1 ሄሳፈ ጉየ፥ አሞነታ ካዎይ ሀይቅን እያ ናአይ ሀኑኒ እያ በሳን ካዎትስ። 2 ዳዊቲ፥ “እያ አዋይ ታዉ ኬህዳይሳዳ ናኦሳ ናኣ ሀኑናስ ታካ ኬሀና” ያግስ። ሄሳ ግሾ፥ እያ ምንꬃናዉ ዳዊቲ አሰ እያኮ ኪትስ።

ዳዊቲ ኪትዳ አሳይ አሞነ ቢታ ጋክዳ ዎደ፥ 3 አሞነ ሀላቃት ባንታ ጎዳ ሀኑናኮ፥ “ዳዊቲ ሀ አሳ ኪትዳይ ነ አዋ ቦንችድ ነና ምንꬃናዉ ኮይዳ ግሾ ዳኒ? እ አሰ ኪትዳይ ሀ ካታማ ዎች በእድ ኦላናሳ” ያግዶሶና። 4 ሀኑኒ ዳዊቲ ኪትዳ አሳታ ኦይክድ፥ ኤንታ ቡቻፈ ባጋ ሜድስ፤ ኤንታ ማኡዋ ጋርሳፈ ዱለ ጋካናዉ ቃንፅድ ኤንታ የድስ።

5 ዳዊቲ ሄሳ ስእድ፥ ኤንቲ ዬላትዳ ግሾ፥ “ህንተ ቡቻይ ድጫና ጋካናዉ እያርኮን ደእሽተ፤ ሄሳፈ ጉየ ሃ ዪተ” ያግድ አሰ ኪትስ።

6 አሞነት ዳዊቲ ኤንታ ሞርክዳይሳ ኤርዳ ዎደ ቤት-ረሆባነ ሱባን ደእያ አራመ አሳፐ ላታሙ ሙኩሉ ቶሆ ኦላንቾታ፥ ፆባፐ ታማነ ናምኡ ሙኩሉ አሳታነ ማካ ካዉዋፐ እስ ሙኩሉ አሳታ ሻምዶሶና።

7 ዳዊቲ ሄሳ ስእዳ ዎደ እዮኣባ ኩመꬃ ኦላንቾታራ ኤንታ ቦላ የድስ። 8 አሞነት ከይድ፥ ካታማ ፐንግያን ኦላስ ሳልፕዶሶና፤ ሱባፈነ ረሆባፐ ይዳ አራመ አሳት፥ ፆባ አሳትነ ማካ አሳት ደንባን ዱማ ሳልፕዶሶና።

9 እዮኣብ ባና ኦል ስንꬃራነ ጉየራ ተቅዳይሳ በእድ፥ እስራኤለ ኦላንቾታፐ ምኖታ ዶርድ ሶረ አሳታ ስንꬃን ኤስስ። 10 አትዳ አሳታ ባ እሻ አብስ ኪታና መላ ኦꬅድ አሞነታ ስንꬃን ሳልፕስስ። 11 እዮኣብ አብሳኮ፥ “ሶረ አሳት ታ ቦላ ዎልቃምኮ ነ ያዳ ታና ማዳ፤ አሞነ አሳት ነ ቦላ ዎልቃምኮ ታ ባዳ ነና ማዳና። 12 ህዛ ምና! ኑ አሳ ግሾነ ኑ ፆሳ ካታማታ ግሾ፥ አነ ምን ኦለቶስ። ጎዳይ ባና ሎእያባ ኦꬆ” ያግስ።

13 እዮኣብነ እያራ ደእያ ኦላንቾት ሶረ አሳታ ኦላናዉ ከይዶሶና፤ ሶረ አሳት እያ ስንꬃፈ ባቃትዶሶና። 14 ሶረ አሳት ባቃትዳይሳ አሞነ አሳት በእዳ ዎደ ኤንትካ አብሳ ስንꬃፈ ባቃትድ፥ ካታማ ገልዶሶና። እዮኣብ አሞነታ ኦለይሳ አግድ፥ የሩሳላመ ስምስ።

15 ሶረ አሳት እስራኤለ አሳይ ኤንታ ፆንዳይሳ ኤርዳ ዎደ ባንታ ኦላንቾታ ኡባ ሺሽዶሶና። 16 ካዎይ ሀዳድዘር ሶረ አሳታ ኤፍራፂሳ ሻፋ ሄፍንꬃፈ ኪትድ ኤህስን፥ ኤላማ ብዶሶና። አድራዛራ ቶራ ሞጮናይ ሾባክ ኤንታ ካለꬄስ።

17 ዳዊቲ ሄሳ ስእዳ ዎደ፥ እስራኤለ ኦላንቾታ ሺሽድ፥ ዮርዳኖሰ ሻፋ ፕንድ ኤላማ ጋክስ። ሶረ አሳት በሰ ኦይክድ፥ ጊግድ፥ ዳዊታራ ኦለትዶሶና። 18 ሽን ሶረ አሳት እስራኤለታ ስንꬃፈ ባቃትዶሶና። ዳዊቲይ ሶረ ኦላንቾታፐ ፓራ ጋረ ላግያ ላፑን ፄቱ አሳታነ ኦይታሙ ሙኩሉ ቶሆ ኦላንቾታ ዎꬍስ። ኤንታ ቶራ ሞጮና ሾባክካ ሄ በሳን ሾጨትድ ሀይቅስ። 19 አድራዛራስ ሃረትድ ደእያ ካዎት እስራኤለት ኤንታ ፆንዳይሳ ኤርዳ ዎደ እስራኤለታራ ስገትድ፥ ኤንታዉ ሃረትዶሶና። ሄሳፈ ስምን፥ ሶረ አሳት አሞነ አሳታ ማዳናዉ ያይዶሶና።