1 ራማላ ናአይ ፓቁሄይ ካዎትዳ ታማነ ላፑንꬆ ላይꬃን፥ እዮአታማ ናአይ አካዝ ይሁዳን ካዎትስ። 2 እ ካዎትያ ዎደ ላይꬅ እያዉ ላታማ፤ የሩሳላመን ታማነ ኡሱፑን ላይꬅ ካዎትስ። እያ ማይዛይ ዳዊቲ ሱረባ ኦꬅዳይሳዳ፥ ጎዳ ባ ፆሳ ስንꬃን ሱረባ ኦꬅቤና። 3 እ ካሰ ደእዳ እስራኤለ ካዎታ ኦግያን ሄመትስ። ቃስ ጎዳይ እስራኤለ አሳ ስንꬃፈ ጎድድ ከስዳ አሳታ ዎጋ፥ እፀትዳ ኦግያ ካልድ፥ ባ አደ ናኣ ታማራ አꬅድ ያርሽስ። ዛረ 12:31፤ 18:10. 4 አካዝ ꬎቃ ጎይኖ በሳታን፥ ዙማታ ቦላነ ዳሻ ምꬃታ ኡባ ጋርሳን ያርሾ ያርሽስ፤ እፃነ ጩይስስ።

5 ሄሳፈ ጉየ፥ አራመ ካዎይ ራአሶንነ ራማላ ናአይ፥ እስራኤለ ካዎይ ፓቁሄይ የሩሳላመ ኦላናዉ ይድ ተቅዶሶና፤ ሽን አካዛ ፆናናዉ ዳንዳእቦኮና። እሳ 7:1. 6 ሄ ዎደ አራመ ካዎይ ራአሶን ኤላታ ካታማ ዛር ኤክድ፥ ይሁዳ አሳ ጎድድ ከስስ። ያትን ኤዶመ አሳት ኤላታ ካታማ ይድ፥ ሀች ጋካናዉ ያን ደኦሶና።

7 ሄሳ ግሾ፥ አካዝ አሶረ ካዋ ተልገልተልፈልሶራኮ ኪታ የድድ፥ “ታኒ ነ ናአነ ነ አይለ። ሀያና ሃያ፤ ታና ኦልያ አራመ ካዋ ኩሸፐነ እስራኤለ ካዋ ኩሸፐ አሻ” ያግስ። 8 ቃስ አካዝ ፆሳ ኬꬃነ ካዎ ጋꬎን ሻሎ ምንጅያ በሳን ደእያ ብራነ ዎርቃ ኤክድ፥ አሶረ ካዋስ እሞታ ኦꬅድ የድስ። 9 አካዛ ኦይሻ ኤክድ፥ አሶረ ካዎይ ዳማስቆ ካታማ ኦል ኦይክድ፥ አሳ ድእድ፥ ቂራ ኤፍስ፤ ካዋ ራአሶናካ ዎꬍስ።

10 ካዎይ አካዝ አሶረ ካዋ ተልገልተልፈልሶራራ ጋሄታናዉ ዳማስቆ ብስ። ዳማስቆን ደእያ ያርሾ በሳ በእድ፥ እያ ዳንያ ያርሾ በሲ ኬፃና መላ፥ ሄ ያርሾ በሳ ምስልያነ ኬፅያ ሀኖታ ካህንያ ኡራያ ኪትስ። 11 ካዎይ አካዝ ዳማስቆፈ ስሚድ ያናስ፥ ካህነይ ኡራይ እያ ዳንያ ያርሾ በሲ ጊግስስ።

12 ካዎይ ዳማስቆፈ ስምዳ ዎደ፥ ያርሾ በሳይ ኦሰትድ ፖለትዳይሳ በእድ፥ ያርሾ በሳኮ ሺቅድ፥ 13 ፁሳ ያርሾነ ካꬃ ያርሾ ያርሽስ። ቃስ ኡሻ ያርሹዋ ጉስስ፤ እስፈተꬃ ያርሾ ሱꬃካ ያርሾ በሳ ቦላ ꬋርጭስ። 14 ናሰ ብራታፐ ኦሰትድ፥ ጎዳስ ዱማትድ ኡትዳ ያርሾ በሳይ፥ ኦራꬃ ያርሾ በሳፈነ ፆሳ ኬꬃፈ ግዶን ደኤስ። አካዝ ሄ ጋልአ ያርሾ በሳ ደንꬅድ፥ ባ ኦስስዳ ኦራꬃ ያርሾ በሳፈ ፑደሀ ባጋን ዎꬅስ።ከሳ 27:1-2፤ 2 ታር 4:1.

15 ካዎይ አካዝ ካህንያ ኡራያ ሀይሳዳ ያግድ ኪትስ፤ “ሀ ግታ ያርሾ በሳን ዎንታ ፁሳ ያርሾ፥ ኦማርስ ሺሽያ ካꬃ ያርሾ፥ ካዎይ ሺሽያ ፁሳ ያርሾነ ካꬃ ያርሾ፥ አሳ ኡባይ ሺሽያ ፁሳ ያርሾ፥ ካꬃ ያርሹዋነ ኡሻ ያርሹዋ ያርሾ በሳን ሺሻ። ናሰፐ ኦሰትዳ ሀንኮ ያርሾ በሳ ታኒ ታዉ ኦይችያ በሲ ኦꬃና” ያግስ። 16 ኡራይ ካዎይ አካዝ ኪትዳይሳዳ ኦꬅስ።

17 ካዎይ አካዝ ፆሳ ኬꬃ ግዶን ጎኤትያ፥ ናሰ ብራታፐ ኦሰትዳ ጋረታ ሎቸ ብራታ ቃንፅድ፥ ምየፐ ድግድ ሜጨትያ ከረታ ጋረታ ቦላፈ ደንꬅስ። ቃስ ግታ ከረታ፥ እያ ዘምፕስዳ ናሰ ብራታ ቦራ ምስለታ ቦላፈ ደንꬅድ፥ ሹቻ ባሱዋ ቦላ ዎꬅስ።1 ካዎ 7:23-39፤ 2 ታር 4:2-6. 18 አሶረ ካዋ ግሾ፥ አካዝ ሳምባታ ጋላስ ፆሳ ኬꬃ ግዶን ካዋ አራታይ ምጨትያ ꬎቁ ግዳ በሳነ ካዎይ ፆሳ ኬꬅ ገልያ ካረ ኦግያ ጎርድድ፥ ዩይ አꬍድ ገላና መላ ኦꬅስ።

19 ካዎይ አካዝ ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ። 20 አካዝ ሀይቅድ፥ ባ ማይዛታን ጋሄትስ፤ ዳዊታ ካታማን ባ ማይዛታራ ሞገትስ፤ እያ በሳን እያ ናአይ ህዝቅያስ ካዎትስ። እሳ 14:28.