15
ይሁዳ ካዋ አዛርያሳ
(2 ታር 26:1-23)
1 እስራኤለ ካዎይ እዮርባም ካዎትዳ ላታማነ ላፑንꬃ ላይꬃን፥ ይሁዳ ካዋ አማስያሳ ናአይ አዛርያስ ካዎትስ። 2 እ ካዎትዳ ዎደ፥ እያዉ ላይꬅ ታማነ ኡሱፑና፤ እ የሩሳላመን እሻታማነ ናምኡ ላይꬅ ካዎትስ። እያ አየ ሱንꬃይ ይኮሎ፤ እያ የሩሳላመ ማጫስ። 3 እያ አዋይ አማስያስ ኦꬅዳይሳዳ፥ እካ ጎዳ ስንꬃን ሱረባ ኦꬅስ። 4 ግዶሽን፥ ሄ በሳን ያርሾ ያርሸይሳነ እፃነ ጩይሰይሳ አሳይ አግቦና ግሾ፥ ꬎቃ ጎይኖ በሳታ ꬋይስቤና፤ 5 ጎዳይ አዛርያሳ ጉꬃ ጎጋ ሀርገን ኦይꬅስ፤ ሀይቃና ጋካናዉ ሄ ሀርገይ እያ የድቦና ግሾ፥ ዱማ ኬꬃን ባርካ ደእስ። ሄ ዎደ ካዋ ናአይ እዮአታም ካዎ ጋꬎን ደእድ፥ ቢታ ሃርስ።
6 አዛርያስ ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ። 7 አዛርያስ ሀይቅድ፥ ባ ማይዛታ ጋክስ፤ ዳዊታ ካታማን ባ ማይዛታራ ሞገትስ። እያ በሳን እያ ናአይ እዮአታም ካዎትስ። እሳ 6:1.
እስራኤለ ካዋ ዛካርያሳ
8 ይሁዳ ካዎይ አዛርያስ ካዎትዳ ሀስታማነ ሆስፑንꬆ ላይꬃን፥ እዮርባማ ናአይ ዛካርያስ እስራኤለ ቦላ ሳማረን ካዎትስ፤ እ ኡሱፑን አጌና ካዎትስ። 9 እያ ማይዛት ኦꬅዳይሳዳ፥ እካ ጎዳ ስንꬃን ኢታባ ኦꬅስ፤ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና። 10 እያቤሳ ናአይ ሳሎም ዛካርያሳ ቦላ ማቀትድ፥ ይብላማ ጌተትያ በሳን ዎꬍድ እያ በሳን ባዉ ካዎትስ።
11 ዛካርያስ ሀንዳ ሀራባይነ እ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ። 12 ሄሳዳ ሀንድ፥ ጎዳይ እዩስ፥ “ነ ኮቻይ ኦይዳንꬆ የለታ ጋካናዉ፥ እስራኤለ ካዎተꬃ አራታን ኡታና” ያግድ ኦድዳ ቃላይ ፖለትስ። 2 ካዎ 10:30.
እስራኤለ ካዋ ሳሎማ
13 ይሁዳ ካዎይ ኦዝያን ካዎትዳ ሀስታማነ ኡዱፉንꬆ ላይꬃን፥ ያበሳ ናአይ ሳሉም ካዎትስ፤ እ ሳማረን እስ አጌና ካዎትስ። 14 ጋደ ናአይ ምናሄም ትርሳ ካታማፐ ሳማረ ብስ። ሳማረን ደእያ ያበሳ ናኣ ሳሉማ ዎꬍድ እያ በሳን ባዉ ካዎትስ።
15 ሳሉም ሀንዳ ሀራባይነ እ ማቀትዳ ማቆይ እስራኤለ ካዎታ ታርከ ማፃፋን ፃፈትስ። 16 ሄ ዎደ ምናሄም ትርሳፈ ደንድድ፥ ትፍሳነ፥ ያን ደእያ አሳነ ካታማ ሄራን ደእያ ቢታታ ኡባ ኦልስ። ኤንቲ ባንታ ካታማ ድርሳ ፐንግያ እያዉ ዶዮና እፅዳ ግሾ፥ ትፍሳ ኦልድ ꬋይስስ፤ ቃስ ያን ደእያ ቃንꬃ ማጫሳ ኡባ ኡሉዋ ዳክስ።
እስራኤለ ካዋ ምናሄማ
17 ይሁዳ ካዎይ አዛርያስ ካዎትዳ ሀስታማነ ኡዱፉንꬆ ላይꬃን፥ ጋደ ናአይ ምናሄም እስራኤለ ቦላ ካዎትስ፤ እ ሳማረን ታሙ ላይꬅ ካዎትስ። 18 እ ጎዳ ስንꬃን ኢታባ ኦꬅስ፤ ናባፃ ናአይ እዮርባም እስራኤለ አሳ ኦስስዳ ናጋራፐ ሃክቤና።
19 ሄሳፈ ጉየ፥ አሶረ ካዎይ ተልገልተልፈልሶር እስራኤለ ቦላ ደንድስ። ካዎተꬃን ባና ምንꬃና መላነ ማዳና መላ፥ ምናሄም ተልገልተልፈልሶራስ 34,000 ክሎ ግራመ ብራ ሳንትመ እሚስ። 20 ምናሄም ሄ ሚሽያ እስራኤለ አሳ ዎልቃን ከስስ፤ አሶረ ካዋስ እማናዉ ዱረ አስ ኡባይ እሶይ እሶይ እሻታሙ ብራ ሳንትመ ከስዶሶና። ሄሳዳ ኦꬅን፥ አሶረ ካዎይ እስራኤለ ቢታ አግድ፥ ባ ቢታ ስምስ።
21 ምናሄም ሀንዳ ሀራባይነ እ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ። 22 ምናሄም ሀይቅድ፥ ባ ማይዛታን ጋሄትስ፤ እያ በሳን እያ ናአይ ፓቅስያስ ካዎትስ።
እስራኤለ ካዋ ፋቅስያሳ
23 ይሁዳ ካዎይ አዛርያስ ካዎትዳ እሻታማንꬆ ላይꬃን፥ ምናሄማ ናአይ ፓቅስያስ እስራኤለ ቦላ ሳማረን ካዎትስ፤ እ ናምኡ ላይꬅ ካዎትስ። 24 ፓቅስያስ ጎዳ ስንꬃን ኢታባ ኦꬅስ፤ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና። 25 እያ ቶራ ሞጮናታፐ እሶይ፥ ራማላ ናአይ ፓቁሄይ እያ ቦላ ማቀትድ ደንድስ። ጋላዳ አሳፐ እሻታሙ አደታ ባራ ኤክድ፥ ሳማረን ካዎ ጋꬎን ደእያ ሚፃ ገልስ። ፓቁሄይ፥ ፓቅስያሳ፥ አርጎባነ አርያ እስፈ ዎꬍድ እያ በሳን ባዉ ካዎትስ።
26 ፓቅስያስ ሀንዳ ሀራባይነ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ።
እስራኤለ ካዋ ፋቁሄ
27 ይሁዳ ካዎይ አዛርያስ ካዎትዳ እሻታማነ ናምአንꬆ ላይꬃን፥ ራማላ ናአይ ፓቁሄይ እስራኤለ ቦላ ሳማረን ካዎትስ፤ እ ላታሙ ላይꬅ ካዎትስ። 28 ፓቁሄይ ጎዳ ስንꬃን ኢታባ ኦꬅስ፤ ናባፃ ናአይ እዮርባም እስራኤለ አሳ ኦስስዳ ናጋራፐ ሃክቤና።
29 እስራኤለ ካዋ ፓቁሄ ዎድያን አሶረ ካዎይ ተልገልተልፈልሶር ይድ፥ እዮና፥ አቤል-ቤት-ማእካ፥ ያኖሀ፥ ቃደሳነ ሀፆራ ኦልድ ኦይክስ፤ ቃስ ጋላዳ፥ ጋልላነ ንፍታለመ ቢታ ኡባ ኦልድ፥ አሳ ድእድ አሶረ ቢታ ኤፍስ።
30 አዛርያሳ ናአይ እዮአታም ካዎትዳ ላታማንꬆ ላይꬃን፥ ኤላ ናአይ ሆሰይ ራማላ ናኣ ፓቁሄ ቦላ ማቀትድ ዎꬍድ፥ እያ በሳን ባዉ ካዎትስ።
31 ፓቁሄይ ሀንዳ ሀራባይነ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ።
ይሁዳ ካዋ እዮአታማ
(2 ታር 27:1-9)
32 ራማላ ናአይ፥ እስራኤለ ካዎይ ፓቁሄይ ካዎትዳ ናምአንꬆ ላይꬃን፥ ይሁዳ ካዋ አዛርያስ ናአይ እዮአታም ካዎትስ። 33 እዮአታም ካዎትያ ዎደ እያዉ ላይꬅ ላታማነ እቻሻ፤ እ የሩሳላመን ታማነ ኡሱፑን ላይꬅ ካዎትስ። እያ አየ ሱንꬃይ ያሩሾ፤ ያሩሻ ሳዶቃ ናእዉ። 34 ባ አዋይ አዛርያስ ኦꬅዳይሳዳ፥ እዮአታም ጎዳ ስንꬃን ሱረባ ኦꬅስ። 35 ግዶሽን፥ ሄ በሳን ያርሾነ እፃነ ጩይሰꬅ አግቦና ግሾ፥ አሳይ ꬎቃ ጎይኖ በሳታ ꬋይስቤና። እዮአታም ፆሳ ኬꬃ ገልያ ቆሞ ባጋ ፐንግያ ዛሪድ ኬፅስ።
36 እዮአታም ሀንዳ ሀራባይነ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ። 37 ሄ ዎደ ጎዳይ አራመ ካዋ ራአሶናነ ራማላ ናኣ፥ እስራኤለ ካዋ ፓቁሄ ይሁዳ ቢታ ኦላና መላ ደንꬅስ። 38 እዮአታም ሀይቅድ፥ ባ አዋ ዳዊታ ካታማን ባ ማይዛታራ ሞገትስ፤ እያ በሳን እያ ናአይ አካዝ ካዎትስ።