1 እዩይ፥ እስራኤለ ቢታን ካዎትዳ ላፑንꬆ ላይꬃን፥ እዮኣስ ይሁዳን ካዎትስ፤ እ የሩሳላመን ኦይታሙ ላይꬅ ካዎትስ። እያ አየ ሱንꬃይ ሳቦ፤ እያ በርሳበ ማጫስ። 2 ካህነይ ዮዳሄይ፥ እያ ታማርስዳነ ዞርዳ ግሾ፥ እ ደእዳ ላይꬃ ኡባን እዮኣስ ጎዳ ስንꬃን ሱረባ ኦꬅስ። 3 አሳይ ሄ በሳን ያርሾነ እፃነ ጩይሰꬅ አግቦና ግሾ፥ ꬎቃ ጎይኖ በሳታ ꬋይስቤና።

4 እዮኣስ ካህነታ ፄግድ፥ “ፆሳ ኬꬃ ያ ጌሻ ሚሸ ኡባ ሺሽተ። ሄስካ ሁጰ ታይቡዋ ዎደ እመትያ ሚሽያነ አሳይ ባ ሸነን ፆሳ ኬꬅ ኤህያ ሚሽያ። ከሳ 30:11-16. 5 ካህነት ኡባይ ሄ ሚሽያ ኤህያ አሳፐ ባንታ ግሹዋ ግሹዋ ኤክድ፥ ፆሳ ኬꬃ ግዶን ኢትዳ ኡባ ሎይꬃና” ያግስ።

6 ሽን ካዎይ እዮኣስ ካዎትዳ ላታማነ ሄꬓንꬆ ላይꬅ ጋካናዉ፥ ካህነት ፆሳ ኬꬃ ኦራꬅቦኮና። 7 ካዎይ እዮኣስ ካህንያ ዮዳሄነ ሀራ ካህነታ ፄግድ፥ “ፆሳ ኬꬃ ግዶን ኢትዳ በሳታ አይስ ኦራከቲ? ሚሸ ፆሳ ኬꬃ ኦራꬃናዉ እምተፐ አትሽን፥ ህንተዉ እመትያ ሚሽያ ህንተ ኩሸን ኦይኮፍተ” ያግስ።

8 ካህነት፥ “አሳፐ ሀራ ሚሸ ኤኮኮ፤ ፆሳ ኬꬃ ግዶን ኢትዳ በሳ ኦራꬃና” ያግድ ዛርዶሶና።

9 ያትን፥ ካህንያ ዮዳሄይ እስ ሳፅነ ኤክድ፥ እያ ካማ ሉክድ፥ ያርሾ በሳ ማታን ፆሳ ኬꬅ ገልያ ፐንግያ ኡሻቻ ባጋራ ዎꬅስ። ፐንግያ ናግያ ካህነት ፆሳ ኬꬃ ይዳ ሚሽያ ኡባ ሳፅንያን የጎሶና። 10 ኤንቲ ሳፅንያን ዳሮ ሚሸይ ዳጋየትዳይሳ በእዳ ዎደ ኡባን፥ ካዎ ፃፈይነ ካህነ ሀላቃይ ይድ፥ ሚሽያ ታይብድ፥ ካርፂታን ቆሎሶና።

11 ታይበትዳ ሚሽያ ሳላእዳፐ ጉየ፥ ፆሳ ኬꬃ ኦሱዋ ፄላና መላ ሱንትዳ አሳስ እሞሶና። ኤንቲ ሚሽያ ኤክድ፥ ፆሳ ኬꬃን አናፀታስነ ግምበይሳት እሞሶና። 12 ሚሽያ ሹቹ ማሰይሳታስነ ቆኤይሳታስ ቃንፃናዉ፥ ፆሳ ኬꬃ ኦራꬃናዉ፥ ሳንቃ፥ ሹቹነ ኮሽያ ሀራባታ ሻማናዉ ጎኤቶሶና። 13 ፆሳ ኬꬃ ይዳ ሚሽያፐ ፆሳ ኬꬃ ብራ ቡርጩኮታ፥ ቃጰታ፥ ከረታነ ሞይዘታ ዎይኮ ዎርቃነ ብራ ሚሸታ ኦꬃናዉ ከስቦኮና። 14 ሄ ሚሸ ኡባይ ፆሳ ኬꬃ ኦራꬅያ አሳስ ቃንፀትስ። 15 ፆሳ ኬꬃ ኦሱዋ ፄላናዉ ሱንትዳ አሳት አማነትዳ አስ ግድዳ ግሾ፥ “ሚሽያን አይ አይ ኦꬅደቲ?” ያግድ ኦይችዳ አስ ኦንካ ባዋ። 2 ካዎ 22:7. 16 ናቆ ያርሾነ ናጋራ ያርሾስ ቃንፀትያ ሚሸይ ካህነታስ ገለስፐ አትሽን፥ ፆሳ ኬꬃ ኦራꬅያ ሚሸ ሳፅንያን ገለና። ሌወ 7:7.

17 ሄ ዎደ አራመ ካዎይ አዛሄል ብድ፥ ጋተ ካታማ ኦልድ ኦይክስ። ካልድ የሩሳላመ ኦላናዉ ስምስ። 18 ሽን ይሁዳ ካዎይ እዮኣስ እያፐ ካሰ ካዎትዳ ይሁዳ ካዎት እዮሳፈፅ፥ እዮራምነ አካዝያስ ጎዳስ ዱማይዳ ሚሸታ፥ ባ እሞታ፥ ፆሳ ኬꬃ እሞታነ ካዎ ጋꬎ ሻሎ ምንጅያ በሳን ደእያ ዎርቃ ኡባ ኤክስ። አራመ ካዋስ አዛሄላስ የድን፥ አዛሄል የሩሳላመ ኦላናዉ ደንዶይሳ አጋግስ።

19 ካዎይ እዮኣስ ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ። 20 ሄሳፈ ጉየ፥ እያ ሞርናት እያ ቦላ ማቀትድ፥ ሲላ ኤፍያ ኦግያን ሚሎ ጌተትያ ኬꬃን ዎꬍዶሶና። 21 እያ ዎꬍዳ ኦሳንቾት ስምአታ ናኣ ዮዛካራነ ሾሜራ ናኣ ዮዛባታ። እዮኣስ ዳዊቲ ካታማን ባ ማይዛታ ዱፎን ሞገትስ፤ እያ በሳን እያ ናአይ አማስያስ ካዎትስ።