1 ይሁዳ ካዎይ አካዝ ካዎትዳ ታማነ ናምአንꬆ ላይꬃን፥ ኤላ ናአይ ሆሰይ እስራኤለ ቦላ ሳማረን ካዎትስ፤ እ ኡዱፉን ላይꬅ ካዎትስ። 2 እ፥ ጎዳ ስንꬃን ኢታባ ኦꬅስ፤ ግድኮካ፥ እያፐ ካሰ ደእዳ እስራኤለ ካዎት ኦꬅዳይሳ መላ ኢታባ ኦꬅቤና።

3 አሶረ ካዎይ ሳልምናሶር ይድ፥ እያራ ኦላ ጋሄትን፥ ሆሰይ ፆነትድ፥ እያዉ ጊርስ። 4 ሽን ጉꬃ ላይꬃፈ ጉየ፥ ካዎይ ሆሰይ፥ ግብፀ ካዋ ሰጎራስ ኪታ የድድ፥ ባና ማዳና መላ ኦይችስ። ካሰይሳዳ አሶረ ካዋስ ጊራ እመይሳ አጋግስ። ካዎይ ሳልምናሶር ሄሳ ስእዳ ዎደ እያ ኦይꬅድ፥ ቃሾ ኬꬅ ገልስስ።

5 አሶረ ካዎይ እስራኤለ ቢታ ኡባ ቦላ ደንድድ፥ ሄꬑ ላይꬅ ጋካናዉ ሳማረ ካታማ ተቅስ። 6 ሆሰይ ካዎትዳ ኡዱፉንꬆ ላይꬃን አሶረ ካዎይ ሳማረ ካታማ ኦይክስ፤ እስራኤለ አሳ ኤክድ፥ አሶረ ቢታ ኤፍስ። ኤንታፈ ባጋ አላሀንነ አቦራን፥ ባጋ ቃስ ጎዛና ሻፋ ማታን፥ አትዳይሳታ ሜዶና ካታማታን ዎꬅስ።

7 ሀይስ ኡባይ ሀንዳይ፥ እስራኤለ አሳይ ጎዳ ባንታ ፆሳ ቦላ፥ ኤንታ ግብፀፈ፥ ግብፀ ካዋ ኩሸፐ ከስዳይሳ ቦላ ናጋራ ኦꬅዳ ግሾሳ። ቃስ ኤንቲ ሀራ ፆሳታስ ጎይንድ፥ 8 ጎዳይ ኤንታ ስንꬃፈ ጎድድ ከስዳ ሀራ ካዎተꬃታ ዎጋ ካልዳ ግሾሳ። ሄሳ ቦላ ቃስ እስራኤለ ካዎት ዶምዳ ኢታ ዎጋ ካልዳ ግሾሳ። 9 እስራኤለ አሳይ ጎዳ ባንታ ፆሳ ቦላ ጌማን ኢታባ ኦꬅዶሶና፤ ጉꬃ ሞꬃፈ ብድ፥ ግታ ካታማ ጋካናዉ ደእያ በሳ ኡባን ባንታዉ ꬎቃ ጎይኖ በሳታ መꬍዶሶና። 10 ቃስ ኤንቲ ኤቃ ሹቻታነ አሼራ ጌተትያ ፆሰ ምስለታ ዙማ ሁጰ ኡባንነ ዳሻ ምꬃ ኡባ ጋርሳን ኤስዶሶና። 11 ጎዳይ በን ኤንታ ስንꬃፈ ጎድድ ከስዳ አላጋ አሳይ ኦꬅዳይሳዳ፥ ꬎቃ በሳ ኡባን እፃነ ጩይስዶሶና። ኤንቲ ኢታባ ኦꬅድ ጎዳ ሀንቀꬅዶሶና። 12 ጎዳይ ኤንታ፥ “ጎይኖፍተ” ያግዳ ኤቃ ጎይንዶሶና። 13 ጎዳይ እስራኤለ አሳነ ይሁዳ አሳ ባ ናበታ ባጋራነ ቆንጨꬅ በእያ ኡባ ባጋራ፥ “ህንተ ኢታ ኦግያፐ ስምተ፤ ታኒ ናበታ፥ ታ አይለታ ባጋራ፥ ህንተ አዋት ኪተታናዳ እምዳ ህግያን ፃፈትዳ ዎጋነ አዋጁዋ ናግተ” ያግስ። 14 ሽን ኤንቲ ስኦና እፅዶሶና። ጎዳ ባንታ ፆሳ አማነትቦና ባንታ አዋታዳ ሞርገ ምንꬅዶሶና። 15 ኤንቲ እያ ዎጋ፥ እ ኤንታ አዋታራ ጫቅዳ ጫቁዋነ እያ ናግሱዋ ካꬍዶሶና። ኤንቲ ላፋ ኤቃታ ጎይንድ፥ ባንታ ሁጰንካ ላፋ ግድዶሶና።

ጎዳይ ኤንታ፥ “ህንተ ዩሹዋን ደእያ አላጋ አሳይ ኦይሳዳ ኦꬆፍተ” ያግዳ ኪታ እፅድ፥ ኤንታ ደኡዋ ዎጋ ካልዶሶና። 16 ጎዳ ባንታ ፆሳ ኪታ ኡባ አጋግዶሶና። ማር ዳንያ፥ ናምኡ ጎይኖ ምስለታነ አሼራ ጌተትያ ኤቃ ምስልያ መꬍዶሶና። ሳሎን ደእያ ፆልንቶ ኡባ ጎይንዶሶናነ ባኣለ ኤቃ ሀጋዝዶሶና። 17 ኤንቲ ባንታ አደ ናይታነ ማጫ ናይታ ታማ ግዶራ አꬅዶሶና። ማሮታነ ሞይትለ ፄገይሳታ ዞረ ኦይችዶሶና። ሄሳ መላ ኢታባ ኦꬃናዉ ባንታና ባይዝድ፥ ጎዳ ሀንቀꬅዶሶና። 18 ሄሳ ግሾ፥ ጎዳይ እስራኤለ ቦላ ሀንቀትድ ኤንታ ባ ስንꬃፈ ድግን፥ ይሁዳ ኮቻ ፃላል አትስ።

19 ቃስ ይሁዳ አሳይካ፥ ጎዳ ባንታ ፆሳ ኪታ ናግቦኮና፤ ኤንቲ እስራኤለ አሳ ዎጋ ካልዶሶና። 20 ሄሳ ጋሶን፥ ጎዳይ እስራኤለ ኮቻታ ኡባ አጋግስ። እ ኤንታ ኡንኤꬅድ፥ ባ ስንꬃፈ ድጋና ጋካናዉ፥ ቦንቅያ አሳ ኩሸን የግስ።

21 ጎዳይ እስራኤለ አሳ ዳዊታ ኮቻ ካዎተꬃፈ በን ሻክዳ ዎደ፥ እስራኤለ አሳይ ናባፃ ናኣ እዮርባማ ባንታዉ ካዎꬅዶሶና። ሄሳፈ ጉየ፥ እስራኤለ አሳይ ጎዳ ካሎናዳ እዮርባም ድግስ፤ እ ኤንታ ግታ ናጋራ ኦስስስ። 22 እስራኤለ አሳይ እዮርባም ኦꬅዳ ናጋራ ኡባ ኦꬅዶሶና፤ እያፐ ስምቦኮና። 23 ጎዳይ ናበታ፥ ባ አይለታ ኡባ ባጋራ ካሰ ኦድዳይሳዳ ኤንታ ባ ስንꬃፈ ድግስ። እስራኤለ አሳይ ባንታ የለትዳ ቢታፈ ድኤትድ፥ አሶረ ቢታ ብድ፥ ሀች ጋካናዉ ያን ደእዶሶና።

24 አሶረ ካዎይ ባብሎነ ቢታን ደእያ ኩታ፥ አዋና፥ ሀማታነ ሳፋርዋይማ ካታማታን ደእያ አሳ ኤህድ፥ እስራኤለ አሳ በሳን፥ ሳማረ ካታማታን ዎꬅስ። ኤንቲ ሄ ካታማታ ኦይክድ፥ ያን ደእዶሶና።

25 ኤንቲ ኮይሮ ያን ዱሱ ዶምዳ ዎደ፥ ጎዳ ጎይንቦኮና። ሄሳ ጋሶን፥ ጎዳይ ኤንታ ግዶ ጋሞታ የድን፥ ጋሞት ኤንታ ግዶፈ ባጋታ መንረꬅድ ዎꬍዶሶና። 26 ያትን፥ አሶረ ካዋስ፥ “ኔኒ ኤሀዳ ሳማረ ካታማታን ዎꬅዳ አሳይ፥ ሀ ቢታ ፆሳ ዎጋ ኤሮኮና። ሄኮ፥ ያትን፥ ኤንታ መንረꬅ ዎꬍያ ጋሞታ ኤንታ ቦላ የድስ” ያግድ ኦድዶሶና።

27 አሶረ ካዎይ፥ “ህንተ ሳማረፐ ድእድ ኤህዳ ካህነታፐ እሱዋ ዛሪድ፥ ያ የድተ። እ ያ ብድ፥ ሄ ቢታ ፆሳ ዎጋ ኤንታ ታማርሶ” ያግድ ኪትስ። 28 ሄሳ ግሾ፥ ሳማረፐ ድእድ ኤህዳ ካህነታፐ እሶይ ቤተለን ዳናዉ ይድ፥ ጎዳ ጎይኖ ዎጋ ኤንታ ታማርስስ።

29 ግዶሽን፥ ሳማረን ኡትዳ አሳይ ባንታዉ ጎይንያ ኤቃ ምስለታ ባ ደእያ በሳን በሳን መꬍዶሶና። ኤንቲ ደእያ ካታማታን፥ ካሰ ባንታዉ ኬፅዳ ꬎቃ ጎይኖ በሳታን ኤፍድ ዎꬅዶሶና። 30 ሄሳዳ ኦꬅድ፥ ባብሎነ አሳይ ሱኮት-ባኖባ ጌተትያ ኤቃ ምስለታ መꬍዶሶና። ኩታ አሳይ አርጋላ ጌተትያ ኤቃ ምስለታ መꬍዶሶና። ሀማታ አሳይ እስማታ ጌተትያ ኤቃ ምስለታ መꬍዶሶና። 31 አዋዋ አሳይ አልባዛራነ ታርታቃ ጌተትያ ኤቃ ምስለታ መꬍዶሶና። ሳፋርዋይማ አሳይ ቃስ አድራመለክነ አናመለካ ጌተትያ ባንታ ፆሳታስ ባንታ ናይታ ታማን ፁግድ ያርሽዶሶና። 32 ኤንቲ ጎዳ ጎይንዶሶና፤ ሽን ባንታ ግዶፈ ዱማ ዱማ አሳ ዶርድ፥ ꬎቃ ጎይኖ በሳታን ካህነ ኦꬅድ ሹምዶሶና። 33 ኤንቲ ጎዳ ጎይንዶሶና፤ ግድኮካ፥ ባንታ ይዳ ቢታ ቢታ አሳ ሜዝያ ካልድ፥ ባንታ ፆሳታካ ጎይንዶሶና። 34 ኤንቲ ሀች ጋካናዉ ካሰ ሜዘትዳይሳዳ ኦꬆሶና።መ 32:28፤ 35:10.

ኤንቲ ቱማ ጎዳ ጎይኖኮና ዎይኮ ጎዳይ እስራኤለ ግድ ሱንꬅዳ ያይቆባ ዘረꬃስ እምዳ አዋጁዋነ ዎጋ፥ ህግያነ ኪታ ናጎኮና። 35 ጎዳይ እስራኤለ አሳራ በን ጫቅዳ ዎደ፥ ኤንታ ሀይሳዳ ያግድ ኪትስ፤ “ሀራ ፆሳታ ጎይኖፍተ፤ ኤንታዉ ጉልባቶፕተ፤ ኤንታዉ ኦꬆፍተ ዎይኮ ኤንታዉ ያርሾፍተ። ከሳ 20:5፤ ዛረ 5:9. 36 ሽን ግብፀፈ ህንተና ባ ግታ ዎልቃንነ ባ ምጨትዳ ኩሸን ከስዳ ጎዳስ ኦꬅተ፤ እያዉ ጉልባትተ፤ እያዉ ያርሾ ያርሽተ። ዛረ 6:13. 37 ጎዳይ ህንተዉ ፃፍዳ አዋጁዋነ ዎጋ፥ ህግያነ ኪታ ኡባ ዎደ ናግተ፤ ሀራ ፆሳታ ጎይኖፍተ። 38 ታኒ ህንተራ ጫቅዳ ጫቁዋ ዶጎፕተ፤ ሀራ ፆሳታ ጎይኖፍተ። 39 ሄሳ አግድ፥ ጎዳ ህንተ ፆሳ ጎይንተ። ህንተ ሞርከታ ኡባፈ ህንተና አሻናይ ታና” ያግድ ኪትስ። 40 ሽን ኤንቲ እያዉ ኤሮ ጎና እፅድ፥ ካሰ ባንታ ሜዝያ ካልዶሶና። 41 ሄ አሳት ጎዳ ጎይንሸካ፥ እስ ባጋራ ባንታ ኤቃ ምስለታ ጎይኖሶና። ሀች ጋካናዉ ኤንታ ኮቻይ ኤንታ አዋት ጎይነይሳዳ ጎይንሸ ደኦሶና።