18
ይሁዳ ካዋ ህዝቅያሳ
(2 ታር 29:1-2፤ 31:1)
1 ኤላ ናአይ ሆሰይ እስራኤለን ካዎትዳ ሄꬓንꬆ ላይꬃን፥ ይሁዳ ካዋ አካዛ ናአይ ህዝቅያስ ይሁዳን ካዎትስ። 2 እ ካዎትያ ዎደ ላይꬅ እያዉ ላታማነ እቻሻ፤ የሩሳላመን ላታማነ ኡዱፉን ላይꬅ ካዎትስ። እያ አየ ሱንꬃይ አብያ ጌተቴስ፤ እያ ዛካርያሳ ናእዉ። 3 እያ ማይዛይ ዳዊቲ ኦꬅዳይሳዳ፥ ህዝቅያስ ጎዳ ስንꬃን ሱረባ ኦꬅስ። 4 አሳይ ꬎቃ ጎይኖ በሳታ ድግስ። ኤቃ ቱሳታ መንረꬅስ። አሼራ ጌተትያ ፆሰ ምስልያ ቃንፅ የግስ። ቃስ ሙሰይ ናሰ ብራታፐ መꬍዳ፥ ናሁሽታና ጌተትያ ሾሻ ምስልያ መንረꬅስ። ሄ ዎደይ ጋካናዉ እስራኤለ አሳይ እያዉ እፃነ ጩይስሸ ጋምእስ።
5 ህዝቅያስ ጎዳ እስራኤለ ፆሳ አማንስ፤ ይሁዳ ካዎታ ኡባ ግዶን እያ መላ ካዎይ እያፐ ካሰ ግድን፥ እያፐ ጉየ ግድን በንትቤና። 6 እ ጎዳራ ኦይከትስ፤ ጎዳ ካሎ አግቤና፤ ጎዳይ ሙሰ ኪትዳ ኪታታ ናግስ። 7 ጎዳይ እያራ ግድስ፤ እ ኦꬅያባ ኡባይ እያዉ እንጀትስ። እ አሶረ ካዋ ቦላ ማካልድ፥ እያዉ ሃረቶና እፅስ። 8 እ፥ ፍልስፄመ አሳ ኦልድ ጉꬃ ሞꬃታፐ ብድ፥ ግታ ካታማ ጋካናዉ፥ ጋዛነ እያ ዩሾን ደእያ ቢታት አቶና ኤንቲ ደእያ በሳታ ኡባ ፆንስ።
9 ካዎይ ህዝቅያስ ካዎትዳ ኦይዳንꬆ ላይꬃን፥ ኤላ ናአይ እስራኤለ ካዎይ፥ ሆሰይ ካዎትዳ ላፑንꬆ ላይꬃን፥ አሶረ ካዎይ ሳልምናሶር እስራኤለ ቦላ ደንድድ፥ ሳማረ ካታማ ተቅስ። 10 ሄꬓንꬆ ላይꬅ ሳማረ ካታማ ፆንስ። ያትን፥ ህዝቅያስ ካዎትዳ ኡሱፑንꬆ ላይꬃን፥ እስራኤለ ካዎይ ሆሰይ ካዎትዳ ኡዱፉንꬆ ላይꬃን፥ ሳማረ ካታማይ ፆነትስ። 11 አሶረ ካዎይ እስራኤለ አሳ አሶረ ቢታ ኤፍድ፥ ኤንታፈ ባጋ አላሀንነ አቦራ ካታማታን፥ ባጋ አጎዛ ሻፋ ማታን ባጋ ቃስ ሜዶና ካታማታን ዎꬅስ። 12 ሄስካ ኤንቲ ጎዳስ ባንታ ፆሳስ ኪተቶና እፅድ፥ ጎዳ ጫቁዋ፥ ጎዳ አይለይ፥ ሙሰይ ኪትዳ ኪታ ኡባ መንꬅዳ ግሾሳ። ኤንቲ እያ ኪታ ስአናዉነ ኪተታናዉ ኮይቦኮና።
አሶረ ማንደꬃ
(2 ታር 32:1-19፤ እሳ 36:1-22)
13 ካዎይ ህዝቅያስ ካዎትዳ ታማነ ኦይዳንꬆ ላይꬃን፥ አሶረ ካዎይ ሳናክሬም ግምበትዳ ይሁዳ ካታማታ ኡባ ኦልድ ኦይክስ። 14 ያትን፥ ይሁዳ ካዎይ ህዝቅያስ ላክሶ ካታማን ደእያ አሶረ ካዋ ሳናክሬማስ ኪታ የድድ፥ “ታኒ ባላስ፤ ሀያና ታ ቢታ የዳዳ ከያ። ኔኒ ታና ኦይችዳባ አይባካ ታ ነዉ እማና” ያግስ።
አሶረ ካዎይ፥ ይሁዳ ካዋ ህዝቅያሳኮ፥ “ኔኒ 10,000 ክሎ ግራመ ብራነ 1,000 ክሎ ግራመ ዎርቃ ታዉ የዳ” ያግስ። 15 ህዝቅያስ ፆሳ ኬꬃን፥ ካዎ ጋꬎን ሻሎ ምንጅያ በሳን ደእያ ብራ ኡባ እያዉ የድስ። 16 ሄ ዎደ ይሁዳ ካዎይ ህዝቅያስ፥ ፆሳ ኬꬃ ፐንግያ ሳንቃታ ትይዳ ዎርቃነ እ ባ ሁጰን ፐንገ ቱቀታ ትይዳ ዎርቃ ቃርድ፥ አሶረ ካዋስ የድስ።
17 አሶረ ካዎይ፥ ታርታና፥ ራፌሳነ ራስፋቅሳ ጌተትያ ሄꬑ ቶራ ሞጮናታ፥ ዳሮ ኦላንቾታራ ላክሶ ካታማፐ ካዋ ህዝቅያሳኮ የሩሳላመ የድስ። ኤንቲ ብድ፥ የሩሳላመ ጋክድ፥ ማኦ ሜጭያ አድያ ጋደ ኤፍያ ኦግያፐ ቆሞ ባጋራ ደእያ፥ ዳጋትዳ ሃꬃይ ጎግያ ዛራ ላንቀን ኤቅዶሶና። 18 ኤንቲ ካዋ ፄግን፥ ካዎ ጋꬎ አዋተꬃን አይስያ ካልቀ ናአይ ኤልያቄም፥ ዋና ፃፈይ ሳምናስነ አሳፋ ናአይ ታርከ ፃፈይ ዮኣስ እያኮ ካረ ከይዶሶና።
19 አሶረታ ሀላቃይ፥ “ህዝቅያሳስ ሀይሳዳ ያግድ ኦድተ። አሶረ ካዎይ፥ ዎልቃማይ ነና ሀይሳዳ ያጌስ፤ ‘ኔኒ አይብን አማነታዲ? 20 ኦላ ኦለታናዉ ነዉ ጭንጫተꬅነ ዎልቅ ደኤስ ያጋሳ። ሽን ኔኒ አይብን አማነታዳ ታ ቦላ ሀይሳ ማካላዲ? 21 ሄኮ፥ ኔኒ ግብፀ ካዎይ ማዳና ጋዳ ቆፕያባ ግድኮ፥ መቅዳ ማይረ ፃምአን ካትያ አሳ መላ። ፃምአይ መቅን፥ ፕንጮይ ኩሸ ጫደስነ ማዱንፅሴስ። ግብፀ ካዎይ ባናን አማነትያ አሳ ኡባስ ሄሳ መላ’ ” ያግስ።
22 ሽን ኔኒ፥ “ኑኒ ጎዳን ኑ ፆሳን አማነቶስ” ያግኮ፥ ህዝቅያስ፥ ይሁዳ አሳነ የሩሳላመ አሳ፥ “ህንተ የሩሳላመን ደእያ ያርሾ በሳን ጎይናናዉ ኮሼስ” ግድ፥ ꬎቃ ጎይኖ በሳታነ ያርሾ በሳታ ድግዳይ እያ ግደኔ?
23 ሀእ ሃያ፤ ታ ጎዳ አሶረ ካዉዋራ ማንደታ። ኔኒ ቶጋናዉ ዳንዳእያ፥ ግድያ አስ ደምኮ፥ ናምኡ ሙኩሉ ፓራታ ታኒ ነዉ እማና። 24 ኔኒ፥ “ግብፀት ፓራ አሳታነ ፓራ ጋረታ ታዉ የዳና” ጋዳ አማንኮ፥ ታ ጎዳ ቶራ ሞጮናታፐ እስ ጉꬃካ ዛራናዉ ዳንዳአካ። 25 ሄሳ ቦላ ቃስ፥ ታኒ ሀእ ቱማ ጎዳ ኪት ባይና ሀ ቢታ ꬋይሳናዉ ኮያድና? ጎዳይ ባ ሁጰን ታና፥ “ሄ ቢታ ባዳ፥ ኦላዳ ꬋይሳ” ያግስ።
26 ሄሳፈ ጉየ፥ ካልቀ ናአይ ኤልያቄም፥ ሳምናስነ ዮኣስ አሶረታ ቶራ ሞጮናኮ ሀይሳዳ ያግዶሶና፤ “ኑኒ ብርሸꬅ ኤርያ ግሾ፥ ሀያና ኑስ ነ አይለታስ አራምከ ዶናን ኦዳ። ድርሳ ግምብያ ሁጰ ሶን ደእያ አሳይ ስኦና መላ፥ እብራወꬆ ዶናን ኦዶፓ” ያግዶሶና። 27 ሽን ቶራ ሞጮናይ ዛሪድ፥ “ሀ ቃላ ታኒ ህንተዉነ ህንተ ጎዳ ፃላላስ ኦዳናዉ ታ ጎዳይ ታና ኪትደዬ? ህንተራ እስፈ ባንታ ሽአ ማናዉነ ባንታ ሼሻ ኡያናዉ ደእያ፥ ሀ ድርሳ ግምብያ ቦላ ኡትዳ አሳ ኡባሳ ግደነዬ?” ያግስ።
28 አሶረ ቶራ ሞጮናይ ደንድ ኤቅድ፥ ባ ቃላ ꬎቁ ኦꬅድ፥ እብራወꬆ ዶናን ሀይሳዳ ያግስ፤ “አሶረ ካዎይ ዎልቃማይ ህንተና ግያባ ስእተ! 29 ካዎይ ህንተኮ ሀይሳዳ ያጌስ፤ ‘ህዝቅያስ ህንተና ጭሞፎ፤ እ ህንተና ታ ኩሸፐ ከስ ኤካናዉ ዳንዳኤና። 30 ጎዳይ ቱማ ኑና አሻና፤ ሀ ካታማይካ አሶረ ካዋ ኩሸን ገለና’ ያግድ ህንተ ጎዳን አማነታና መላ ኦꬆፎ” ያጌስ።
31 ህንተ ህዝቅያስ ኦድያባ ስኦፕተ። አሶረ ካዎይ፥ “ታራ ስገትተ፤ ሃ ታኮ ከይተ። ህንተ ኡባይ ህንተ ዎይንያፐነ ህንተ ባላስያፐ ማና፤ ህንተ ቦክዳ ኦላፈ ሃ ኡያና። 32 ታኒ ያዳ፥ ህንተና ህንተ ቢታ ዳንያ ቢታ ኤፋና። ሄ ቢታይ ካꬅነ ዎይነይ፥ ኡይꬅነ ዎይነ ጋደይ ኩምዳ ቢታ፤ ሻማሆ ዛይተይነ ኤስ ኩምዳ ቢታ። ህንተ ታዉ ኪተትኮ፥ ደኦን ዳና፤ ሀይቀከታ። ህዝቅያስ፥ ‘ጎዳይ ኑና አሻና’ ያግድ ህንተና ጭመይሳ ስኦፕተ። 33 ሀራ ካዎተꬃታ ፆሳታፐ ባ ቢታ አሶረ ካዋ ኩሸፐ አሽዳ ፆሲ ደኢ? 34 ሀማታ ፆሳትነ አርፋዳ ፆሳት አዉን ደኦና? ሳፋርዋይማ፥ ሄናነ እዋ ፆሳት አዉን ደኦና? ኤንቲ ሳማረ ታ ኩሸፐ ከስ ኤክዶና? 35 ሀ ቢታታ ፆሳታ ኡባ ግዶን፥ ባ ቢታ ታ ኩሸፐ አይ ፆሲ አሽዳሽን፥ ጎዳይ የሩሳላመ ታ ኩሸፐ አሻኔ?” ያግስ።
36 ካዎይ ካሰ፥ “ኤንታዉ አይኮካ ዛሮፕተ” ያግድ ኦድዳ ግሾ፥ አሳይ እስ ቃላካ ዛሮና ስእ ግዶሶና። 37 ካልቀ ናአይ ካዎ ጋꬎ አዋተꬃን አይስያ ኤልያቄም፥ ዋና ፃፈይ ሳምናስነ ታርከ ፃፈይ አሳፋ ናአይ ዮኣስ ባንታ ማኡዋ ዳክድ፥ ህዝቅያሳኮ ብድ፥ አሶረታ ቶራ ሞጮናይ ግዳባ ኡባ እያዉ ኦድዶሶና።