1 እስራኤለ ግዶፈ ዶረትዳ ሀስታሙ ሙኩሉ አሳታ ዳዊቲ ዛሪድ ሺሽስ። 2 ዳዊቲነ እያ አሳ ኡባይ ይሁዳ ባላ *ይሁዳ ባላ፦ ቅርያት ይኣርመ ጉሱ። ካታማፐ ደንድድ፥ ክሩበታፐ ግዶን ባ ካዎተꬃ አራታ ቦላ ኡትዳ ኡባፈ ዎልቃማ ጎዳ ሱንꬃን ፄገትዳ ፆሳ ታቦትያ ኤሀናዉ ብዶሶና። 3 ኤንቲ ፆሳ ታቦትያ ኦራꬃ ጋረን ዎꬅድ፥ ደረ ሁጰን ደእያ አምናዳበ ሶፐ ኤህዶሶና። አምናዳበ ናይት ኦዝነ አህዮይ ኦራꬃ ጋርያ ካለꬆሶና። 4 ደረ ሁጰን ደእያ አምናዳበ ሶፐ ፆሳ ታቦትያ ኤህያ ዎደ አህዮይ ታቦትያፐ ስንꬃራ ሄመቴስ። 5 ዳዊቲነ እስራኤለ አሳ ኡባይ ዲꬃን፥ ማስንቆን፥ ካራቦን ዳላንነ ሻሾተን ካእሸ ባንታ ኩመꬃ ዎልቃን ጎዳ ስንꬃን ኡፋይትድ ቦንቾሶና።

6 ናኮን ካꬃ ቡክያ ዉዱማ ጋክያ ዎደ ቦራት ꬉበትን፥ ኦዝ ባ ኩሽያ የድድ፥ ፆሳ ታቦትያ ኦይክስ። 7 ኦዝ ታቦትያ ቦችዳ ግሾ ጎዳ ሀንቆይ እያ ቦላ ኤፅስ። ፆሳይ እያ ሾጭን ሄ በሳን ፆሳ ታቦትያ ማታን ሀይቅስ። 8 ጎዳ ሀንቆይ ኦዛ ሾጭዳ ግሾ ዳዊቲ አዛንስ። ሄ በሳይ ሀች ጋካናዉ ኦዝ ሾጨትዳ በሳ ጌተቴስ።

9 ሄ ጋላስ ዳዊቲ ጎዳ ያይዳ ግሾ “ጎዳ ታቦተይ ታኮ ዋንድ ያኔ?” ያግስ። 10 ሄሳ ግሾ፥ እ ጎዳ ታቦትያ ባራ ዳዊታ ካታማ ኤሀናዉ ኮይቤና። ሄሳ አግድ ጋተ አድያ አብዳራ ሶ ኤፍስ። 11 ጎዳ ታቦተይ አብዳራ ሶን ሄꬑ አጌና ጋምእስ፤ ጎዳይ አብዳራነ እያ ሶ አሳ ኡባ አንጅስ።

12 ፆሳ ታቦትያ ግሾ ጎዳይ አብዳራ ሶ አሳነ እያዉ ደእያ ኡባ አንጅዳይሳ ካዎይ ዳዊቲ ስእስ። ሄሳ ግሾ፥ ዳዊቲ አብዳራ ሶ ብድ፥ ፆሳ ታቦትያ ዳዊታ ካታማ ኡፋይሳን ኤህስ። 13 ዳዊቲ ጎዳ ታቦትያ ቶክዳ አሳት ኡሱፑና ታንጎ ታንግዳ ዎደ ኤንታ ኤስድ፥ እስ ኮርማነ እስ አንቃራ ማር ያርሽስ። 14 ዳዊቲ ሊኖፐ ኦሰትዳ ኤፉደ ማእድ፥ ባዉ ደእያ ዎልቃ ኡባን ጎዳ ስንꬃን ዱርስ። 15 ዳዊቲነ እስራኤለ አሳ ኡባይ ኡፋይሳን እልልሸነ ሞይዘ ፑንሸ ጎዳ ታቦትያ ዳዊታ ካታማ ኤህዶሶና።

16 ጎዳ ታቦተይ ዳዊታ ካታማ ገልያ ዎደ ሳኦላ ናእያ መልኮላ ማስኮተራ ፄላዳ፥ ካዎይ ዳዊቲ ጎዳ ስንꬃን ጉፕሽንነ ዱርሽን በአዳ ባ ዎዛናን ካꬋሱ።

17 ዳዊቲ ጎዳ ታቦትያ ዎꬃናዉ ቶልዳ ዱንካንያ ግዶን ታቦትያ ዎꬅን፥ ዳዊቲ ፁሳ ያርሾነ እስፈተꬃ ያርሾ ጎዳስ ያርሽስ። 18 ዳዊቲ ፁሳ ያርሾነ እስፈተꬃ ያርሾ ያርሽዳፐ ጉየ ኡባፈ ዎልቃማ ጎዳ ሱንꬃን አሳ አንጅስ። 19 እስራኤለ አሳ ኡባስ፥ ማጫስ አደስ ሁጰን ሁጰን እስ እስ ኡይꬅ፥ እስ እስ ቃንፆ አሾነ እስ እስ ዎይነ ኑካ ግሽስ። ሄሳፈ ጉየ አሳ ኡባይ ባ ሶ ሶ ስምስ።

20 ዳዊቲ ባ ሶ አሳ አንጃናዉ ሶ ስምዳ ዎደ ሳኦላ ናእያ መልኮላ እያ ሞካናዉ ከያዳ፥ “ፓꬆና አሳት ካሎ ሄመተይሳዳ ሀች እስራኤለ ካዎይ ባ ማጫ አይለታ ስንꬃን ካሎትድ አይ መላ ቦንቸትደ!” ያጋሱ።

21 ዳዊቲ፥ “ነ አዋፐነ እያ ሶ አሳፐ አꬅድ ባ አሳ እስራኤለ ካለꬃና መላ ታና ዶርዳ ጎዳ ስንꬃን ዱራስ። ታኒ ጎዳ ቦንቾስ ዱርሳ አግከ። 22 ታኒ ሀይሳፈ አꬃዳ ቡሮ ታና ቶቻና፤ ታናተꬃ ዝቅ ኦꬃና። ሽን ኔኒ ግዳ ማጫ አይለታ ስንꬃን ታ ቦንቸታና” ያግስ።

23 ሳኦላ ናእያ መልኮላ ሀይቃና ጋካናዉ ናአ የላቡኩ።