23
እዮስያስ ኤቃ ጎይኖ ꬋይስስ
(2 ታር 34:3-7፥ 29-33)
1 ካዎይ እዮስያስ ይሁዳ ጭማታነ የሩሳላመ ጭማታ ኡባ ሺሽስ። 2 ካዎይ ፑደ ፆሳ ኬꬅ ከይስ፤ ይሁዳ አሳይ፥ የሩሳላመን ደእያ አሳይ፥ ካህነትነ ናበት፥ ጉꬃፈ ግታ ጋካናዉ ኡባይ እያራ እስፈ ፑደ ፆሳ ኬꬅ ከይዶሶና። ፆሳ ኬꬃፈ በንትዳ ጫቆ ቃላ ማፃፋ ኡባ ካዎይ ኤንታዉ ናባብስ። 3 ካዎይ ቱሳ ማታን ኤቅድ፥ ኤንቲ ጎዳ ኦግያን ሄመታናነ፥ እያ ህግያ፥ እያ ዎጋነ እያ ኪታ ኩመꬃ ዎዛናንነ ኩመꬃ ቆፋን ናጋናዉ፥ ቃስ ሀ ማፃፋን ፃፈትዳ ጫቁዋ ኦꬃናዉ ጎዳ ስንꬃን ጫቅስ። አሳ ኡባይካ እያራ ጫቅዶሶና።
4 ካዎይ ካህነ ሀላቃ ካልቀ፥ እያፐ ጋርሳራ ደእያ ካህነታነ ፐንገ ናገይሳታ ባኣለ፥ አሼራነ ሳሎ ፆልንቶታ ጎይናናዉ ጊግስዳ ሚሸታ ኡባ ፆሳ ኬꬃፈ ከሳናዳ ኪትስ። ካዎይ ሄሳታ የሩሳላመፐ ጋፃ ከስድ፥ ቀድሮና ዛንጋራን ፁግድ፥ ብዱዋ ቤተለ ኤፍስ።
5 ይሁዳ ካታማታንነ የሩሳላመ ዩሹዋን ደእያ ꬎቃ ጎይኖ በሳ ኡባን እፃነ ጩይሳናዉ ይሁዳ ካዎት ሱንꬅዳ ኤቃታ ካህነታ ኡባ ኦሶፐ ከስስ። ባኣለስ፥ አዋስ፥ አጌናስ፥ ፆልንቶታስነ ሳሎን ደእያ ሀራ መተꬃታስ እፃነ ጩይሰይሳታ ኡባ ድግስ።
6 አሼራ ፆሰ ምስልያ ፆሳ ኬꬃፈ ከስድ፥ የሩሳላመ ካታማፐ ጋፃ ኤፍድ፥ ቀድሮና ዛንጋራ ኤፍድ፥ ያን ፁግስ። ፁገትዳይስ ጋጭድ፥ ꬊለ ከስስ፤ ባና ደርያ ዱፎ ቦላ ላልስ።
7 ፆሳ ኬꬃ ግዶን ጎይኖ ዎጋ ኦꬅድ፥ አደይ አደራ ላይማትያ ኬꬃታ ላልስ፤ ሄ ኬꬃታን ማጫሳት አሼራ ኤቄስ ገሸ ሱቆሶና።
8 እዮስያስ ካህነታ ኡባ ይሁዳ ካታማታፐ ኤህድ፥ ካሰ ካህነት እፃነ ጩይስያ ꬎቃ ጎይኖ በሳታ፥ ግብአፐ ብድ በርሳበ ጋካናዉ ደኤይሳታ ቱንስስ። ካታማ ሃርያ እያሱ ፐንግያፈ ሀድርሳ ባጋራ ደእያ ꬎቃ ጎይኖ በሳካ ላልስ። 9 ꬎቃ ጎይኖ በሳ ካህነት የሩሳላመን ጎዳ ያርሾ በሳ ፑደ ዮኮና፤ ሽን ኤንቲ ሀራ ካህነታራ እስፈ እርሾይ ገልቦና ዳቦ ሞሶና።
10 ካዎይ እዮስያስ ሄኖማ ዛንጋራን ደእያ ቶፈታ ያርሾ በሳ ቱንስስ። ሞሎካ ፆሳስ እስ አስካ ባ አደ ናኣ ዎይካ ማጫ ናአ ታማ ግዶራ አꬆና መላ ድግስ። ሌወ 18:1፤ ኤርም 7:31፤ 19:1-6፤ 32:35.
11 ይሁዳ ካዎት ፆሳ ኬꬃ ገልያ ፐንግያን አዋስ ዱማይድ ዎꬅዳ ፓራታ ድግስ። አዋ ፓራት ናታን-መለካ ሀላቃ ክፍልያ ማታን ደእያ ዳባባን ደኦሶና። ሄሳፈ ጉየ፥ አዋስ ዱማይድ ዎꬅዳ ፓራ ጋረታ እዮስያስ ታማን ፁግስ።
12 አካዛ ኬꬃ ፖቅያ ቦላ ይሁዳ ካዎት ጊግስዳ ያርሾ በሳታን ምናሰይ ፆሳ ኬꬃን ደእያ ናምኡ ዳባባታ ግዶን ጊግስዳ ያርሾ በሳታ ካዎይ እዮስያስ ላልስ። ኤንታ ሄ በሳፈ ድግድ ትንቸረꬅድ፥ ቀድሮና ዛንጋራን ሆልስ። 2 ካዎ 21:5፤ 2 ታር 33:5.
13 ካዎይ የሩሳላመ ካታማፐ ዶሎሀ ባጋራ፥ ቱናተꬃ ዙማፐ ዱገሀ ባጋን ደእያ ꬎቃ ጎይኖ በሳታ ቱንስስ። ሄ ꬎቃ በሳት እስራኤለ ካዎይ ሶሎሞነይ፥ ቱና ፆሳታ፥ ስዶና ፆሰ አስታሮቶ፥ ሞአበ ፆሳ ካሞሻነ አሞነ ፆሳ ሞሎካ ጎይናናዉ ጊግስዳ ꬎቃ በሳታ። 14 ካዎይ እዮስያስ ጎይኖ ሹቻ ቱሳታካ መንረꬅድ፥ አሼራ ፆሰ ምስለታካ ቃንፀረꬅስ። ኤንቲ ኤቅዳ በሳን ሀይቅዳ አሳ መቀꬅ ኩንꬅስ።
15 እስራኤለ አሳ፥ ናጋራ ኦስስዳ ናባፃ ናአይ እዮርባም ቤተለን ꬎቃ በሳን ጊግስዳ ያርሾ በሳ ካዎይ እዮስያስ ላልስ። ላልድ ሄ ያርሾ በሳ ሹቻታካ መንረꬅድ፥ ꬊለ ከስስ፤ አሼር ምስልያካ ፁግስ። 16 ሄሳፈ ጉየ፥ እዮስያስ ዩሹዋ ፄልድ፥ ዙማ ላንቀን ደእያ ዱፎታ በእስ፤ መቀꬃታ ዱፎታፐ ከስድ፥ ያርሾ በሳ ቦላ ዎꬅድ፥ ታማን ፁግስ። ያትድ ያርሾ በሳ ቱንስስ። ሄስ ሀንዳይ ፆሳ አስ ካሰ አዋጅዳ ጎዳ ቃላ ማራና። 17 ሄሳፈ ጉየ ካዎይ፥ “ሀ በንተይስ ኦደ ዱፎ?” ያግድ ኦይችስ።
ቤተለ አሳይ፥ “ይሁዳፐ ይድ፥ ቤተለ ያርሾ በሳ ቦላ ሀእ ኔኒ ኦꬅዳባይ ፖለታናይሳ ካሰትድ ኦድዳ ናብያ ዱፎ” ያግዶሶና። 1 ካዎ 13:30-32.
18 ካዎይ፥ “ደኦ ጊተ፤ ኦንካ እያ መቀꬃ ሀይሳፈ ቃꬆፎ” ያግስ። ሄሳ ግሾ፥ ሳማረፐ ይዳ ናበት አድያ መቀꬃራ እስፈ እያ መቀꬃ ቦቾና አጋግዶሶና።
19 እስራኤለ ካዎት ሳማረ ካታማታን ኦስስድ፥ ጎዳ ሀንቀꬅዳ፥ ꬎቃ ጎይኖ በሳታ እዮስያስ ድግስ፤ ቤተለን ኦꬅዳይሳዳ፥ ኤንታ ቦላካ ኦꬅስ። 20 እ ጎይኖ ꬎቃ በሳን ኦꬅያ ካህነታ ኡባ ያርሾ በሳ ቦላ ዎꬍስ፤ ቃስ ሄ ያርሾ በሳ ቦላ አሳ መቀꬃ ፁግስ። ሄሳ ኡባ ኦꬅድ፥ የሩሳላመ ስምስ።
እዮስያስ ፓስካ ባኣለ ቦንችስ
(2 ታር 35:1-19)
21 ካዎይ አሳ ኡባ፥ “ሀ ጫቆ ማፃፋን ፃፈትዳይሳዳ ጎዳስ፥ ህንተ ፆሳስ ፓስካ ባኣለ ቦንችተ” ያግድ ኪትስ። 22 እስራኤለ ሃርያ ዳይናታ ዎደፐ ዶምድ፥ እስራኤለ ካዎታ ዎደነ ይሁዳ ካዎታ ዎደ ኡባን ሀይሳ መላ ፓስካ ባኣለ ኩመꬅ ቦንቸት ኤረና። 23 ሽን ካዎይ እዮስያስ ካዎትዳ ታማነ ሆስፑንꬆ ላይꬃን የሩሳላመ ካታማን ጎዳ ቦንቻናዉ ፓስካ ባለይ ቦንቸትስ።
24 ካህነ ሀላቃይ ካልቅያስ ፆሳ ኬꬃን በንትዳ ማፃፋን ፃፈትዳ ህግያ ቃላ ምንꬃናዳ፥ ቱና አያና ፄገይሳታነ ማሮታ፥ ሶ ግዶ ኤቃ ምስለታ፥ ኤቃ ሚሸታነ ይሁዳ ቢታንነ የሩሳላመ ካታማን በንትዳ ሀራ እፀትዳባታ ኡባ እዮስያስ ꬋይስስ። 25 ሙሰ ህግያዳ ባ ኩመꬃ ዎዛናን፥ ባ ኩመꬃ ሸምፑዋንነ፥ ባ ኩመꬃ ዎልቃን ጎዳኮ ስምዳ እዮስያሳ መላ ካዎይ፥ እያፐ ካሰ ግድን፥ እያፐ ጉየ ደንድቤና።
26 ምናሰይ ጎዳ ሀንቀꬃናዉ ኦꬅዳ ኢታ ኦሶ ኡባ ግሾ፥ ጎዳይ ይሁዳ ቦላ ሀንቀትዳ ባ ሸንያፐ ስምቤና። 27 ጎዳይ፥ “ታኒ እስራኤለ ታ ስንꬃፈ ድግዳይሳዳ፥ ይሁዳካ ታ ስንꬃፈ ድጋና፤ ታኒ ዶርዳ ካታማ፥ የሩሳላመነ ‘ታ ሱንꬃይ ሀይሳን ዳና’ ግዳ ሀ ኬꬃ ድጋና” ያግስ።
እዮስያሳ ካዎተꬃ ዉርሰꬃ
(2 ታር 35:20—36:1)
28 እዮስያስ ሀንዳ ሀራባይነ እ ኦꬅዳባይ ኡባይ ይሁዳ ካዎታ ታርከ ማፃፋን ፃፈትስ። 29 እዮስያሳ ዎደ ግብፀ ካዎይ ናኮይ፥ አሶረ ካዋ ኦላን ማዳናዉ ኤፍራፂሳ ሻፋ ብስ። ካዎይ እዮስያስ እያራ ኦለታናዉ ባ ኦላንቾታ ኤክድ ከይስ። ሽን ካዎይ ናኮይ እያራ ማግዶን ጋሄትድ፥ እያ ዎꬍስ። 30 አይለት እያ አሀ ፓራ ጋረ ቦላ ዎꬅድ፥ ማግዶፐ የሩሳላመ ኤህድ፥ እያ ቡዞ ዱፉዋን ሞግዶሶና። ሄ ቢታ አሳይ እዮስያሳ ናኣ እዮአካዛ ዶርድ፥ እያ አዋ በሳን እያ ትይድ ካዎꬅዶሶና።
ይሁዳ ካዋ እዮአካዛ
(2 ታር 36:2-4)
31 እዮአካዝ ካዎትያ ዎደ፥ ላይꬅ እያዉ ላታማነ ሄꬓ፤ እ የሩሳላመን ሄꬑ አጌና ካዎትስ። እያ አየ ሱንꬃይ ሀሙፃሎ፤ እያ ልብና ካታማ ደእያ ኤርምያሳ ናአ። 32 እያ ማይዛት ኦꬅዳይሳዳ፥ እዮአካዝ ጎዳ ስንꬃን ኢታባ ኦꬅስ። 33 እዮአካዝ የሩሳላመን ካዎተናዳ ግብፀ ካዎይ ናኮይ ሀማታ ቢታን እርብላን እያ ቃችድ ሄꬑ ሙኩሉነ ኦይዱ ፄቱ ክሎ ግራመ ዴፅያ ብራነ ሀስታማነ ኦይዱ ክሎ ግራመ ዴፅያ ዎርቃ ይሁዳ አሳ ጊርስስ። 34 ካዎይ ናኮይ እዮስያሳ ናኣ ኤልያቄመ እያ አዋ በሳን ካዎꬅስ፤ እያ ሱንꬃ እዮአቄማ ያግድ ላምስ። ሽን እዮአካዛ ግብፀ ኤፍን፥ እ ያን ሀይቅስ። ኤርም 22:11-12.
ይሁዳ ካዋ እዮአቄማ
(2 ታር 36:5-8)
35 እዮአቄም፥ ካዎይ ናኮይ ኦይችዳ ብራነ ዎርቃ ጊራ እያዉ እሚስ። ሄ ጊራ ቃንፃናዉ እዮአቄም ሄ ቢታ አሳይ ደምያ ኬና ብራፐነ ዎርቃፈ ጊራ ሺሽስ።
36 እዮአቄም ካዎትያ ዎደ ላይꬅ እያዉ ላታማነ እቻሻ፤ እ የሩሳላመን ታማነ እስ ላይꬅ ካዎትስ። እያ አየ ሱንꬃይ ዛብዶ፤ እያ ሩማ ካታማን ደእያ ፓዳያ ናአ። ኤርም 22:18-19፤ 26:1-6፤ 35:1-19. 37 እዮአቄም ባ ማይዛት ኦꬅዳይሳዳ፥ ጎዳ ስንꬃን ኢታባ ኦꬅስ።