1 ዳዊቲ ባራ ደእያ አሳ ታይብድ ሻላቃታነ ማቶ ሀላቃታ ኤንታ ቦላ ሹምስ። 2 ዳዊቲ አሳ ሄꬑ ጩጋን ሻክስ፤ እስ ጩጋ እዮኣብ፥ ናምአንꬆ ጩጋ እዮኣባ እሻይ፥ ፃሩያ ናአይ አብስ፥ ሄꬓንꬆ ጩጋ ጋተ አደይ እታይ ኪቴስ። ካዎይ አሳኮ፥ “ቱማ ታ ህንተራ እስፈ ባና” ያግስ።

3 ሽን አሳይ፥ “ኔኒ ባናዉ በሰና! ኑኒ ባቃትያኮ ኤንቲ ኑና ኮዮኮና፤ ሀር አቶሽን ኑፐ ባጋይ ሀይቅያኮካ ኑባ ዉዳ ጎኮና። ሽን ኔኒ ነ ፃላላ ታሙ ሙኩሉፐ ዳራሳ። ሄሳ ግሾ፥ ኔኒ ካታማን ኡታዳ ኑስ ማዶ ኪትኮ ሎኦ” ያግስ።

4 ካዎይ፥ “ህንተና ሎእያባ ታ ኦꬃና” ያግስ።

ዳዊቲ ድርሳ ፐንግያ ማታን ኤቅድ፥ አሳ ኡባይ ፄታንነ ሙኩላን ሳልፕድ ከይሽን በእስ። 5 ካዎይ እዮኣባ፥ አብሳነ እታያ፥ “ታ ግሾ ግድ፥ ሄ ናአተꬃ አድያ አበሰሎመ ቆሆፕተ” ያግድ ኪትስ። ካዎይ ሄሳ ሀላቃታስ ኦድያ ዎደ ኦላንቾት ኡባይ ስእዶሶና።

6 ዳዊታ ኦላንቾት እስራኤለታራ ኦለታናዉ ኤፍሬማ ዎራን ሳልፕዶሶና። 7 ሄ በሳን ዳዊታ ኦላንቾት እስራኤለ ኦላንቾታ ፆንዶሶና። ሄ ጋላስ ዳሮ አስ ዉርስ፥ ላታሙ ሙኩሉ አስ ሀይቅስ። 8 ኦላይ ጋፃረ ኡባ ጋክስ፤ ሄ ጋላስ ዎር ዉርስዳ አሳይ ማሽ ዉርስዳ አሳፐ ዳሮ።

9 አበሰሎመይ ቆፖና ደእሸ ዳዊታ አሳራ ጋሄትስ። አበሰሎመይ ባ ባቁሉዋ ቶግዳሽን ዳሻ ዎላ ጋርስ ባቁሎይ ገልን፥ አበሰሎመ ሁጰይ ምꬃን ኦይከትስ። እ ቶግዳ ባቁሎይ እያ ቶሁዋ ጋርሳፈ ብን፥ አበሰሎመይ ጫርኮ ቦላ ካቃትድ አትስ። 10 አሳፐ እሶይ ሄሳ በእድ፥ “አበሰሎመይ እስ ዎላ ቦላ ካቀትዳይሳ ታ በአስ” ያግድ እዮኣባስ ኦድስ።

11 እዮኣብ ባዉ ኦድዳ አድያ፥ “ዬ፥ በአስ ጋይ? ያትን አይስ እያ ዎꬋብኪ? ነ ሄሳ ኦꬅዳባ ግድያኮ፥ ታኒ ነዉ ታሙ ብራ ሳንትመነ እስ ሳቀ እማናሽን” ያግስ።

12 አደይ ዛሪድ፥ “ኔኒ ሙኩሉ ብራ ሳንትመ ታ ኩሸን ዎꬅያኮካ ታኒ ካዋ ናኣ ቦላ ታ ኩሽያ ደንꬅከ! ኑኒ ኡባይ ስእሽን፥ ካዎይ ነና፥ አብሳነ እታያ፥ ‘ታ ግሾ ግድ፥ ናአተꬃ አበሰሎመ ቆሆፕተ’ ያግድ ኪትስ። 13 ታኒ ካዋ እፃዳ አበሰሎመ ዎꬍዳባ ግድያኮ፥ ካዎይ ኡባ ስኤይሳዳ ሄሳ ስአናይስ አተና። ሄ ዎደ ኔኒ ሃክ ኤቅያ አሳፐ እሱዋ ግዳና” ያግስ።

14 እዮኣብ፥ “ታኒ ኔራ ኦደታሸ ዎደ ዉርስከ” ያግድ ሄꬑ ቶራ ኤክድ፥ አበሰሎመይ ዎላ ቦላ ካቀትድ፥ ፓፃ ደእሽን ዎዛና አይፈን ጫድስ። 15 እዮኣባ ኦላ ሚሽያ ቶክያ ታሙ አሳት አበሰሎመ ዩሹዋ ተቅድ እያ ሾጭድ ዎꬍዶሶና።

16 ሄሳፈ ጉየ፥ እዮኣብ ኦላ ኤሳናዉ ሞይዘ ፑንን አሳይ እስራኤለታ የደይሳ አግስ። 17 ኤንቲ አበሰሎመ ኤፍድ ዎራን ደእያ ግታ ኦላን የግድ፥ ግታ ሹቹ እያ ቦላ ዶርዶሶና። ሄ ዎደ እስራኤለ አሳ ኡባይ ባ ሶ ሶ ባቃትስ።

18 አበሰሎመይ ፓፃ ደእሸ፥ “ታ ሱንꬃን ፄገትያ አደ ናእ ታዉ ባዋ” ያግድ፥ ባና ቆፍስያ ሹቹ ማስዳ ሀዉልተ ካዎ ዛንጋራን ኤስድ ሄ ሀዉልትያ ባ ሱንꬃን ፄግስ። ሀች ጋካናዉ ሄ ሀዉልተይ “አበሰሎመ ሀዉልትያ” ጌተቴስ።

19 ሄሳፈ ጉየ፥ ሳዶቃ ናኣ አክማስ እዮኣባኮ፥ “እያ ሞርከታ ኩሸፐ ጎዳይ እያ አሽዳ ምሽራቹዋ ስሳናዉ ታኒ ካዋኮ ዎፃ ባዳ ኦዳና” ያግስ።

20 እዮኣብ፥ “አካይ! ሀች ኔኒ ምሽራቾ ኦድያ ጋላስ ግደና፤ ሀራ ጋላስ ኦዳናዉ ዳንዳኣሳ። ካዋ ናአይ ሀይቅዳ ግሾ ሀች ኦዳናዉ ኮሸና” ያግስ።

21 እዮኣብ ቶጰ አስ ግድዳ እስ አድያ ፄግድ፥ “ባዳ፥ ነ በእዳባ ካዋስ ኦዳ” ያግስ። ሄ አደይ እዮኣባስ ጉፋን ዝግድ ዎፅስ።

22 ሳዶቃ ናአይ አክማስ ናምአንꬆ እዮኣባኮ፥ “አይብካ ሀኖ፤ ታኒ ሀ ቶጰ አድያ ጌዶ ዎፃና” ያግስ።

እዮኣብ፥ “ታ ናአዉ፥ ነዉ ዎይቶይ ባይናባን አይስ ዎፃናዉ ኮያይ?” ያግስ።

23 አክማስ፥ “አይብካ ሀኖ፤ ታኒ ዎፃናዉ ኮያይስ” ያግስ።

እዮኣብ፥ “ያኮ ዎፃ” ያግስ። ሄሳ ግሾ፥ አክማስ ደምባ ኦግያ ኦይክድ ዎፅሸ ብድ ቶጰ አድያ የግድ አꬍስ።

24 ዳዊቲ ሶ ፐንግያፈነ ካረ ፐንግያፈ ግዶን ኡትዳሽን፥ ናግያ ኡራይ ኬꬃ ቦላ ከይድ፥ እስ አደይ ባርካ ዎፅሸ የይሳ በእስ። 25 ናግያ ኡራይ ካዋ ፄግድ ኦድስ።

ካዎይ፥ “እ ባርካ ደእኮ፥ ምሽራቾ ኤክድ ዬስ” ያግስ። ዎፅያ አደይ ኤንታኮ ማትሸ ይስ።

26 ናገይስ ሀራ ዎፅያ አስ በእድ ፐንግያ ናግያ አድያኮ፥ “ሀራ አስካ ባርካ ዎፅሸ ዬስ” ያግስ።

ካዎይ፥ “ሀ አደይካ ቃስ ምሽራቾ ኤክድ ዬስ” ያግስ።

27 ናገይስ፥ “ኮይሮ አድያ ዎꬃይ ሳዶቃ ናኣ አክማሳ ዎꬃ ታዉ ዳኔስ” ያግስ።

ካዎይ፥ “እ ሎኦ አስ፤ እ ሎኦ ኦዳራ ዬስ” ያግስ።

28 አክማስ ካዋ ፄግድ፥ “ኡባባይ ሎኦ!” ያግስ። ካዋ ስንꬃን ጉፋን ዝግድ፥ “ታ ጎዳ፥ ካዋ ቦላ ባንታ ኩሽያ ደንꬅዳ አሳታ ነዉ አꬅድ እምዳ ጎዳይ፥ ነ ፆሳይ ጋላተቶ” ያግስ።

29 ካዎይ፥ “ናአተꬃይ፥ አበሰሎመይ ሳሮ?” ያግድ ኦይችስ።

አክማስ፥ “እዮኣብ ታና ኪታና ሀንያ ዎደ ዎልቃማ ዋሶ ስአስ፥ ሽን እ አይበኮ ታኒ ኤራብከ” ያግስ።

30 ካዎይ፥ “ያ ሺቃ ኤቃ” ያግን እ ሃክድ ኤቅስ።

31 ሄሳፈ ጉየ፥ ቶጰ አደይ ጋክድ፥ “ታ ጎዳዉ፥ ካዋዉ፥ ታ ነዉ ምሽራቾ ኦዳይስ! ነ ቦላ ደንድያ ኡባ ኩሸፐ ጎዳይ ሀች ነና አሽስ” ያግስ።

32 ካዎይ ቶጰ አድያኮ፥ “ናአተꬃ አደይ አበሰሎመይ ሳሮ?” ያግድ ኦይችስ።

ቶጰ አደይ፥ “ታ ጎዳዉ፥ ካዋዉ፥ ነ ሞርከትነ ነ ቦላ ኢታባ ኦꬃናዉ ደንደይሳት ኡባይ ሄ ናአተꬃ አድያዳ ሀኖና” ያግስ።

33 ካዎይ ዳሮ አዛንስ፤ ፐንግያፈ ቆሞ ባጋን ደእያ ኬꬃ ገልድ ዬክስ። ካዎይ፥ “ዪ፥ ታ ናአዉ አበሰሎመ ታሳ! ታ ናአዉ ታሳ! ነ ግሾ ታ ሀይቃርክና! ዪ፥ ታ ናአዉ አበሰሎመ ታሳ!” ያግድ ዬክስ።