5
ዳዊቲ እስራኤለ ቦላ ካዎትስ
(1 ታር 11:1-9፤ 14:1-7)
1 እስራኤለ ዛረ ኡባይ ዳዊታኮ ከብሮና ይድ፥ “ኑኒ ነ አሾነ ነ ሱꬁ። 2 ካሰ ሳኦል ኑስ ካዎ ግድድ ደእያ ዎደካ እስራኤለ አሳ ኦላስ ካለꬅዳይ ነና። ጎዳይ ነና፥ ‘ኔኒ ታ አሳ እስራኤለ ሄማና፤ ኤንታ ቦላ ካዎታና’ ያግድ ቃላ ገልስ” ያግዶሶና። 3 እስራኤለ ጭማት ኡባይ ካዋ ዳዊታኮ ከብሮና ይዶሶና፤ እ ኤንታራ ከብሮናን ጎዳ ስንꬃን ጫቅስ፤ እስራኤለ ቦላ ካዎታና መላ ዳዊታ ትይዶሶና።
4 ዳዊቲ ካዎትያ ዎደ እያዉ ሀስታሙ ላይꬅ፤ እ ኦይታሙ ላይꬅ ካዎትስ። 5 ከብሮናን ይሁዳ ቦላ ላፑን ላይꬅነ ኡሱፑን አጌና ካዎትስ፤ የሩሳላመን እስራኤለ ቦላነ ይሁዳ ቦላ ሀስታማነ ሄꬑ ላይꬅ ካዎትስ።
6 የሩሳላመን ደእያ ያቡሰ አሳ ኦላናዉ ዳዊቲነ እያ አሳይ ብዶሶና። ያቡሰ አሳይ፥ “ዳዊቲ ሀ ካታማ ገላናዉ ዳንዳኤና” ግድ ቆፕዳ ግሾ ሀር አቶሽን፥ “ቆቀትነ ዎበት ነና ተቃናዉ ዳንዳኦሶና፤ ነ ሀ ካታማ ገላካ” ያግዶሶና። 7 ግዶሽን፥ ዳዊቲ ፅዮነን ደእያ ኤንታ ሚፃ ኦይክን፥ እያ ዳዊታ ካታማ ግዳሱ።
8 ሄ ጋላስ ዳዊቲ፥ “ያቡሰ አሳ ኦልድ ኦይክያ ኦንካ ዳዊታ ሞርከ ግድዳ ዎበትነ ቆቀት ደእያ በሳ ጋካናዉ ሻፋራ ፑደ ከያናዉ ኮሼስ” ያግስ። ሄሳ ግሾ፥ “ቆቀትነ ዎበት ጋꬎ ገሎኮና” ጌተትስ። 9 ዳዊቲ ሄ ሚፃ ኦይክድ፥ ያን ደእስ፤ ሄ ሚፃ ዳዊታ ካታማ ያግድ ሱንꬅስ። ዳዊቲ ሚሎፐ ዶምድ ሄ ካታማ ዩሽድ ግምብስ። 10 ኡባፈ ዎልቃማ ጎዳይ ፆሳይ እያራ ደእያ ግሾ ዳዊቲ ምን ምን ብስ።
11 ፅሮሳ ካዎይ ክራም ዳዊታስ ካዎ ጋꬎ ኬፃና መላ ዝጋ ምꬅ፥ አናፀታነ ሹቹ ማሰይሳታ የድን፥ ኤንቲ እያዉ ኬ ኬፅዶሶና። 12 ጎዳይ እስራኤለ ቦላ እያ ካዎ ኦꬅድ ምንꬅዳይሳነ ባ አሳ እስራኤለ ግሾ እያ ካዎተꬃ ꬎቁ ኦꬅድ ቦንችዳይሳ ዳዊቲ ኤርስ።
13 ዳዊቲ ከብሮናፐ የሩሳላመ ይዳፐ ጉየ፥ ሀራ ላገꬆታነ ማቸታ ጉጅድ ኤክን፥ ሀራ ማጫ ናይትነ አደ ናይት እያዉ የለትዶሶና። 14 የሩሳላመን እያዉ የለትዳ አደ ናይታ ሱንꬃይ ሳሙአ፥ ሾባባ፥ ናታና፥ ሶሎሞነ፥ 15 ይብሃራ፥ ኤልሹአ፥ ነፈጋ፥ ያፍአ፥ 16 ኤልሻማአ፥ ኤልያዳነ ኤልፋላፃ።
ዳዊቲ ፍልስፄመታ ፆንስ
(1 ታር 14:8-17)
17 ዳዊቲ እስራኤለ ቦላ ካዎ ግድድ ትየትዳይሳ ፍልስፄመት ስእዳ ዎደ ኤንቲ ኡባይ ዳዊታ ኮያናዉ ከይዶሶና፤ ሽን ዳዊቲ ሄሳ ስእድ ሚፃን ብድ ገልስ። 18 ፍልስፄመት ብድ፥ ራፋይመ ዛንጋራን ላለትድ ኡትዶሶና። 19 ሄሳ ግሾ፥ ዳዊቲ፥ “ታኒ ባዳ ፍልስፄመታ ኦሎ? ኔኒ ኤንታ ታዉ አꬃዳ እማኔ?” ያግድ ጎዳ ኦይችስ።
ጎዳይ፥ “ኤ ኦላ፤ ቱማ ታ ኤንታ ነዉ አꬃዳ እማና” ያግስ።
20 ዳዊቲ ባአል-ፓራስመ ጌተትያ በሳ ብድ፥ ያን ኤንታ ፆንስ። እ፥ “ድኦ ሃꬅ መንꬅድ ከየይሳዳ ጎዳይ ታ ሞርከታ ታ ስንꬃን መንረꬅስ” ያግስ። ሄሳ ግሾ፥ ሄ በሳ ሱንꬃይ ባአል-ፓራስመ*ባአል-ፓራስመ፦ ሀ ሱንꬃ ብርሸꬃይ “መንꬅድ ገልዳ ጎዳ” ጉሱ። ጌተትስ። 21 ፍልስፄመት ባንታ ኤቃታ ሄ በሳን የግድ ብን፥ ዳዊቲነ እያ አሳይ ሄ ኤቃታ ኤክድ ብዶሶና።
22 ፍልስፄመት ጉየ ብድ፥ ናምአንꬆ ራፋይመ ዛንጋራን ላለትድ ኡትዶሶና። 23 ዳዊቲ ጎዳ ናምአንꬆ ኦይችን፥ ጎዳይ፥ “ኤንታ ጉየ ባጋራ ተቃዳ ዎላ ስንꬃን ኤንታ ኦላ፥ ሽን ኤንታዉ ሶምኦን ከዮፓ። 24 ዎላ ምꬃ ፄራን ሳልፐ ቃላ ኔኒ ስእያ ዎደ ፍልስፄመ ኦላንቾታ ሾጫናዉ ጎዳይ ኔፐ ስን አꬍዳይሳ ኤራዳ ኤለሳ” ያግስ። 25 ዳዊቲ ጎዳይ ኪትዳይሳዳ ኦꬅስ፤ ጌባፐ ገዘራ ጋካናዉ ፍልስፄመ ኦላንቾታ ዎꬍስ።