1 ሳኦላ ሶ አሳይነ ዳዊታ አሳይ ዳሮ ዎደ ኦለትዶሶና፤ ዳዊቲ ኦላን ምን ምን ብያ ዎደ ሳኦላ አሳይ ዳቡር ዳቡር ብስ።

2 ከብሮናን ዳዊታስ ናይት የለትዶሶና፤ እዝራኤለ አክናሆማ የልዳ ባይራ ናአይ አምኖና፤ 3 ቃርመሎሳ አብግያ ካሰ ናባላ ማችያ የልዳ ክልኣብ ናምአንꬆ ናአ። ጋሹራ ካዋ ታልማያ ናእያ ማእካ የልዳ አበሰሎመይ ሄꬓንꬆ ናአ። 4 ኦይዳንꬆይ ሃግታ ናኣ አዶና፤ እቻሻንꬆይ አብፃላ ናኣ ሳፋፃ። 5 ኡሱፑንꬆይ ዳዊታ ማቸ ኤግል ናኣ ይትራኣማ፤ ሀ ናይት ኡባይ ከብሮናን የለትዶሶና።

6 ሳኦላ ሶ አሳራነ ዳዊታ ሶ አሳራ ኦለትያ ዎደ አበኔር ሳኦላ አሳ ቦላ ምን ምን ብስ። 7 ሳኦላስ እዮሄላ ናአ ግድዳ እርፅፎ ጌተትያ እስ ላገꬅያ ደአዉሱ፤ እያቡስተይ አበኔራኮ፥ “ታ አዋ ላገራ አይስ አቃዲ?” ያግድ ኦይችስ።

8 አበኔር እያ ኦዳን ዳሮ ይሎትድ፥ “ታና ኔኒ ይሁዳኮ ስምዳ ጋታ ካና ጋድዬ? ታኒ ነ አዋ ሳኦላስ፥ እያ እሻታስነ እያ ዳቦታስ አማነታዳ ደአስ፤ ነናካ ዳዊታስ አꬃዳ እማብከ። ሽን ሀእ ኔኒ ታና ሀ ማጫሰ ግሾ ሞታሳ! 9 ፆሳይ ዳዊታስ ኦꬃና ግድ ጫቅዳ ቃላ ታኒ ፖሎና እፅኮ፥ ፆሲ ታና ፕርዶ። 10 ሳኦላ ኮቻፈ ካዎተꬃ ዎስስድ፥ ዳነፐ በርሳበ ጋካናዉ እስራኤለ ቦላነ ይሁዳ ቦላ፥ ዳዊታ አራታ ምንꬃናዉ ጎዳይ ጫቅስ” ያግስ። 11 እያቡስተይ አበኔራስ ያይዳ ግሾ ሀራ ቃላ ፖግቤና።

12 አበኔር ዳዊታኮ፥ “ቢታይ ኦሴ? ኔኒ ታራ ጫቃ፤ እስራኤለ አሳ ኡባይ ኔኮ ስማና መላ ታ ነና ማዳና” ያግድ አሰ ኪትስ።

13 ዳዊቲ፥ “ሎኦ! ታ ኔራ ጫቃና። ሽን ታኒ ነና እስባ ኦይቻይስ፤ ኔኒ ታና በአናዉ ያ ዎደ ሳኦላ ናእዉ መልኮሎ ኤኮና ዮፓ” ያግስ። 14 ሄሳፈ ጉየ፥ ዳዊቲ ሳኦላ ናአ እያቡስተኮ፥ “ፄቱ ፍልስፄመታ ቃራታዳ ኮይታ ኦꬃዳ እምዳ ታ ማችዉ መልኮሎ ታዉ እማ” ያግድ አሰ ኪትስ። 15 እያቡስተይ አሰ ኪትድ እ አዝና ላዉሻ ናአ ፓልፅኤላፐ ከስ ኤክስ። 16 እ አዝናይ ብራቅማ ካታማ ጋካናዉ ዬክሸ እ ጌዶ ካልስ። አበኔር እያኮ፥ “ጉየ ሶ ባ” ያግን አደይ ጉየ ስሚድ ብስ።

17 አበኔር እስራኤለ ጭማታኮ ብድ፥ “ዳዊቲ ህንተ ቦላ ካዎታና መላ ዳሮ ዎደ አሞትደታ። 18 ሀእ ፖልተ! ጎዳይ፥ ‘ታ አሳ እስራኤለ፥ ፍልስፄመታ ኩሸፐነ ኤንታ ሞርከታ ኡባ ኩሸፐ ታ አይልያ ዳዊታ ባጋራ አሻና’ ግዳይሳ ሀሳይተ” ያግስ። 19 አበኔር ብንያመ ኮቻታስ ሄሳ ኦድስ። እስራኤለ አሳይነ ብንያመ አሳ ኡባይ ኦꬃናዉ ኮይዳ ኡባ ዳዊታስ ኦዳናዉ አበኔር ከብሮና ብስ።

20 አበኔር ባራ ላታሙ አስ ኤክድ፥ ከብሮና ብን፥ ዳዊቲ እያዉነ እያ አሳስ ግብራ ጊግስስ። 21 አበኔር ዳዊታኮ፥ “ኤንቲ ኔራ ጫቃና መላነ ነ ዎዛናይ አሞትያ ኡባ ነ ሃራና መላ ታ ባዳ እስራኤለ አሳ ካዋስ ታ ጎዳስ ሺሻና” ያግስ። ያግን ዳዊቲ አበኔራ ሞይዝድ ሳሮ የድስ።

22 ሄ ዎደ ዳዊታ አሳይነ እዮኣብ ኦላፐ ዳሮባ ድእድ ስምዶሶና። ሽን ዳዊቲ እያ ሳሮ ባ ግድ የድዳ ግሾ፥ አበኔር ከብሮናን ዳዊታራ ዴና። 23 እዮኣብነ እያራ ደእያ ኦላንቾት ጋክያ ዎደ አሳይ፥ “ኔራ ናኣ አበኔር ካዋ ዳዊታኮ ይን፥ ካዎይ እያ የድን ሳሮ ብስ” ያግድ ኦድዶሶና።

24 ሄሳ ግሾ፥ እዮኣብ ካዋኮ ብድ፥ “ሄስ ዋንድ ሀንዴ? አበኔር ኔኮ ይን፥ አይስ የዳዲ? ሄኮ እ ብክችስ! 25 ኔራ ናአይ አበኔር ነና ጭማናዉ፥ ኔኒ ገልያሶነ ከያሶ በአናዉነ ኔኒ ኦꬅያ ኡባ ኤራናዉ ይስ” ያግስ።

26 እዮኣብ ዳዊታ ስንꬃፈ ከይድ፥ አበኔራ ጌዶ ኪታ የድን፥ ኤንቲ እያ ሲራ ኦላ ሃꬃ ማታፐ ጉየ ዛርዶሶና፤ ሽን ዳዊቲ ሄሳ ኤረና። 27 አበኔር ከብሮና ስሚድ ይዳ ዎደ እዮኣብ እያራ ዱማ ኦደታናዉ ኮይዳ ዳንስድ ድርሳ ፐንግያኮ ደእያ ክፍልያነ እያ ኤፍስ። ባ እሻ አሳሄላ ሱꬃ ዛራናዉ አበኔራ ኡሎን ጫድን አበኔር ሄ በሳን ሀይቅስ።

28 ዳዊቲ ጉየፐ ሄሳ ስእዳ ዎደ፥ “ታንነ ታ ካዎተꬃይ ኔራ ናኣ አበኔራ ሱꬃ ግሾ ጎዳ ስንꬃን መርናዉ ኦይሸቶኮ። 29 እያ ሱꬃይ እዮኣባነ እያ አዋ ሶ አሳ አቾ፤ ማዱንꬅ ደእያ አስ ዎይኮ ጎጋ ሀርገይ ደእያ አስ ዎይኮ ዎበ አስ ዎይኮ ማሻን ሀይቅያ አስ ዎይኮ ኮሻትያ አስ እዮኣባ ኮቻን ꬋዮፖ” ያግስ። 30 ጋባኦናን ከይዳ ኦላን ባንታ እሻ አሳሄላ አበኔር ዎꬍዳ ግሾ፥ እዮኣብነ እያ እሻ አብስ አበኔራ ዎꬍዶሶና።

31 ዳዊቲ እዮኣባነ እያራ ደእያ አሳ፥ “ህንተ ማኡዋ ዳክተ፤ ባና ቆልተ፤ አበኔራ ሀላ ስንꬃን ዬክተ” ያግስ። ካዎ ዳዊቲ ሀላ ካልድ ዱፎ ብስ። 32 አበኔር ከብሮናን ሞገትስ፤ ካዎይ ባ ቃላ ꬎቁ ኦꬅድ ዱፎን ዬክስ፤ አሳ ኡባይ ዬክዶሶና። 33 ካዎይ አበኔራስ፥

35 ሄ ጋላስ ዳዊቲ ካꬅ ማና መላ አሳይ እያ ሾቢዶሶና። ሽን ዳዊቲ፥ “አዋ አይፈይ ደእሽን፥ ካꬅ ዎይኮ ሀራባ ባርኮ ፆሲ ታና ፕርዶ” ያግድ ጫቅስ። 36 ካዎይ ኦꬅዳባ አሳ ኡባይ በእድ ኡፋይትዶሶና፤ ቱማካ ካዎይ ኦꬅዳባ ኡባይ አሳ ኡፋይስስ። 37 ሄሳ ግሾ፥ ሄ ጋላስ ዳዊታ አሳይነ እስራኤለ አሳ ኡባይ ካዎይ ኔራ ናኣ አበኔራ ዎꬍስቦናይሳ ኤርዶሶና።

38 ካዎይ ባ አይለታኮ፥ “እስራኤለ ቢታን ግታ አስነ ሀላቅ ሀይቅዳይሳ ህንተ አኬከከቲ? 39 ታኒ ፆሳይ ትይዳ ካዎ ግድኮካ፥ ታኒ ዳቡራንቾ፤ ሀይሳቲ ፃሩያ ናይት ታ ቦላ ምንዶሶና፤ ኢታ ኦꬅዳይሳታስ ጎዳይ ኤንታ ኦሱዋዳ ዛሮ” ያግስ።