1 ዳዊቲ፥ “ዮናታና ግሾ ታኒ እያዉ ኬሀተꬅ ኦꬃናዉ ሳኦላ ኬꬃፈ አትዳ አስ ደእሻ?” ያግድ ኦይችስ።

2 ሄ ዎደ ሲባ ጌተትያ እስ አይለይ ሳኦላ ሶን ደኤስ። እ ዳዊታ ስን ያና መላ ፄግን፥ ካዎይ፥ “ኔኒ ሲቤ?” ያግድ ኦይችስ።

ሲብ፥ “ኤ፥ ታኒ ነ አይልያ ሲባ” ያግስ።

3 ካዎይ፥ “ፆሳ ኬሀተꬅ ታኒ በሳና መላ ሳኦላ ኬꬃፈ አትዳ አስ ባዌ?” ያግስ።

ሲብ፥ “ናምኡ ቶሆይ ስልዳ ዮናታና ናይታፐ እሶይ ሀኖ ጋካናዉ ፓፃ ደኤስ” ያግስ።

4 ካዎይ፥ “እ አዉን ደኢ?” ያግስ።

ሲብ፥ “ሎዶባራ ጌተትያ በሳን አምኤላ ናኣ ማክራ ሶን ደኤስ” ያግስ።

5 ካዎይ ዳዊቲ ሎዶባራፐ አምኤላ ናኣ ማክራ ሶፐ መምፕቦስተ ኤህስስ።

6 ሳኦላ ናኣ ዮናታና ናአይ መምፕቦስተይ ዳዊታኮ ይድ፥ ዳዊታ ስንꬃን ዝግድ ቦንችስ።

ዳዊቲ፥ “መምፕቦስተ” ያግድ ፄግስ።

እ፥ “አበ ታ ጎዳዉ፥ ታ ነ አይልያ” ያግስ።

7 ዳዊቲ፥ “ያዮፋ፤ ነ አዋ ዮናታና ግሾ ታኒ ነዉ ኬሀና። ነ አዋ አዋ ሳኦላ ጋድያ ኡባ ታኒ ነዉ ዛራና፤ ቃስ ኔኒ ኡባ ዎደ ታ ጋይታፐ ማና” ያግስ።

8 መምፕቦስተይ ዝግድ፥ “ሀይቅዳ ካና ዳንያ ታና ኔኒ ዉዳዳ ፄላናዉ ነ አይለይ ታኒ ኦኔ?” ያግስ።

9 ካዎይ ሳኦላ አይልያ ሲባ ፄግድ፥ “ሳኦላባነ እያ ሶ አሳባ ግድዳባ ኡባ ታኒ ነ ጎዳ ናኣ ናኣስ እማስ። 10 ነ ጎዳ ናኣ ናአይ ማና መላ ኔኒ፥ ነ ናይትነ ነ አይለት እያ ጋድያ ጎይድ፥ ካፅዳ ካꬃ እያዉ ኤህተ። ግዶሽን፥ ነ ጎዳ ናኣ ናአይ መምፕቦስተይ ኡባ ዎደ ታ ጋይታፐ ማና” ያግስ። ሲባስ ታማነ እቻሹ አደ ናይትነ ላታሙ አይለት ደኦሶና።

11 ሲብ፥ “ኔኒ ታ ጎዳይ፥ ካዎይ ነ አይልያ ኪትዳ ኡባ ታኒ ነ አይለይ ኦꬃና” ያግስ። ሄሳ ግሾ፥ መምፕቦስተይ ካዋ ናይታፐ እሱዋ መላ ካዎ ጋይታፐ ሜስ።

12 መምፕቦስተስ ምካ ጌተትያ ጉꬃ ናእ ደኤስ። ሲባ ሶን ደእያ አሳ ኡባይ መምፕቦስተስ አይለ ግድዶሶና። 13 ናምኡ ቶሆት ስልዳ መምፕቦስተይ ኡባ ዎደ ካዋ ጋይታፐ ምሸ የሩሳላመን ደእስ።