1 ላይꬃ ላመን *ላይꬃ ላመ፦ እስራኤለ ላይꬃ ላመይ ማጋብተፐነ ማዘፐ ግዶን ደእያ ቃማ። ካዎት ኦላስ ከይያ ዎደ ዳዊቲ ባ አሳራነ እስራኤለ ኦላንቾታራ እስፈ እዮኣባ ኦላስ የድስ። ኤንቲ አሞነ ኦልድ፥ ራባ ካታማ ተቅዶሶና። ሽን ዳዊቲ የሩሳላመን አትስ።

2 እስ ጋላስ ኦማርስ ዳዊቲ ባ ሂፃፐ ደንድድ፥ ኬꬃ ቦላ ደእያ በሳ ከይድ ሄመትሸ ቦላ ሜጨትያ እስ ማጫስ በእስ፤ ሄ ማጫስያ ዳሮ ማላ ሎኦ። 3 ዳዊቲ እያ ኦነኮ ኤራናዉ ኮይድ አሰ ኪትስ። ኪተትዳ አደይ፥ “እያ ኤልያባ ናእዉ፥ ህተ አድያ ኦርዮና ማችዉ በርሳቦ” ያግስ። 4 ዳዊቲ አሰ ኪትድ፥ እዮ ኤህስስ፤ ኢራ አቅስ። ሄ ዎደ እያ ኩሸ መቶይ አꬍን፥ ጌያዳ ደአዉሱ። እያ ባ ሶ ስማዳ ባሱ። 5 ጉየፐ እያ ቃንꬃትዳይሳ ኤርዳ ዎደ ዳዊታኮ፥ “ነዉ ቃንꬃታስ” ያጋሱ።

6 ዳዊቲ፥ “ህተ አድያ ኦርዮና ሃ የዳ” ያግድ እዮኣባኮ ኪትስ። እዮኣብ ኦርዮና ዳዊታኮ የድስ። 7 ኦርዮን ይን ዳዊቲ፥ “እዮኣብ አይ መሌ? ኦላንቾት አይ መሌ? ኦላይ ዋኒ?” ያግድ ኦይችስ። 8 ዳዊቲ ኦርዮናኮ፥ “ሶ ባዳ ሸምፓ” ያግን፥ ኦርዮን ካዎ ጋꬎፐ ከይድ ብስ። ካዎይ ኦርዮና ጉየራ ካꬅ የድስ። 9 ሽን ኦርዮን ሶ ቦና ካዎ ጋꬎ ድርሳ ፐንግያን ባ ጎዳ አይለታራ አቅስ።

10 ኦርዮን ባ ሶ ቦናይሳ ዳዊቲ ስእድ፥ “ኔኒ ሃሆሶፐ ያዳሳ ግድኪ? ነ ሶ አይስ ባብኪ?” ያግድ ኦይችስ።

11 ኦርዮን ዳዊታኮ፥ “ታቦተይ፥ እስራኤለ አሳይ፥ ይሁዳ አሳይ፥ ታ ሀላቃይ እዮኣብነ ካዋ አሳይ ደንባን ዱንካነን ደኦሶና። ያትን ታ ዋናዳ ሶ ባዳ ሞ፥ ኡዮ፥ ቃስ ታ ማቸራ ዋናዳ አቆ? ነ ሸምፖይ ኤሮ! ታኒ ሀይሳ መላባ ኦꬅከ” ያግድ ዛርስ።

12 ዳዊቲ፥ “እስ ጋላስ ሀይሳን ጋምአ፤ ዎንቶ ነና ጉየ የዳና” ያግስ። ኦርዮን ሄ ጋላስነ ዎንተꬃ ጋላስ የሩሳላመን ጋምእስ። 13 ዳዊቲ ሾቢን ኦርዮን እያራ ምስ፤ እ ማꬆታና ጋካናዉ ዳዊቲ እያ ኡሽስ። ሽን ሄ ዎደ ኦማርስ ኦርዮን ባ ሶ ቦና፥ ባ ሂፃ ሂፅድ ባ ጎዳ አይለታራ አቅስ።

14 ዎንተ ዳዊቲ እዮኣባስ ዳብዳበ ፃፍድ፥ ኦርዮና ቦላ የድስ። 15 ዳዊቲ ባ ዳብዳብያን፥ “ኦርዮና ኦላይ ጎብያ በሳን ስንꬃ ባጋ አꬃ። እ ሾጨትድ ሀይቃና መላ እያ ማታፐ ሃክተ” ያግስ።

16 እዮኣብ ሄ ካታማ ተቅዳ ዎደ እ ኤርያ ምኖ ሞርከ ኦላንቾት ደእያ በሳን ኦርዮና ኤስስ። 17 ካታማ አሳት ከይድ እዮኣባራ ኦለትዶሶና። ዳዊታ ኦላንቾታፐ ጉꬃ አሳት ሀይቅዶሶና፤ ኦርዮን ህተ አደይካ ሀይቅስ።

18 እዮኣብ ኦላን ሀንዳባ ኡባ ዳዊታስ ኪትስ። 19 እዮኣብ ኪተትድ ብያ አድያኮ፥ “ኦላን ሀንዳባ ነ ካዋስ ኦዳ ዉርስዳ ዎደ፥ 20 ካዎይ ሸነትድ፥ ‘ህንተ ኤንታራ ኦለታናዉ ካታማኮ አይስ ሺቅደቲ? ኤንቲ ግምብያ ቦላ ኤቅድ ዶንገን ዱካናይሳ ኤረከቲ? 21 ገድዮና ናአይ አብመለከይ ዋንድ ሀይቅዳኮ አኬከከቲ? ማይደ ግምብያ ቦላራ ዱገ ሆላዳ ተበሳ ጌተትያ በሳን ዎꬍዳይ እስ ማጫስ ግደኬ? ያትን፥ ህንተ ግምብያኮ አይስ ሺቅደቲ?’ ያግድ ኦይችኮ፥ ኔኒ፥ ‘ነ አይለይ፥ ህተ አደይ ኦርዮንካ ሀይቅስ’ ” ያጋ።

22 ኪተትዳይስ ብድ እዮኣብ ኪትዳባ ኡባ ዳዊታስ ኦድስ። 23 አደይ፥ “ኑ ሞርከት ኑፐ ዎልቃምዶሶና፤ ኑራ ኦለታናዉ ካታማ ጋፃን ደእያ ደምባ በሳ ከይዶሶና። ሽን ኑ ኤንታ ካታማ ፐንግያ ጋካናዉ ጉየ ዛሪድ የደꬅዳ። 24 ሄሳፈ ጉየ፥ ዶንገን ዱከይሳት ግምብያ ቦላ ግድድ ነ አይለታ ዶንገን ዱክዶሶና። ካዋዉ፥ ነ አሳታፐ ጉꬃት ሀይቅዶሶና፤ ነ አይለይ፥ ህተ አደይ ኦርዮንካ ሀይቅስ” ያግስ።

25 ዳዊቲ ኪተትዳይሳኮ፥ “ኔኒ እዮኣባኮ ሀይሳዳ ያጋ፤ ‘ቶሪ ገደካ ሃካ ምያ ግሾ ሀይሳስ አዛኖፓ፤ ካታማ ኦላዳ ኦይካናዉ ምና’ ያጋዳ እያ ምንꬃ” ያግስ።

26 ኦርዮና ማችያ ባ አዝናይ ሀይቅዳይሳ ስእዳ ዎደ እያዉ ዬካሱ። 27 እያ ካዮ ዎꬃ ስምን፥ ዳዊቲ ኪትድ እዮ ባ ሶ ኤህስ። እያ እያዉ ማቾ ግዳዳ አደ ናአ የላሱ። ሽን ዳዊቲ ኦꬅዳ ኦሶይ ኢታ ግድያ ግሾ ጎዳይ ኡፋይትቤና።