25
1 ሰደቅያስ ካዎትዳ ኡዱፉንꬆ ላይꬅ፥ ታማንꬆ አጌናን፥ ታማንꬆ ጋላስ፥ ባብሎነ ካዎይ ናቡካዳናፆር ባ ኦላንቾታ ኡባ ኤክድ፥ የሩሳላመ ተቅስ፤ እያ ዩሹዋን ቢታ ዶርድ ተቅስ። ኤርም 21:1-10፤ 34:1-5፤ ህዝ 24:2. 2 ሰደቅያስ ካዎትዳ ታማነ እስንꬆ ላይꬅ ጋካናዉ፥ ካታማይ ተቀትድ ጋምእስ።
3 ሄሳ ጋሶን ቢታን ኮሽ ሱልን፥ ሄ ላይꬅ ኦይዳንꬆ አጌናን፥ ኡዱፉንꬆ ጋላሳን አሳስ ምያባይ ꬋይስ። 4 ካታማ ዩሾ ግምበይ እስ ባጋራ መቅን፥ ካልዳወት ዩይ አꬍድ ናግኮካ፥ ይሁዳ ካዋ ኦላንቾት ኩመꬅ ቃማ ካዎ ጋደ ኤፍያ ኦግያ ኦይክድ፥ ናምኡ ድርሳ ግምበት ጋሄትያ ፐንግያራ ከይድ ባቃትዶሶና። ኤንቲ ዮርዳኖሰ ድልባኮ ስሚድ ባቃትዶሶና። ህዝ 33:21. 5 ሽን ባብሎነ ኦላንቾት ካዋ የደꬅድ፥ እያርኮ ደምባ ጋꬅሸ ኦይክዶሶና። እያ ኦላንቾት ኡባይ እያፐ ሻከትድ ላለትዶሶና። 6 ሄሳፈ ጉየ፥ ኤንቲ እያ ራብላ ካታማን ደእያ ናቡካዳናፆራኮ ኤፍዶሶና። ባብሎነ ካዎይ ሰደቅያሳ ቦላ ፕርድስ። 7 ሰደቅያሳ ናይታ፥ ሰደቅያስ ፄልሽን ዎꬍዶሶና። እያ አይፈታ ዎጭ ከስድ፥ ሳንꬃላታን ቃችድ፥ ባብሎነ ቢታ ኤፍዶሶና። ህዝ 12:13.
ፆሳ ኬꬃ ላለተꬅ
(ኤርም 52:12-33)
8 ናቡካዳናፆር ባብሎነን ካዎትዳ ታማነ ኡዱፉንꬆ ላይꬃን፥ እቻሻንꬆ አጌናን፥ ላፑንꬆ ጋላሳን፥ ካዋ ሞርናታፐ እሶይ፥ ካዋ ናገይሳታ ሀላቃይ ናቡዛርዳን የሩሳላመ ገልስ። 9 ፆሳ ኬꬃ፥ ካዎ ጋꬎነ የሩሳላመን ደእያ ኬꬃ ኡባ፥ ግታ ኬꬅ ጌተትያ ኡባ ፁግስ። 10 ባብሎነ ኦላንቾት ኡባይ ካዋ ናገይሳታ ሀላቃ ኪታን የሩሳላመ ካታማ ዩሹዋን ደእያ ድርሳ ግምብያ ኡባ ላልዶሶና። 11 ናቡዛርዳን ካታማንነ ይሁዳን አትዳ አሳታ፥ ካድድ ባብሎነ ኦላንቾታን ጋሄትዳ አሳታ ኡባ ኦይክድ፥ ድእድ ኤፍስ። 12 ሽን ናቡዛርዳን ዉርሰꬃ ማንቆታፐ ጉꬃታ ዎይነ ቶካናዳነ ጋደ ጎያናዳ ይሁዳን አሽስ።
13 ባብሎነ አሳት ፆሳ ኬꬃን ደእያ ናሰ ብራታፐ መꬍዳ ቱሳታ፥ ጫና ጋረታነ ግታ ከረታ መንረꬅዶሶና፤ ናሰ ብራታ ኡባ ባብሎነ ኤፍዶሶና። 1 ካዎ 7:15-26፤ 2 ታር 3:15-17. 14 ከረታ፥ አካፋታ፥ ፆምፐ ፄራ ፕትያባታ፥ ጭልፓታነ ያርሾ ዎደ ጎኤትያ ናሰ ብራታ ሚሸታ ኡባ ኤፍዶሶና። 1 ካዎ 7:45፤ 2 ታር 4:16. 15 ካዋ ናገይሳታ ሀላቃይ ናቡዛርዳን ዎርቃፈ ኦሰትዳ ሚሸታ ዎርቃꬆ፥ ብራፐ ኦሰትዳ ሚሸታ ብራꬆ ኦꬅ ኤክድ፥ እፃነ ጩይስያ ሻተታነ ፃሮታ ኡባ ኤፍስ። 16 ካዎይ ሶሎሞነይ ፆሳ ኬꬃ ኦሶስ ጊግስዳ ናምኡ ቱሳታ፥ ግታ ከረታነ ጫና ጋረታ፥ ናሰ ብራታ ምዛነን ልካናዉ ዳንዳኤትቤና። 17 ናምኡ ቱሳት እስ መላ ግድድ፥ እሱዋ እሱዋ ጌሳይ ታማነ ሆስፑን ዋꬋ፤ ቃስ እስ እስ ቱሳ ሁጰን ደእያ ጉምቦት ሄꬑ ዋꬋ አዱሰ። ሄ ጉምቦታ ዩሾይ ናሰ ብራታ ግተንነ ኦሮማነ ቴራ ምስለን አሌቀትስ።
ይሁዳ አሳ ድኤተꬅ
(ኤርም 52:24-27)
18 ካዋ ናገይሳታ ሀላቃይ ናቡዛርዳን፥ ካህነ ሀላቃ ሳራያ፥ እያ ካልያ ካህንያ ሶፎንያሳነ ፐንገ ናግያ ሀራ ሄꬑ አሳታ ኦይክስ። 19 ሄ ዎደይ ጋካናዉ፥ ካታማን ደእያ አሳፐ ይሁዳ ቶራ ሞጮና፥ ካዋ ዞረይሳታፐ እቻሹ አሳታ፥ ቶራ ሞጮናታ ፃፍያ፥ ኦላንቾታ ዶርያ ሀራ ኡሱፑን ታሙ አሳታ ኤፍስ። 20 ሀላቃይ ናቡዛርዳን ኤንታ ኡባ፥ ባብሎነ ካዋኮ ራብላ ካታማ ኤፍስ። 21 ባብሎነ ካዎይ ኤንታ ኡባ ሀማታ ቢታን ራብላ ካታማን ዎꬍስ። ሄሳዳ ሀንድ፥ ይሁዳ አሳይ ባንታ ቢታፈ ድኤትድ ብዶሶና።
22 ካዎይ ናቡካዳናፆር ሳፋና ናኣ ናኣ፥ አክቃማ ናኣ ጎዶልያ ይሁዳን አትዳ አሳ ቦላ ሹምስ። 23 ኩሸ እምቦና ይሁዳ ቶራ ሞጮናትነ ኦላንቾት ሄሳ ስእዳ ዎደ፥ ምፅጳን ደእያ ጎዶልያራ ጋሄትዶሶና። ሄ ሀላቃት ናታና ናኣ እስማኤላ፥ ቃረያ ናኣ ዮሃና፥ ናፆፋ አድያ ታንሁመታ ናኣ ሳራያነ ማካታ አድያ ያዛና ናኣ። 24 ጎዶልያ ኤንታዉነ ኤንታ ኦላንቾታስ “ሀይሳታስነ ኤንታ ሀላቃታስ ያዮፍተ። ሀ ቢታን ደእተ፤ ባብሎነ ካዋስ ሃረትተ፤ ሄሳ ህንተ ኦꬅኮ ኡባባይ ህንተዉ እንጀታና” ያግድ ኤንታዉ ጫቅስ።
25 ሽን ላፑንꬆ አጌናን፥ ካዎ ኮች ግድዳ ኤልሳማ ናኣ ናታና ናአይ እስማኤል ታሙ አሳራ ምፅጳ ብድ፥ ጎዶልያ፥ ይሁዳ አሳነ እያራ ደእያ ባብሎነ አሳ ኡባ ዎꬍስ። 26 ሄሳፈ ጉየ፥ ባብሎነ አሳስ ያይድ፥ ይሁዳ አሳይ፥ ጉꬅ ግት አቶናሽን፥ ቶራ ሞጮናት ኡባይ ግብፀ ቢታ ባቃትዶሶና።
ዮአክን ቃሾፐ ብለተꬃ
(ኤርም 52:31-34)
27 ዮአክን ድኤትድ ብዳ ሀስታማነ ላፑንꬆ ላይꬃን፥ ታማነ ናምአንꬆ አጌናን፥ ላታማነ ላፑንꬆ ጋላሳን፥ ዮር-ማሮዳክ*ዮር-ማሮዳካ፦ ሀራ ሱንꬃይ አመል-ማሮዳካ ጌተቴስ። ካዎትዳ ላይꬅ፥ ይሁዳ ካዋ ዮአክና ማርድ ቃሾፐ ብልስ። 28 ዮር-ማሮዳክ፥ ዮአክናራ ሎኦ ቃላ ኦደትድ፥ ባብሎነን ድኦን ደእያ ሀራ ካዎታ ኡባፈ አꬅድ፥ እያ ቦንችስ። 29 ሄሳ ግሾ፥ ዮአክን ቃሾ ኬꬃን ማእዳ ማኡዋ ላምድ፥ አትዳ ባ ደኦ ላይꬃ ኡባን ካዎ ጋይታፐ ምስ። 30 ጋላስ ጋላስ እያዉ ኮሽያባ ኡባ ባብሎነ ካዎይ እሚስ።