1 ሳኦላ ናአይ እያቡስተይ አበኔር ከብሮናን ሀይቅዳይሳ ስእዳ ዎደ እያ ዎዛናይ ትልእስ፤ እስራኤለ አሳ ኡባይካ ዳጋምስ። 2 ሳኦላ ናኣ እያቡስተስ ኦላ ካለꬅያ ናምኡ ሀላቃት ደኦሶና፤ እሱዋ ሱንꬃይ ባአና፤ ሀንኮይ ቃስ ራካባ። ኤንቲ ብንያመ ኮቸ ግድዳ ባኣሮተ አድያ እርሞና ናይታ። ባኣሮተይ ብንያመ ባጋዳ ታይበቴስ። 3 ባኣሮታን ደእዳ ኮይሮ አሳት ግታይማ ቢታ ባቃትድ፥ ሀች ጋካናዉ በተ አሳዳ ያን ደእዶሶና።

4 ሳኦላ ናኣ ዮናታናስ ናምኡ ቶሆይ ስልዳ ናእ ደኤስ፤ ሳኦላነ ዮናታና ሀይቁዋ ዎረይ እዝራኤለፐ ስኤትያ ዎደ እ እቻሹ ላይꬃ ናአ። ሄ ናኣ ድችያራ እያ ኤካዳ ባቃትሽን ናአይ ኩንድን እያ ቶሆይ ስልስ፤ ሄ ናኣ ሱንꬃይ መምፕቦስተ።

5 ባኣሮተ አድያ እርሞና ናይት ረካብነ ባኣን እያቡስተ ሶ ብድ ሴታ ጋላስ ጋክዶሶና። ኤንቲ ጋክያ ዎደ እ ሸምፓናዉ አልጋ ቦላ ዝንእስ። 6 ኤንቲ ግስተ ኮይያ አሳዳ ሀንድ ሶ ገልድ፥ እያ ኡሉዋን ጫድዶሶና። ረካብነ እያ እሻ ባኣን ለፓራ ከይድ ብዶሶና።

7 እያቡስተይ ቆልአን አርሳን ዝንእዳይሳ ደምድ፥ እያዉ ኡሉዋን ጫድድ ዎꬍዶሶና፤ እያ ሁጵያ ቃንፅ ኤክድ፥ አራባ ጋꬋ ኤፍያ ኦግያ ኦይክድ፥ ቃማራ ብዶሶና። 8 እያቡስተ ሁጵያ ከብሮናን ደእያ ዳዊታስ ኤህዶሶና። ካዋ፥ “ነና ዎꬋናዉ ኮይያ ነ ሞርክያ ሳኦላ ናኣ እያቡስተ ሁጵያ ሀይሳ በአ። ሳኦላ ቦላነ እያ ናይታ ቦላ ካዋ ኑ ጎዳ ግሾ ፆሳይ ሀች ሀሎ ከይስ” ያግዶሶና።

9 ሽን ባኣሮተ አድያ እርሞና ናይታ ረካባነ እያ እሻ ባአና ዳዊቲ ሀይሳዳ ያግስ፤ “መቶ ኡባፈ ታና አሽዳ ደኦ ጎዳይ ኤርያ መላ። 10 ታዉ ምሽራቾ ኦድያ አሳዳ፥ ‘ሳኦል ሀይቅስ’ ያግድ ታዉ ኦድን፥ ታኒ እያ ፅቅላጋን ኦይካዳ ዎꬋስ፤ ታኒ እያ ምሽራቹዋስ እምዳ ዎይቶይ ሀይሳ። 11 ባ ሶን ባ አርሳን ዝንእዳ ፅሎ አድያ ዎꬍዳ ኢታ አሳታስ እያ ሃሉዋ ከየይስ አይ መላ ኢታንደሻ! እያ ሱꬃ ታኒ ህንተ ኩሸፐ አቻና፤ ህንተና ታኒ ቢታ ቦላፈ ꬋይሳና!” ያግስ።

12 ረካባነ ባአና ዎꬋና መላ ዳዊቲ ባ ኦላንቾታ ኪትን፥ ኦላንቾት ኤንታ ዎꬍዶሶና። ኤንታ ኩሽያነ ቶሁዋ ቃንፅድ፥ ከብሮናን ኦላ ሃꬃ ማታን ካቅዶሶና። እያቡስተ ሁጵያ ኤፍድ፥ አበኔራ ዱፎን ከብሮናን ሞግዶሶና።