1 አካዝያሳ አይያ ጎቶላ ባ ናአይ ሀይቅዳይሳ በእዳ ዎደ፥ ደንዳዳ ካዋ ኮቻ ኡባ ꬋይሳሱ። 2 ሽን ካዋ እዮራማ ናእያ፥ አካዝያሳ ምችያ ዮሳቤታ፥ ሀይቃናዉ ደእያ ካዋ ናይታ ግዶፈ አካዝያሳ ናኣ እዮኣሳ ካይሳዳ ኤካሱ። እያነ እያ ድችያሮ ኤፋዳ ኬꬃን ቆሳዳ፥ ጎቶላ ዎꬎናዳ አሻሱ። 3 ጎቶላ ቢታ ሃርያ ዎደ ኡባን፥ ናአይ ዮሳቤት ማታን፥ ፆሳ ኬꬃን ኡሱፑን ላይꬅ ቆሰትድ ደእስ።

4 ላፑንꬃ ላይꬃን ዮዳሄይ ካዋ ናገይሳታነ ካዎ ጋꬎ ናገይሳታ ሀላቃታስ ኪትድ፥ ባኮ ፆሳ ኬꬅ ኤህስ። ኤንታራ ጫቅድ፥ ኤንታ ፆሳ ኬꬃን ጫቅስስ፤ ኤንታ ካዋ ናኣ እዮኣሳ በስስ። 5 እ ኤንታ፥ “ህንተ ኦꬃናባይ ሀይሳ፤ ሳምባታን ናጋናዉ ገልያ ማራይ ጋክዳ ህንተ ሄꬑ ጩጋፐ እስ ጩጋ ካዋ ኬꬃ ናጎ። 6 እስ ጩጋይ ሱራ ፐንግያ ናጎ፤ እስ ጩጋ ናገይሳታፐ ጉየ ባጋራ ደእያ ፐንግያ ናጎ። 7 ሳምባታ ጋላስ ናጎፐ ከይያ ሀንኮ ናምኡ ጩጋይ ኩመꬅ ካዋ ቦላ መቶይ ጋኮና መላ ፆሳ ኬꬃ ናጎ። 8 ኦላ ሚሸ ኦይክድ፥ ካዋ ግዶን ዎꬅድ፥ ካዎይ ከይያ ዎደነ ገልያ ዎደ ኡባን እያራ እስፈ ደኦ። ህንተኮ ሺቅያ ኦናካ ዎꬍተ” ያግስ።

9 ሄ ሀላቃት፥ ካህነይ ዮዳሄ ኪትዳባ ኡባ ኦꬅዶሶና። ኤንቲ ኡባይ ሳምባታ ጋላሳን ናጎ ማራይ ጋክዳይሳታነ ናጉዋ ማራ ፖልዳይሳታ ኤክድ፥ ካህንያ ዮዳሄኮ ይዶሶና። 10 ካህነይ ፆሳ ኬꬃን ደእያ፥ በን ካዋ ዳዊታ ጎንዳለታነ ቶራታ ኡባ ሀላቃታስ እሚስ። 11 ናገይሳት እሶይ እሶይ ኦላ ሚሸታ ባንታ ኩሸን ኦይክድ፥ ፆሳ ኬꬃፈ ሀድርሳ ባጋፈ ዶምድ፥ ኡሻቻ ባጋ ጋካናዉ፥ ያርሾ በሳ ማታንነ ፆሳ ኬꬃ ማታን ካዋ ዩሹዋን ኤቅዶሶና። 12 ዮዳሄይ ካዋ ናኣ ካረ ከስድ፥ እያ ሁጰን ካላቻ ዎꬅስ። ህገ ማፃፋ እያዉ እምድ፥ ትይድ፥ እያ ካዎꬅስ። አሳይ ኩሸ ባቅድ፥ ባ ቃላ ꬎቁ ኦꬅድ፥ “ካዎይ ብራታ ቱሱ ግዶ!” ያግስ።

13 ካውያ ጎቶላ ናገይሳታ ዎጫማነ አሳ ዎጫማ ስእዳ ዎደ፥ አሳኮ ፆሳ ኬꬅ ባሱ። 14 ካዎይ ካሰ ካዎት ሀነይሳዳ ቱሳ ማታን ኤቅድይሳ በአሱ። ሀላቃትነ ሞይዘ ፑነይሳት ካዋ ማታን ደኦሶና። ሄ ቢታ አሳ ኡባይ ኡፋይትድ፥ ሞይዘ ፑንን፥ ጎቶላ ባ ማኡዋ ዳካዳ፥ “ሄኮ፥ ሀይስ ማካላ! ሀይስ ማካላ!” ያጋዳ ዋሳሱ። 2 ካዎ 23:3.

15 ካህነይ ዮዳሄይ ቶራ ሞጮናታኮ፥ “ጎቶሎ ፆሳ ኬꬃን ዎꬎፕተ! ኢፐ ያራነ ሃራ ሳልፕዳ ሳልፐታ ግዶን ዎꬅተ፤ እዮ አሻናዉ ቆፕያ አስ ደእኮ ዎꬍተ!” ያግስ። 16 ኤንቲ እዮ ኦይክድ፥ ካዎ ጋꬎ ኤፍድ፥ ፓራ ፐንግያን እዮ ዎꬍዶሶና።

17 አሳይ ጎዳ አስ ግዳና መላ፥ ካዎይ ዮዳሄይነ አሳይ ጎዳራ ጫቃና መላ ኦꬅስ። ቃስ ካዋፐነ አሳፐ ግዱዋን ጫቅስስ። 18 ሄ ዎደ ይሁዳ አሳ ኡባይ ባኣለ ኤቃ ኬꬅ ብድ፥ ሄ ኬꬃ ላልስ፤ ያርሾ በሳታነ እያ ምስለታ ትንቸረꬅስ። ባኣለ ኤቃ ካህንያ ማታና ያርሾ በሳታ ስንꬃን ዎꬍዶሶና።

ሄሳፈ ጉየ፥ ካህንያ ዮዳሄይ ፆሳ ኬꬃን ናገይሳታ ዎꬅስ። 19 ባራ ቶራ ሞጮናታ፥ ካዋ ናገይሳታ፥ ካዎ ጋꬎ ናገይሳታነ ይሁዳ አሳ ኡባ ኤክን፥ ኤንቲ ካዋ ፆሳ ኬꬃፈ ዱገ ኤህስ። ናገይሳታ ፐንግያ ባጋራ ካዎ ኬꬅ እስፈ ገልድ፥ ካዎይ ባ አራታን ኡትስ። 20 ይሁዳ አሳ ኡባይ ኡፋይትዶሶና፤ ጎቶላ ካዎ ጋꬎን ማሻን ሀይቅዳፐ ጉየ ካታማይ ዎፑ ግስ።

21 እዮኣስ ካዎትያ ዎደ ላፑን ላይꬃ ናአ።