1 እዮአቄማ ዎደ ባብሎነ ካዎይ ናቡካዳናፆር ይሁዳ ቦላ ደንድስ። እዮአቄም እያዉ ሄꬑ ላይꬃ ሃረትዳፐ ጉየ፥ ናቡካዳናፆራ ቦላ ማካልስ። ኤርም 25:1-38፤ ዳነ 1:1-2. 2 ጎዳይ ካልዳወታ ፓኖታ፥ ሶረ ፓኖታ፥ ሞአበ ፓኖታነ አሞነ ፓኖታ እዮአቄማ ቦላ የድስ፤ ባ አይለታ ናበታ ባጋራ ጎዳይ ካሰ ኦድዳይሳዳ፥ ይሁዳ ቢታ ꬋይሳናዳ ሀይሳታ የድስ። 3 ካዎይ ምናሰይ ኦꬅዳ ናጋራ ጋሶን ጎዳይ ይሁዳ አሳ ባ ስንꬃፈ ድጋናዉ ሀ ꬋዩዋ የድስ። 4 እ ፅሎ አሳ ሱꬁ ጉስድ፥ የሩሳላመን ኩንꬅዳ ግሾ፥ ጎዳይ ምናሰስ ሄ ናጋራ አቶ ጋናዉ ኮይቤና።

5 እዮአቄም ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ። 6 እዮአቄም ሀይቅድ፥ ባ ማይዛታ ጋክስ፤ እያ በሳን እያ ናአይ ዮአክን ካዎትስ። 7 ግብፀ ካዎይ ናምአንꬆ ባ ቢታፈ ደንድድ፥ ኦላስ ይቤና፤ ግብፀ ሻፋፐ ዶምድ፥ ብድ ኤፍራፂሳ ሻፋ ጋካናዉ፥ ግብፀ ካዎይ ሃርዳ ቢታ ኡባ ባብሎነ ካዎይ ኤክስ።

8 ዮአክን ካዎትያ ዎደ ላይꬅ እያዉ ታማነ ሆስፑና፤ ዮአክን፥ የሩሳላመን ሄꬑ አጌና ካዎትስ። እያ አየ ሱንꬃይ ናስታ፤ እያ የሩሳላመ አድያ ኤልናታና ናአ። 9 ዮአክን ባ አዋይ ኦꬅዳይሳዳ፥ ጎዳ ስንꬃን ኢታባ ኦꬅስ።

10 ሄ ዎደ ባብሎነ ካዋ ናቡካዳናፆራ ኦላንቾት የሩሳላመ ይድ፥ ካታማ ተቅዶሶና። 11 ባብሎነ ካዎይ ናቡካዳናፆር ሄ ካታማ ይስ። 12 ይሁዳ ካዎይ እዮአክና፥ እያ አይያ፥ እያ አይለት፥ እያ ሀላቃትነ ካዎ ጋꬎ ሹማት ኡባይ ባብሎነ ካዋስ ኩሸ እምዶሶና። ኤርም 22:24-30፤ 24:1-10፤ 29:1-2.

ዮአክን ካዎትዳ ሆስፑንꬆ ላይꬃን፥ ባብሎነ ካዎይ ዮአክና ቃችስ። 13 ፆሳ ኬꬃነ ካዎ ጋꬎን ደእያ ሻሉዋ ኡባ ሄ በሳፈ ደንꬅድ ኤፍስ። ጎዳይ ካሰ ኦድዳይሳዳ ካዎይ ሶሎሞነይ ፆሳ ኬꬃን ጊግስዳ ዎርቃ ሚሸታ ኡባ ባብሎነ ካዎይ ቃንፀረꬅስ። 14 ናቡካዳናፆር የሩሳላመ አሳ፥ ሀላቃታ ኡባ፥ ኦላንቾታ ኡባ፥ ኩሸ ሂላንቾታነ ብራታ ቆፀይሳታ ኡባ፥ 10,000 አሳ የሩሳላመፐ ድእድ ኤፍን፥ ቢታን ማንቆ አሳ ፃላል አትስ።

15 ናቡካዳናፆር እዮአክና ድእድ፥ እያ አይዉ፥ እያ ማቸታ፥ እያ ሞርናትነ ቢታን ደእያ ግታ አሳ ኡባ ባብሎነ ኤፍስ። ህዝ 17:12. 16 ሄ አሳፐ 7,000 አሳት ኦላንቾታ፤ 1,000 አሳት ዱማ ዱማ ኩሸ ሂላንቾታ፤ ኤንቲ ኡባይ ምኖነ ኦላ ኦለታናዉ ዳንዳኤይሳታ። 17 ሄሳፈ ጉየ፥ ባብሎነ ካዎይ ዮአክና በሳን እያ አዋ እሻ ማታና ካዎꬅስ፤ እያ ሱንꬃ ሰደቅያሳ ያግድ ላምስ። ኤርም 37:1፤ ህዝ 17:13.

18 ሰደቅያስ ካዎትያ ዎደ፥ ላይꬅ እያዉ ላታማነ እስኖ፤ እ ታማነ እስ ላይꬅ የሩሳላመን ካዎትስ። እያ አየ ሱንꬃይ አምፃሎ፤ እያ ልባና ካታማን ደእያ ኤርምያሳ ናአ። ኤርም 27:1-22፤ 28:1-17. 19 እዮአቄም ኦꬅዳይሳዳ፥ ሰደቅያስ ጎዳ ስንꬃን ኢታባ ኦꬅስ። 20 ጎዳይ ሀንቀትዳ ግሾ፥ የሩሳላመ አሳ ቦላነ ይሁዳ አሳ ቦላ ሀይስ ሀንስ፤ ዉርሰꬃን ኤንታ እ ባ ስንꬃፈ ድግስ።

ሰደቅያስ ባብሎነ ካዋ ቦላ ማካልስ። ህዝ 17:15.