1 አካዝያሳ ናአይ፥ ይሁዳ ካዎይ እዮኣስ ካዎትዳ ላታማነ ሄꬓንꬆ ላይꬃን፥ እዩ ናአይ እዮአካዝ እስራኤለ ቦላ ካዎትስ፤ እ ሳማረን ኡትድ ታማነ ላፑን ላይꬅ ካዎትስ። 2 እ፥ እስራኤለ አሳ ባለꬅዳ እዮርባማ ሶ አሳ ናጋራ ካልድ፥ ጎዳ ስንꬃን ኢታባ ኦꬅስ፤ እ ሄ ናጋራ ኦሶ አግቤና። 3 ሄሳ ግሾ፥ ጎዳ ሀንቆይ እስራኤለ ቦላ ሱልስ፤ ጎዳይ ኤንታ ዳሮ ዎደ አራመ ካዋ አዛሄላ፥ ሄሳዳካ እያ ናኣ ዎልደ-አዳራ ኩሸን አꬅድ እሚስ።

4 ሄሳፈ ጉየ፥ እዮአካዝ ጎዳ ዎስስ። ጎዳይ እያ ዎሳ ስእስ፤ ሶረ ካዎይ እስራኤለ አይ መላ ኢታ መቶን ኡንኤꬅዳኮ ጎዳይ በእስ። 5 እስራኤለ አሳ አሽያ አስ እምን፥ ኤንታ አራመ ኩሸፐ ከስ ኤክዶሶና። እስራኤለ አሳይ ካሰይሳዳ ባንታ ሶን ሳሮን ደእዶሶና። 6 ሄስ ሀንንካ እስራኤለ አሳ ባለꬅዳ እዮርባማ ሶ አሳ ናጋራፐ ስምቦኮና፤ ኤንቲ ሄ ናጋራ ኦሶ አግቦኮና። ቃስ አሼራ ጌተትያ ፆሰ ኤቃ ምስለይ ሳማረን ኤቅድ ደኤስ። 7 እዮአካዛስ እሻታሙ ፓራ አሳታ፥ ታሙ ጋረታ፥ 10,000 ቶሆ ኦላንቾታ፥ ሀራ ኦላንቾታ ፃላል አትዶሶና። አራመ ካዎይ ኤንታ ꬋይስስ፤ እ ኤንታ ዉዱማን ደእያ ሱላዳ ኦꬅስ።

8 እዮአካዝ ሀንዳ ሀራባይ፥ እ ኦꬅዳባ ኡባይነ እያ ምኖተꬃይ እስራኤለ ካዎታ ታርከ ማፃፋን ፃፈትስ። 9 እዮአካዝ ሀይቅድ፥ ባ ማይዛታ ጋክስ፤ እያ በሳን እያ ናአይ ዮኣስ ካዎትስ።

10 ይሁዳ ካዎይ እዮኣስ ካዎትዳ ሀስታማነ ላፑንꬆ ላይꬃን፥ እዮአካዛ ናአይ ዮኣስ ሳማረን እስራኤለ ቦላ ካዎትስ፤ እ ታማነ ኡሱፑን ላይꬅ ካዎትስ። 11 ዮኣስ ጎዳ ስንꬃን ኢታባ ኦꬅስ። እስራኤለ አሳ ባለꬅዳ ናባፃ ናኣ እዮርባማ ናጋራፐ እሱዋካ አሾና ኦꬅስ፤ እ ሄ ናጋራ ኦሶ አግቤና።

12 ዮኣስ ሀንዳ ሀራባይ፥ እ ኦꬅዳባ ኡባይነ ይሁዳ ካዋ አማስያሳራ ኦለትዳ ኦላይ እስራኤለ ካዎታ ታርከ ማፃፋን ፃፈትስ። 13 ዮኣስ ሀይቅድ፥ ባ ማይዛታ ጋክስ፤ ሳማረን እስራኤለ ካዎታራ ሞገትስ። እያ በሳን እያ ናአይ እዮርባም ካዎትስ።

14 ኤልስ ሀይቆስ ጋꬅያ ሀርገ ሀርገትስ፤ እስራኤለ ካዎይ ዮኣስ እያ በአናዉ ብድ፥ “ታ አዋዉ፤ ታ አዋዉ፥ ኔኒ እስራኤለ አሳስ ዎልቃነ ጎንዳለ!”2 ካዎ 2:12. ያግድ ዬክስ።

15 ኤልስ፥ “ዶንገነ ዶንገ ቶራ ኤካዳ ያ” ያግን፥ ዮኣስ ኤህስ።

16 ኤልስ ካዋኮ፥ “ዶንግያ ጊግሳ ኦይካ” ያግስ፤ እ ዶንግያ ጊግስድ ኦይክዳሽን፥ ኤልስ ባ ኩሽያ ካዋ ኩሽያ ቦላ ዎꬅስ።

17 ኤልስ፥ “ዶሎሀ ባጋ ማስኮትያ ዶያ” ያግስ። እ ዶይን፥ ኤልስ፥ “ዶንገ ቶራን ዱካ” ያግስ። እ ዱክን ኤልስ፥ “ሀይስ ጎዳ ዶንገ! ሀይስ አራመ አሳ ፆንያ ዶንገ! ኔኒ አራመ አሳ አፌቃን ፆናና ጋካናዉ ኦላና” ያግስ።

18 ሄሳፈ ጉየ፥ ኤልስ ካዋኮ፥ “ዶንገ ቶራታ ኤካ” ያግስ። እ ኤክን፥ ኤልስ፥ “ቢታ ጫዳ” ያግስ። እ ሄꬑ ቶሆ ቢታ ጫድድ አጋግስ። 19 ፆሳ አደይ፥ ካዋ ቦላ ሀንቀትድ፥ “እቻሹ ቶሆ ዎይኮ ኡሱፑን ቶሆ ቢታ ጫድዳባ ግድያኮ፥ ኔኒ አራመ አሳ ፆናዳ ኩመꬅ ꬋይሳናሽን! ኔኒ ሀእ ኤንታ ሄꬑ ቶሆ ፃላላ ፆናና” ያግስ።

20 ኤልስ ሀይቅድ ሞገትስ። ሞአበ ፓኖት እስራኤለ ቢታ ቦላ ላይꬃን ላይꬃን ደንዶሶና። 21 እስ ጋላስ ጉꬃ እስራኤለ አሳት እስ ኡራ አሀ ሞግሸ፥ ሄኮ፥ ሞአበ ፓኖታ በእዶሶና። ኡራ አሀ ኤልሳ ዱፉዋ ግዶ ሆልድ ባቃትዶሶና። አሀይ ኤልሳ መቀꬃ ቦላ ዎꬍድ፥ ፓፅድ ደንድ ኤቅስ።

22 እዮአካዝ ካዎትዳ ላይꬃ ኡባን ሶረ ካዎይ አዛሄል እስራኤለ ኡንኤꬅስ። 23 ሽን ጎዳይ አብራሃመራ፥ ይሳቃራነ ያይቆባራ ጫቅዳ ጫቁዋ ግሾ፥ ኤንታዉ ኬህስ፥ ቃትስ፥ ቆፕስ። ሀች ጋካናዉ እ ኤንታ ꬋይስቤና ዎይኮ ባ ስንꬃፈ ድግቤና።

24 አራመ ካዎይ አዛሄል ሀይቅን፥ እያ በሳን እያ ናአይ ዎልደ-አዳር ካዎትስ። 25 አዛሄል እያ አዋ እዮአካዝ ኦላን ኦይክዳ ካታማታ፥ እዮአካዛ ናአይ ዮኣስ አዛሄላ ናኣ ዎልደ-አዳራፐ ኤክስ። ዮኣስ እያ ሄꬑ ቶሆ ፆንድ፥ እስራኤለ ካታማታ ዛርስ።