እስራኤለ ካዎታ ኦግያን ሄመትስ፤ ጎዳ ስንꬃን ኢታባ ኦꬅስ። 19 ግዶሽን፥ ባ አይልያ ዳዊታ ግሾ፥ ጎዳይ ይሁዳ ꬋይሳናዉ ኮይቤና፤ ዳዊታ ኮቻይ መርናዉ ካዎታናዉ ደኤይሳ ጎዳይ ኡፋይሳ ቃላ እሚስ።
20 እዮራም ካዎትዳ ዎደ፥ ኤዶመ አሳይ ይሁዳ ካዋ ቦላ ማካልድ፥ ባንታዉ ካዎ ካዎይዶሶና። 21 ሄሳ ግሾ፥ እዮራም ባ ፓራ ጋረታ ኡባራ ፃእራ ጌተትያ በሳ ብስ። ኤዶመ አሳት እያነ እያ ፓራ ጋረታ ሀላቃታ ተቅዶሶና፤ ሽን እዮራም ቃማ ደንድድ፥ ከስ ኤክድ ብስ። እያ ኦላንቾት ባቃትድ፥ ጉየ ሶ ስምዶሶና። 22 ሄ ዎደፐ ዶምድ ሀች ጋካናዉ፥ ኤዶመ አሳይ ይሁዳ አሳስ ሃረትቦኮና። ልብና አሳይ ቃስ ሄ ዎደ ማካልስ።
23 እዮራም ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ። 24 እዮራም ሀይቅድ፥ ባ ማይዛታን ጋሄትስ። ባ ማይዛ ዳዊታ ካታማን ሞገትስ፤ እያ በሳን እያ ናአይ አካዝያስ ካዎትስ።
ይሁዳ ካዋ አካዝያሳ
(2 ታር 22:1-6)
25 አካባ ናአይ፥ እስራኤለ ካዎይ እዮራም ካዎትዳ ታማነ ናምአንꬆ ላይꬃን፥ ይሁዳ ካዋ፥ እዮራማ ናአይ አካዝያስ ይሁዳን ካዎትስ። 26 አካዝያስ ካዎትዳ ዎደ፥ እያዉ ላይꬅ ላታማነ ናምአ፤ እ የሩሳላመን እስ ላይꬅ ካዎትስ። እያ አየ ሱንꬃይ ጎቶሎ፤ እያ እስራኤለ ካዋ ኦምራ ናኣ ናእዉ። 27 እ ኤንታዉ ቦሎ ግድዳ ግሾ፥ አካባ ሶ አሳ ኦግያን ሄመትስ፤ አካባ ሶ አሳይ ኦꬅዳይሳዳ፥ እ ጎዳ ስንꬃን ኢታባ ኦꬅስ።
28 አካዝያስ አራመ ካዋ አዛሄላራ ጋላዳን ደእያ ራሞታ ካታማን ኦለታናዉ ብድ፥ አካባ ናኣ እዮራማራ እስፈ ብን፥ አራመ አሳት እዮራማ ጫድዶሶና። 29 እዮራም አራመ ካዋ አዛሄላራ ኦለትያ ዎደ፥ አራመ አሳት ጫድዳ ጫቻፈ ፓፃናዉ እዝራኤለ ስምስ። እዮራማ ናአይ፥ ይሁዳ ካዎይ አካዝያስ፥ ጫደትዳ አካባ ናኣ እዮራማ ኦይቻናዉ ዱገ እዝራኤለ ብስ።