1 እዮአካዛ ናአይ፥ እስራኤለ ካዎይ ዮኣስ ካዎትዳ ናምአንꬆ ላይꬃን፥ ይሁዳ ካዋ እዮኣሳ ናአይ አማስያስ ካዎትስ። 2 እ ካዎትያ ዎደ ላይꬅ እያዉ ላታማነ እቻሻ፤ እ የሩሳላመን ላታማነ ኡዱፉን ላይꬅ ካዎትስ። እያ አየ ሱንꬃይ ዮዳኖ፤ እያ የሩሳላመ ማጫስ። 3 አማስያስ ጎዳ ስንꬃን ሱረባ ኦꬅስ፤ ሽን እያ ማይዛይ ዳዊቲ ኦꬅዳይሳዳ ግዶናሽን፥ ባ አዋ እዮኣሳ ኦግያ ካልስ። 4 አሳይ ꬎቃ ጎይኖ በሳታ ꬋይስቤና፤ አሳይ ሄ በሳን ያርሾ ያርሸይሳነ እፃነ ጩይሰይሳ አግቦኮና።

5 አማስያስ ካዎተꬃ ምንꬅድ ኦይክዳፐ ጉየ፥ ካሰ ካዋ፥ ባ አዋ እዮኣሳ ዎꬍዳ ሹማታ ዎꬍስ። 6 ሙሰ ህገ ማፃፋን ፃፈትዳይሳዳ፥ ጎዳይ፥ “ናይት ኦꬅዳ ናጋራ ግሾ፥ አዋታ ዎꬋናዉ በሰና፤ ቃስ አዋት ኦꬅዳ ናጋራ ግሾ፥ ናይታ ዎꬋናዉ በሰና። አስ ኡባይ ባ ኦꬅዳ ናጋራን ናጋራን ሀይቃናዉ በሴስ”ዛረ 24:16. ያግድ ኪትዳይሳዳ ባ አዋ ዎꬍዳ አሳ ናይታ ዎꬍቤና። 7 አማስያስ ማፅነ ዛንጋራን ታሙ ሙኩሉ ኤዶመ አሳ ዎꬍድ፥ ሴላ ካታማ ኦላን ኦይክድ፥ ሄ በሳ ዮቅትኤላ ግድ ሱንꬅስ፤ ሀች ጋካናዉ ሄ ሱንꬃን ፄገቴስ።

8 ሄሳፈ ጉየ፥ አማስያስ እዩ ናኣ ናኣ፥ እዮአካዛ ናኣ፥ ዮኣሳኮ፥ “ሃያ፤ አነ ናምአይ ኦላ ጋሄቶስ” ያግድ አሰ ኪትድ ማንድስ። 9 ሽን እስራኤለ ካዎይ ዮኣስ፥ ይሁዳ ካዋ አማስያሳኮ፥ “ልባኖሰን ደእያ ክንቾተይ፥ ልባኖሰን ደእያ ዝጋኮ፥ ‘ነ ናእዉ ታ ናኣስ እማ’ ያግስ። ሽን ልባኖሰን ደእያ እስ ዶአይ ያራ ካንꬅድ፥ ሄ ክንቾትያ የꬍስ። 10 ኤ፥ ኔኒ ቱማ ኤዶመ ቢታ ፆናዳሳ፤ ሀእ ኦቶርታዳሳ። ኔኒ ነ ፆኑዋን ኡፋይታዳ፥ ነ ሶን ዎፑ ጋዳ ኡታ። ነ ቦላነ ነ ቢታ ይሁዳ ቦላ መቶነ ꬋዮ ኤህያባ አይስ ደንꬃይ?” ያግድ ዛርስ።

11 ሽን አማስያስ እያ ስእቤና። እስራኤለ ካዎይ ዮኣስ ኦላስ ከይን፥ እነ ይሁዳ ካዎይ አማስያስ ይሁዳን ደእያ ቤት-ሳሜሳ ካታማን ኦላ ጋሄትዶሶና። 12 እስራኤለይ ይሁዳ ፆንን፥ ይሁዳ አሳ ኡባይ ባቃትድ፥ ባንታ ሶ ባንታ ሶ ብዶሶና። 13 እስራኤለ ካዎይ ዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካዋ አማስያሳ ቤት-ሳሜሳ ካታማን ድእስ። የሩሳላመ ድርሳ ግምብያ፥ ኤፍሬማ ፐንግያፈ ብድ፥ ማዛነ ፐንግያ ጋካናዉ ደእያ ኦይዱ ፄቱ ዋꬋ ግድያ በሳ ላልስ። 14 ፆሳ ኬꬃንነ ካዎ ጋꬎን ሻሎ ምንጅያ ኬꬃን ደእያ ዎርቃ፥ ብራነ ሚሸ ኡባ ኤክስ፤ ቃስ ኦይꬅ ግድድ ድኤትዳ አሳካ ኤክድ፥ ሳማረ ስምስ።

15 ዮኣስ ሀንዳ ሀራባይ፥ እ ኦꬅዳባይ፥ እያ ምኖተꬃይነ ይሁዳ ካዋ አማስያሳራ ኦለትዳባይ እስራኤለ ካዎታ ታርከ ማፃፋን ፃፈትስ። 16 ዮኣስ ሀይቅድ፥ ባ ማይዛታ ጋክስ፤ ሳማረን እስራኤለ ካዎታራ ሞገትስ። እያ በሳን እያ ናአይ እዮርባም ካዎትስ።

17 እዮአካዛ ናአይ፥ እስራኤለ ካዎይ ዮኣስ ሀይቅዳፐ ጉየ፥ ዮኣሳ ናአይ፥ ይሁዳ ካዎይ አማስያስ ታማነ እቻሹ ላይꬅ ደእስ። 18 አማስያስ ሀንዳ ሀራባይ ይሁዳ ካዎታ ታርከ ማፃፋን ፃፈትስ።

19 አማስያሳ ዎꬋናዉ አሳይ የሩሳላመን ማቀትስ፤ ያትን እ ላክሶ ካታማ ባቃትስ። ሽን ኤንቲ እያ ጌዶ ላክሶ ካታማ አሰ ኪትን፥ እያ ያን ዎꬍዶሶና። 20 ዎꬍድ እያ አሀ ፓራን ጫን ኤህድ፥ ዳዊታ ካታማን የሩሳላመን እያ ማይዛታራ ሞግዶሶና። 21 ሄሳፈ ጉየ፥ ይሁዳ አሳ ኡባይ ታማነ ኡሱፑን ላይꬃ ናኣ አዛርያሳ እያ አዋ አማስያሳ በሳን ካዎꬅዶሶና። 22 እያ አዋይ አማስያስ ሀይቅዳፐ ጉየ፥ አዛርያስ ኤላታ ካታማ ዛር ኬፅድ፥ ይሁዳን ጋꬅስ።

23 እዮኣሳ ናአይ፥ ይሁዳ ካዎይ አማስያስ ካዎትዳ ታማነ እቻሻንꬆ ላይꬃን፥ እስራኤለ ካዋ ዮኣሳ ናአይ እዮርባም ሳማረን ካዎትስ፤ እ ኦይታማነ እስ ላይꬅ ካዎትስ። 24 ናምአንꬆ እዮርባም ጎዳ ስንꬃን ኢታባ ኦꬅስ፤ እስራኤለ አሳ ናጋራ ኦስስዳ ናባፃ ናኣ እዮርባም ኦግያፐ ሃክቤና። 25 ጋት-ሄፈራ አድያ አማተ ናኣ ናብያ፥ ባ አይልያ ዮናሳ ባጋራ ጎዳይ እስራኤለ ፆሳይ ባ ቃላን ኦድዳይሳዳ፥ ሀማታ ፕኑዋ ጌተትያ በሳፈ ዶምድ፥ ማፅነ አባ ጋካናዉ ደእያ እስራኤለ ዛዋ ዮኣሳ ናአይ እዮርባም ፆንድ ዛርስ። ዮና 1:1. 26 እስራኤለን አሳ ኡባይ አይለ ግድን፥ ዎማኖ ግድን፥ አይ መላ ኡንኤትዳኮ፥ ጎዳይ በእስ፤ ኤንታ ማድያ ኦንካ ባዋ። 27 ጎዳይ እስራኤለ አሳ ሱንꬃ ሳሎፐ ጋርሳን ቁቻና ግቤና። ሄሳ ግሾ፥ ጎዳይ ኤንታ ዮኣሳ ናኣ እዮርባማ ባጋራ አሽስ።

28 እዮርባም ሀንዳ ሀራባይ፥ እ ኦꬅዳባ ኡባይ፥ ኦለትዳባይነ ይሁዳ ባጋ ግድዳ ዳማስቆነ ሀማታ ካታማታ እስራኤለስ ዛርዳባይ እስራኤለ ካዎታ ታርከ ማፃፋን ፃፈትስ። 29 እዮርባም ሀይቅድ፥ ባ ማይዛታ፥ እስራኤለ ካዎታ ጋክስ፤ እያ በሳን እያ ናአይ ዛካርያስ ካዎትስ።