1 ምናሰይ ካዎትያ ዎደ እያዉ ላይꬅ ታማነ ናምአ፤ እ የሩሳላመን እሻታማነ እቻሹ ላይꬅ ካዎትስ፤ እያ አየ ሱንꬃይ ሄፍሴቦ።

2 ጎዳይ እስራኤለ አሳ ስንꬃፈ ጎድድ ከስዳ አሳታ ደኡዋ ዎጋ ካልድ፥ ምናሰይ ጎዳ ስንꬃን ኢታባ ኦꬅስ። 3 እያ አዋይ ህዝቅያስ ላልዳ፥ ꬎቃ ጎይኖ በሳታ እ ዛረድ ኬፅስ፤ እስራኤለ ካዎይ አካብ ኦꬅዳይሳዳ፥ ባኣለ ፆሳስ ያርሾ በሳታነ አሼራ ፆሰ ምስለታ መꬍስ። ቃስ ሳሎ ፆልንቶታ ኡባ ጎይንስ፤ ኤንታና ሀጋዝስ። 4 ጎዳይ፥ “ታኒ ታ ሱንꬃ የሩሳላመን ፄግሳና” ያግድ ኦድዳ ፆሳ ኬꬃን ሀራ ፆሳታስ ያርሾ በሳታ ጊግስስ። 5 ፆሳ ኬꬃን ደእያ ናምኡ ዳባባታን ሳሎ ፆልንቶታ ኡባስ ያርሾ በሳታ ጊግስስ። 6 ባ ናኣ ታማ ግዶራ አꬅስ። እ ባ ሁጰን ብታንቾነ ሙሩንያ አስ ግድድ፥ ማሮታነ ሞይትለታ ዞረ ኦይችስ። ጎዳ ስንꬃን ዳሮ ኢታባ ኦꬅድ፥ እያ ሀንቀꬅስ።

7 ማሰትድ ከይዳ አሼራ ፆሰ ምስልያ ኤህድ፥ ፆሳ ኬꬃ ግዶን ኤስስ። ሄ ፆሳ ኬꬃይ፥ ጎዳይ ዳዊታነ እያ ናኣ ሶሎሞነ፥ “እስራኤለ ዛረ ኡባ ግዶፈ ታኒ ዶርዳ ሀ ፆሳ ኬꬃን የሩሳላመን ታኒ ታ ሱንꬃ መርናዉ ፄግሳና። 8 እስራኤለ አሳ ታኒ ኪትዳ ኪታ ኡባነ ታ አይለይ ሙሰይ ኤንታዉ እምዳ ህግያ ኡባ ናግድ ኦꬅኮ፥ ታኒ ኤንታ ማይዛታስ እምዳ ቢታፈ ኤንታ ደንꬃዳ ꬋይስከ” ያግዳ ፆሳ ኬꬃ። 9 ሽን አሳይ ስኦናን እፅስ፤ ጎዳይ እስራኤለ አሳ ስንꬃፈ ꬋይስዳ ሀራ ካዎተꬃታፐ አꬍድ ኢታ ኦꬃና መላ ምናሰይ ኤንታ ባለꬅስ።

10 ጎዳይ ባ አይለ ግድዳ ናበታ ባጋራ ሀይሳዳ ያግስ፤ 11 “ይሁዳ ካዎይ ምናሰይ ሀ ቱና ኦሱዋ ኦꬅስ፤ ባፐ ካሰ ደእዳ አሞረ አሳ ኡባ ናጋራፐ አꬍያ ኢታ ናጋራ ኦꬅስ። ይሁዳ አሳ ባ መꬍዳ ኤቃ ምስልያ ጎይንስድ፥ ናጋራ ኦስስስ። 12 ጎዳይ፥ እስራኤለ ፆሳይ ሀይሳዳ ያጌስ፤ ‘ሄኮ፥ ስእያ አሳ ኡባ ሀይꬃስ ኢትያ ꬋዮ የሩሳላመ ቦላነ ይሁዳ ቦላ ኤሀና ሀናይስ። 13 ሳማረ ቦላ የግዳ ዋꬋ ዎዶሩዋ፥ የሩሳላመ ቦላ የጋና፤ አካባ ሶ አሳ ቦላ የድዳ ቱምብያ፥ የሩሳላመ ቦላ የዳና። እስ አስ ከረ ሜጭድ ጉፋንꬅድ መልሰይሳዳ፥ ታኒ የሩሳላመ ቁቻዳ ጉፋንꬃና። 14 ታ አሳፐ አትዳይሳታ ታኒ የጋ አጋና፤ ታኒ ኤንታ ኤንታ ሞርከታ ኩሸን አꬃዳ እማና። ኤንታ ሞርከት ኡባይ ኤንታ ኦይካናነ ቦንቃና። 15 ኤንታ ማይዛት ግብፀፈ ከዮሶፐ ሀች ጋካናዉ፥ ኤንቲ ታ ስንꬃን ኢታባ ኦꬅዳ ግሾነ ታና ሀንቀꬅዳ ግሾ፥ ታኒ ሀይሳ ኦꬃና’ ” ያግስ።

16 ምናሰይ ይሁዳ አሳ፥ ጎዳ ስንꬃን ናጋራ ኦስስዳይሳ ቦላ ጉጅድ፥ ፅሎ አሳ ዎꬍስ፤ የሩሳላመ ጋፃፐ ጋፃ ጋካናዉ፥ ሱꬃን ኩንꬅስ።

17 ምናሰይ ሀንዳ ሀራባይ፥ እ ኦꬅዳባይ፥ እ ኦꬅዳ ናጋራይ ይሁዳ ካዎታ ታርከ ማፃፋን ፃፈትስ። 18 ምናሰይ ሀይቅድ፥ ባ ማይዛታን ጋሄትስ፤ ባ ጋꬉዋ ማታን ደእያ ኦዛ ጋደን ሞገትስ፤ እያ በሳን እያ ናአይ አሞን ካዎትስ።

19 አሞን ካዎትያ ዎደ፥ እያዉ ላይꬅ ላታማነ ናምአ፤ እ የሩሳላመን ናምኡ ላይꬅ ካዎትስ። እያ አየ ሱንꬃይ ማሱላሞ፤ እያ ዮፅባ አድያ ሀሩሰ ናአ። 20 እያ አዋይ፥ ምናሰይ ኦꬅዳይሳዳ፥ አሞነይካ ጎዳ ስንꬃን ኢታባ ኦꬅስ። 21 እ ባ አዋይ ሄመትዳ ኦግያን ሄመትስ፤ ባ አዋይ ኦꬅዳ ኤቃታስ እካ ኦꬅስ፤ ኤንታ ጎይንስ። 22 ጎዳ፥ ባ ማይዛታ ፆሳ አግስ፤ ጎዳ ኦግያን እ ሄመትቤና።

23 አሞነ ሹማት እያ ቦላ ማቀትድ፥ ካዎ ጋꬎን እያ ዎꬍዶሶና። 24 ሄሳፈ ጉየ፥ ይሁዳ አሳይ ካዋ አሞነ ቦላ ማቀትዳ ኡባታ ዎꬍዶሶና። አሞነ በሳን እያ ናኣ እዮስያሳ ካዎꬅዶሶና።

25 አሞን ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ። 26 አሞን ኦዛ ጋደን ባ ዱፉዋን ሞገትስ፤ እያ በሳን እያ ናአይ እዮስያስ ካዎትስ።