1 እዮስያስ ካዎትያ ዎደ፥ እያዉ ላይꬅ ሆስፑና፤ እ የሩሳላመን ሀስታማነ እስ ላይꬅ ካዎትስ። እያ አየ ሱንꬃይ ይድዳ፤ እያ ባፁሮታ አድያ አዳያ ናአ። ኤርም 3:6. 2 እዮስያስ ጎዳ ስንꬃን ሱረባ ኦꬅስ፤ ኡሻች ሀድርስ ጎና ባ ማይዛ ዳዊታ ኦግያን ሄመትስ።

3 ካዎይ እዮስያስ ባ ካዎትዳ ታማነ ሆስፑንꬆ ላይꬃን፥ ማሱላማ ናኣ ናኣ፥ ኤዛላሳ ናኣ፥ ዋና ፃፍያ ሳፋና፥ ፆሳ ኬꬃን ሀይሳዳ ያግድ ኪትስ። 4 “አሳይ ፆሳ ኬꬅ ኤህን፥ ፆሳ ኬꬃ ፐንግያ ናገይሳት አሳፐ ሺሽዳ ሚሽያ ታይባናዳ፥ ካህነ ሀላቃ ካልቀኮ ባ። 5 ካህነ ሀላቃይ ሚሽያ ፆሳ ኬꬃ ኦራꬃናዉ ሀላቃታስ እማና መላ ኦዳ። ኤንትካ ፆሳ ኬꬃ ኦራꬅያ ኦሳንቾታስ፥ 6 አናፀታስ፥ ግምበይሳትስነ ሹቹ ማሰይሳታስ ቃንፆ። ቃስ ፆሳ ኬꬃ ኦራꬃናዉ፥ ምꬅነ ቆኤትዳ ሹቹ ሻመይሳታስ ቃንፆ። 7 ኦሱዋ አዋተꬃን ፄለይሳት አማንꬅያ አስ ግድያ ግሾ፥ ኤንታ ኩሸን ገልዳ ሚሽያን አይ አይ ኦꬅዳኮ፥ ኤንታ ኦይቻናዉ ኮሸና”2 ካዎ 12:15. ያግስ።

8 ሄሳፈ ጉየ፥ ካህነ ሀላቃይ ካልቀይ ዋና ፃፍያ ሳፋናኮ፥ “ህገ ማፃፋ ፆሳ ኬꬃን ደማስ” ያግስ። ማፃፋ ሳፋናስ እምን ሳፋን ኤክድ ናባብስ።

9 ዋና ፃፈይ ሳፋን ካዋኮ ብድ፥ “ፆሳ ኬꬃን ደእያ ሚሽያ ነ ሹማት ኤክድ፥ ፆሳ ኬꬃ ኦራꬃናዉ ሀላቃታስ እምዶሶና” ያግስ። 10 ካልድ፥ ዋና ፃፈይ ሳፋን፥ “ካህነይ ካልቀይ ታዉ እምዳ ማፃፋ ሀይሳ በአ” ያግድ ካዋ ስንꬃን ማፃፋ ናባብስ።

11 ናባብን ካዎይ ህገ ማፃፋን ደእያ ቃላ ስእዳ ዎደ፥ አዛንድ ባ ማኡዋ ዳክስ። 12 ካዎይ፥ ካህንያ ካልቀ፥ ሳፋና ናኣ አክቃማ፥ ምክያሳ ናኣ አክቦራ፥ ዋና ፃፍያ ሳፋናነ ካዋ ኦሳንቹዋ አሳያ ሀይሳዳ ያግድ ኪትስ። 13 “ብድ፥ ታ ግሾ፥ ሀ አሳ ግሾነ ይሁዳ ኡባ ግሾ፥ ሀ በንትዳ ማፃፋ ቃላባ አነ ጎዳ ኦይችተ። ኑኒ ፃፈትዳ ኡባባ ኦꬃናዉ፥ ኑ ማይዛት ሀ ማፃፋ ቃላስ ኪተትቦና ግሾ፥ ኑ ቦላ ሱልዳ ጎዳ ሀንቆይ ዳሮ” ያግስ።

14 ያግን ካህነይ ካልቅያስ፥ አክቃም፥ አክቦር፥ ሳፋንነ አሳይ ማጫ ናብዉ ህልዳና ኦይቻናዉ ብዶሶና። ህልዳና ሀርሃሳ ናኣ ትቅዋ ናአ፥ ፆሳ ኬꬃ ማኡዋ ናግያ ሳሌማ ማቾ። እያ የሩሳላመን ናምአንꬆ ጉታን ደአውሱ። ሄ ብዳ አሳት ኢራ ኦደትዶሶና።

15 ህልዳና፥ “ጎዳይ እስራኤለ ፆሳይ ሀይሳዳ ያጌስ፤ ህንተና ታኮ ኪትዳ አድያስ ኦድተ። 16 ጎዳይ ሀይሳዳ ያጌስ፤ ‘ይሁዳ ካዎይ ናባብዳ ማፃፋን ፃፈትዳ ኢታ ቃላ ኡባ ታኒ ሀ በሳኒኔ ኢያን ደእያ አሳ ቦላ ኤሀና ሀናይስ። 17 ኤንቲ ታና አግድ፥ ሀራ ፆሳታስ እፃነ ጩይስዶሶና፤ ኤንቲ ባንታ ኩሸን ኦꬅዳባ ኡባን ታና ሀንቀꬅዶሶና። ሄሳ ግሾ፥ ታ ሀንቆይ ሀ በሳ ቦላ ኤፅስ፤ ቶአናዉ ዳንዳኤና’ ያጌስ። 18 ጎዳ ኦይቻናዉ ህንተና ኪትዳ ካዋኮ ሀይሳዳ ያግተ፤ ‘ጎዳይ እስራኤለ ፆሳይ ኔኒ ስእዳ ቃላባ ሀይሳዳ ያጌስ። 19 ታኒ ሀ በሳኒኔ ኢያን ደእያ አሳ ባደꬃስነ ꬋዮስ አꬃዳ እማና ግዳ ቃላ ስእዳ ዎደ፥ ነ ዎዛናይ ሹግን፥ ታ ስንꬃን ነና ካዉሽዳ ግሾነ ነ ማኡዋ ዳካዳ፥ ታ ስንꬃን ዬክዳ ግሾ፥ ታኒ ነ ዎሳ ስአስ። 20 ሄሳ ግሾ፥ ታኒ ነና ሳሮን ነ ማይዛታን ጋꬃና፤ ኔኒ ሳሮ ሞገታና። ታኒ ሀ በሳኒኔ ኢያን ደእያ አሳ ቦላ ኤሀና ኢታባ ነ አይፈይ በኤና’ ያጌስ” ያጋሱ። ኤንቲ ብድ፥ ሀ ኦደትዳባ ካዋስ ኦድዶሶና።