1 ሄ ዎደ ካዎይ ህዝቅያስ ሀርግድ፥ ሀይቃናዉ ማትስ። አሞፀ ናአይ ናበይ እሳያስ እያኮ ብድ፥ “ጎዳይ፥ ‘ኔኒ ነ ሀርግያፈ ፓፃካ፤ ነ ሀይቃና፤ ሄሳ ግሾ፥ ነ ኬꬃ ጊግሳ’ ” ያግስ።

2 ህዝቅያስ ጎዳኮ ስሚድ፥ ፆሳ ዎስስ። 3 “አቤት ጎዳዉ፥ ታኒ ነ ስንꬃን ቱማተꬃን፥ ኩመꬃ ዎዛናን ሄመትዳይሳነ ነና ኡፋይስያባ ኦꬅዳይሳ ኔኒ ቆፓና መላ ታኒ ነና ዎሳይስ” ያግድ፥ ዳሮ ጫመትድ፥ ዬክድ ዎስስ።

4 እሳያስ ካዋ ስንꬃፈ ከይድ፥ ካዎ ጋꬎ ዳባባ ካንꬅድ ቦና ደእሽን፥ ጎዳ ቃላይ ሀይሳዳ ያግሸ እያኮ ይስ። 5 “ጉየ ስማዳ ባዳ ታ አሳ ካለꬅያ ህዝቅያሳስ ሀይሳዳ ያጋዳ ኦዳ። ጎዳይ፥ ነ ማይዛ ዳዊታ ፆሳይ ሀይሳዳ ያጌስ፤ ‘ታኒ ነ ዎሳ ስአስ፤ ነ አፉꬃ በአስ። ሄኮ፥ ታኒ ነና ፓꬃና፤ ሄꬑ ጋላሳፐ ጉየ፥ ኔኒ ፆሳ ኬꬅ ባና። 6 ነ ላይꬃ ቦላ ታኒ ነዉ ታማነ እቻሹ ላይꬅ ጉጃና። ታኒ ነናነ ሀ ካታማ አሶረ ካዋ ኩሸፐ አሻና። ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማስ ኦለታዳ አሻና’ ያጌስ” ያግስ። 7 እሳያስ፥ “ባላሰ ቴራ ዳፅድ፥ እያ ክፃ ቦላ ዎꬅተ፤ እ ፓፃና” ያግስ።

8 ህዝቅያስ እሳያሳ፥ “ጎዳይ ታና ፓꬃናይሳነ ታኒ ሄꬓንꬆ ጋላስ ፆሳ ኬꬃ ባናይሳስ ማላታይ አይቤ?” ያግድ ኦይችስ።

9 እሳያስ፥ “ጎዳይ ባ ግዳ ቃላ ፖላናዉ ነዉ ማላታ እማና። ህዛ ኔኒ ሀይሳታፐ አዉሳ ዶራይ? ኩያይ ታሙ ደꬃ ስንꬃ ባና መላ ኮያዬ? ታሙ ደꬃታ ጉየ ባና መላ ኮያይ?” ያግድ ኦይችስ።

10 ህዝቅያስ፥ “ኩያይ ስን ባናይስ መተና፤ ኩያይ ጉየ ስማናዳ ኦꬃ” ያግስ። 11 ናበይ እሳያስ ጎዳ ዎስን፥ ጎዳይ ካዎይ አካዝ ግምብስዳ ደꬃ ቦላ ሸምፕዳ ኩያይ ታሙ ደꬃ ጉየ ዛርስ።

12 ሄ ዎደ ባልዳና ናአይ፥ ባብሎነ ካዎይ፥ ማሮዳክ ባልዳን ህዝቅያስ ሀርግዳይሳ ስእዳ ግሾ፥ ዳብዳበነ እሞታ ህዝቅያሳስ የድስ። 13 ህዝቅያስ ኪተትድ ይዳ አሳታ ሞክስ። ባ ሻሎ ምንጅያ ኬꬃን ደእያ ብራ፥ ዎርቃ፥ ሳዉዋ፥ አልኦ ዛይትያ፥ ባ ኦላ ሚሽያነ ባ ሻሎ ምንጅያ ኬꬃን ደእያባ ኡባ ኤንታ በስስ። ባ ሶን ዎይኮ ባ ጋꬎን ደእያባ ኡባፈ ህዝቅያስ ኤንታ በሶና አግዳባይ አይብካ ባዋ።

14 ናበይ እሳያስ ካዋ ህዝቅያሳኮ ብድ፥ “ሀ አሳት ዎይግዶና? ኤንቲ አዉፐ ይዶና?” ያግድ ኦይችስ።

ህዝቅያስ፥ “ኤንቲ ታኮ ሃሆ ቢታፈ፥ ባብሎነፐ ይዶሶና” ያግስ።

15 እሳያስ፥ “ኤንቲ ነ ሶን አይ አይ በእዶና?” ያግስ።

ህዝቅያስ፥ “ኤንቲ ታ ጋꬎን ደእያ ኡባ በእዶሶና፤ ታ ሻሎ ምንጅያ ኬꬃን ደእያባፐ ታኒ ኤንታ በሳቦናባይ ባዋ” ያግስ።

16 እሳያስ ህዝቅያሳኮ፥ “ጎዳይ ግያባ ስአ። 17 ‘ሄኮ፥ ነ ጋꬎን ደእያባ ኡባይነ ነ ማይዛት ሀች ጋካናዉ ሺሽዳባ ኡባይ ድኤትድ፥ ባብሎነ ቢታ ባና ጋላስ ያና፤ እያፐ አይብካ አተና። 18 ቃስ ነዉ የለታና፥ ነ አሾነ ነ ሱꬁ ግድዳ ነ አደ ናይት ድኤትድ ብድ፥ ባብሎነ ካዎ ጋꬎን ሹፋ ግድድ ኦꬃና’ ” ያግስ።

19 ህዝቅያስ ዛሪድ፥ “ኔኒ ኦድዳ ጎዳ ቃላይ ሎኦ” ያግስ። ህዝቅያስ፥ “ታኒ ደእዳ ላይꬃን ሳሮይነ ዎፓተꬅ ዳና ግደነ” ያግድ ቆፕስ።

20 ህዝቅያስ ሀንዳ ሀራባይ፥ እያ ምኖተꬃይነ ሃꬃ ዜርድ፥ ቢታ ግዶራ ሃ ካታማ ገልስዳባይ ይሁዳ ካዎታ ታርከ ማፃፋን ፃፈትስ። 21 ህዝቅያስ ሀይቅድ፥ ባ ማይዛታን ጋሄትስ፤ እያ በሳን እያ ናአይ ምናሰይ ካዎትስ።