1 ካዎይ፥ “ባ ናኣ አበሰሎመስ ዬከስነ ዘሌለስ” ያግድ እዮኣባስ ኦድዶሶና። 2 ካዎይ ባ ናኣስ ዬከይሳ ስእዳ ግሾ፥ ሄ ጋላስ ኤንቲ ኡባይ ፆንዳ ፆኖይ ዬሆን ላመትስ። 3 ኦላፐ ባቃትድ ዬላን ጉየ ስምዳ ኦላንቾዳ ሄ ጋላስ አሳይ ዶና ፖጎና ካታማ ገልዶሶና። 4 ካዎይ ጉሉንትድ፥ ባ ቃላ ꬎቁ ኦꬅድ፥ “ዪ፥ ታ ናአዉ አበሰሎመ! ዪ፥ ታ ናአዉ! አበሰሎመ ዪ!” ያግድ ዘሌልስ።

5 ሄሳፈ ጉየ፥ እዮኣብ ካዋ ሶ ብድ፥ “ነና፥ ነ አደ ናይታ፥ ነ ማጫ ናይታ፥ ነ ማቸታነ ነ ላገꬆታ አሽዳ ነ አሳ ኡባ ሀች ኔኒ ካዉሻዳሳ። 6 ነና እፀይሳታ ኔኒ ዶሳሳ፤ ነና ዶሰይሳታ ኔኒ እፃሳ። ነ ኦላንቾትነ ኤንታ ሀላቃት ነዉ አይኮካ ግዶናይሳ ኔኒ ሀች ቆንጭሳዳሳ። ኑኒ ኡባይ ሀይቅን፥ አበሰሎመይ ሀች ፓፃ አትዳኮ ኔኒ ኡፋይታናይሳ ታ በአስ። 7 ሀእ ደንዳ! ካረ ከያዳ ነ አሳ ምንꬃ። ታ ጎዳ ሱንꬃን ጫቃይስ፤ ኔኒ ከዮና እፅኮ፥ ሀች ቃማ ኔራ እስ አስካ አተና። ናአተꬃፈ ሀች ጋካናዉ ነና ጋክዳ ኢታ ኡባፈ ሀይስ ነዉ አꬍዳ ኢታ ግዳና” ያግስ።

8 ሄሳ ግሾ፥ ካዎይ ደንድድ ፐንግያ ማታን ኡትስ። ካዎይ ፐንገን ኡትዳይሳ አሳ ኡባይ ስእዳ ዎደ ካዋኮ ይዶሶና።

ሄ ዎደ እስራኤለ አሳ ኡባይ ባንታ ሶ ሶ ባቃትዶሶና። 9 እስራኤለ ኮቻት ኡባይ እሶይ እሱዋራ ሀይሳዳ ያግድ ፓላምዶሶና፤ “ካዎይ ዳዊቲ ኑና ኑ ሞርከታ ኩሸፐ አሽስ፤ ኑና ፍልስፄመታ ኩሸፐ ዎስስስ፤ ሽን እ ሀእ አበሰሎመ ጋሶን ቢታ አግድ ባቃትስ። 10 ኑ ቦላ ካዎታናዳ ኑኒ ትይዳ አበሰሎመይ ኦላን ሀይቅስ። ያትን፥ ካዋ ጉየ ኤሀናባ ህንተ አይስ ስእ ግደቲ?” ያግዶሶና።

11 ካዎይ ዳዊቲ ካህነታ ሳዶቃነ አብያታራ ኪትድ፥ ይሁዳ ጭማታኮ ሀይሳዳ ያግስ፤ “እስራኤለ አሳ ኡባይ ኦደትያ ኦዳይ ካዋ ጋክስ። ያትን፥ ካዋ እያ ጋꬎ ዛር ኤሀናዉ ህንተ አይስ ጉየ አቴቲ? 12 ህንተ ታ እሻታ፤ ህንተ ታ አሾነ ታ ሱꬁ። ያትን፥ ካዋ ጉየ ዛር ኤሀናዉ ህንተ አይስ ሀራታፐ ጉየ አቴቲ?” ያግስ። 13 ቃስ ዳዊቲ አማሳኮ፥ “ኔኒ ታ አሾነ ታ ሱꬁ ግድኪ? ሀችፈ ዶምን፥ ታኒ ነና እዮኣባ በሳን ታ ቶራ ሞጮና ኦꬆና እፅኮ፥ ፆሲ ታና ፕርዶ” ያግስ።

14 እ ይሁዳ አሳ ኡባ ዎዛና እስኖ ኦꬅድ ሻምስ። ሄሳ ግሾ፥ ኤንቲ ካዋኮ ኪትድ፥ “ኔራ ነ አሳራ ኡባይ ሃ ስምተ” ያግዶሶና። 15 ካዎይ ስሚድ፥ ዮርዳኖሰ ሻፋ ጋካናዉ ይስ። ይሁዳ አሳይ ካዋ ዮርዳኖሰ ሻፋ ፕንꬃናዉ ጋልጋላ ብዶሶና።

16 ብራቅማ አደይ፥ ብንያመ ኮቻይ፥ ጌራ ናአይ ሳም ዳዊታ ሞካናዉ ኤለስድ ይሁዳ አሳራ ብስ። 17 እያራ ብንያመ ኮቸ ግድዳ ሙኩሉ አሳይ፥ ሳኦላ አይለይ ሲብ፥ ታማነ እቻሹ እያ ናይትነ ላታሙ አይለት እያራ ደኦሶና። ኤንቲ ካዎይ ደእያ በሳ ዮርዳኖሰ ሻፋ ድርግሸ ብዶሶና። 18 ካዋ ሶ አሳ ኤሀናዉነ ካዋ ኡፋይስያባ ኦꬃናዉ ፕንያ በሳራ ፕንዶሶና።

ጌራ ናአይ ሳም ዮርዳኖሰ ሻፋ ፕንዳ ዎደ ካዋ ስንꬃን ጉፋንድ፥ 19 “ካዋዉ ታ ናጋራ ታይቦፓ። ታ ጎዳይ፥ ካዎይ፥ የሩሳላመፐ ከይያ ዎደ ታኒ ነ አይለይ ቆህዳ ቆሁዋ ሀሳዮፓ። ሄሳ ነ ኡሎን ኦይኮፋ። 20 ነ አይለይ ታኒ ናጋራ ኦꬅዳይሳ ኤራይስ፤ ሽን ታ ጎዳ፥ ካዋ ሞካናዉ ዮሰፋ ሶ አሳ *ዎይኮ ፑደሀ ባጋን ደእያ እስራኤለ ዘረꬃ ኡባፈ ጉሱ። ኡባፈ ኮይሮታዳ ታኒ ሀች ያስ” ያግስ።

21 ፃሩያ ናአይ አብስ፥ “ሳም ጎዳይ ትይዳ ካዋ ባድዳ ግሾ ሀይቃናዉ በሰነዬ?” ያግስ።

22 ዳዊቲ አብሳኮ፥ “ህንተኖ፥ ፃሩያ ናይቶ፥ ህንተና ጋꬅያባይ አይቤ? ህንተ ሀች ታዉ ሞርከ ግዴት! ሀች እስራኤለን አይ አስካ ሀይቀና! ሀች እስራኤለ ካዎይ ታና!” ያግስ።

23 ካዎይ ሳም፥ “ነ ሀይቃካ” ያግድ ጫቅስ።

24 ቃስ ሳኦላ ናአይ መምፕቦስተይ ካዋ ሞካናዉ ዱገ ዎꬍስ። ካዎይ ብዳ ጋላሳፐ ዶምድ እ ሳሮን ጉየ ስምያ ጋላስ ጋካናዉ መምፕቦስተይ ባ ቶሁዋነ ባ ማኡዋ ሜጭቤና፤ ባ ቡቻ ሜድቤና። 25 መምፕቦስተይ ካዉዋራ ጋሄታናዉ የሩሳላመፐ ይዳ ዎደ ካዎይ፥ “መምፕቦስተ፥ ኔኒ ታራ አይስ ባብኪ?” ያግድ ኦይችስ።

26 መምፕቦስተይ፥ “ታ ጎዳዉ ካዋዉ፥ ታኒ ነ አይለይ ስላ ግድያ ግሾ ‘ታኒ ቶጋዳ ካዉዋራ ባና መላ ታ ሀርያ ኮራ’ ያጋስ። ሽን ታ አይለይ ሲብ ታና ጭምስ። 27 ታ ጎዳ፥ ካዋስ ዎርዶ ኦድድ ታ ሱንꬃ ኢስስ። ኔኒ ታ ጎዳይ፥ ካዎይ ፆሳ ኪታንቾ መላ ግድያ ግሾ ነና ሎእዳባ ኦꬃ። 28 ታ አዋ ሶ አሳ ኡባይ ሀይቃናዉ በሴስ፥ ሽን ታኒ ነ አይለይ ነ ጋይታፐ መይሳታራ ማና መላ ታዉ በሰ እማዳሳ። ያትን፥ ሄሳፈ አꬍያባ ካዋ ኦይቻናዉ ታዉ አይ ማት ደኢ?” ያግስ።

29 ካዎይ ዛሪድ፥ “ኔኒ ዳሮባ ኦደታናዉ ኮሸና። ኔራ ሲባራ ጋድያ ሻከትድ ኤካና መላ ኪታስ” ያግስ። 30 መምፕቦስተይ፥ “ታ ጎዳይ፥ ካዎይ ሳሮ ሶ ስማፈ አትሽን፥ ኡባይ ሲባስ ግዶ” ያግስ።

31 ጋላዳ አደይ ባርዝለይ ካዉዋራ እስፈ ዮርዳኖሰ ፕንድ እያ ሞይዛናዉ ሮጋልማፐ ይስ። 32 ባርዝለይ ላይꬅ ሆስፑን ታሙ ግድዳ ጭማ አስ። እ ዳሮ ዱረ ግድያ ግሾ ካዎይ ማሀናይማ ካታማን ደእያ ዎደ ካዋስ ኮሽያባ እሚስ። 33 ካዎይ እያኮ፥ “ኔኒ ታራ የሩሳላመ የꬋ፤ ታኒ ነዉ ኮሽያባ እማና” ያግስ።

34 ሽን ባርዝለይ፥ “ታኒ ህዛፐ ዳሮ ላይꬅ ደእከ፤ ታኒ ካዉዋራ የሩሳላመ አይስ ቦ? 35 ታኒ ሀእ ሆስፑን ታሙ ላይꬃ አስ፤ ታኒ ኢታነ ሎኦ ሻካዳ ኤራናዉ ዳንዳእያና? ታኒ ነ አይለይ ታ ምያባነ ኡያባ ማልኡዋ ሻካዳ ኤራናዉ ዳንዳእያና? ታኒ አደነ ማጫ የꬅ ሻካዳ ስአናዉ ዳንዳእያና? ያትን፥ ታኒ ነ አይለይ፥ ታ ጎዳዉ ካዋዉ አይስ ቶሆ ግዶ? 36 ታኒ ነ አይለይ ነና ዮርዳኖሰ ፕንꬃና። ሽን ካዎይ ታዉ ኩሸ ዛራናዉ አይስ ኮሺ? 37 ታኒ ታ አዋነ ታ አየ ዱፉዋ ማታን ታ ካታማን ሀይቃና መላ ስማይስ። ነ አይለይ ክምሃም ሀይስሽ፤ ታ ጎዳ፥ ካዉዋራ እ ቦ፤ ነና ኡፋይስያባ እያዉ ኦꬃ” ያግስ።

38 ካዎይ፥ “ክምሃም ታራ ፕኖ፤ ነና ኡፋይስያባ ታኒ እያዉ ኦꬃና። ቃስ ኔኒ ታና ኦይችያባ አይባ ግድኮካ ታኒ ነዉ ኦꬃና” ያግስ። 39 ሄሳፈ ጉየ፥ አሳ ኡባይ ዮርዳኖሰ ፕንዶሶና፤ ካዎይካ ፕንስ። ካዎይ ባርዝለ ዬርድ አንጅስ፤ ባርዝለይ ባ ሶ ስምስ።

40 ካዎይ ዮርዳኖሰ ፕንድ ጋልጋላ ብያ ዎደ ክምሃም እያራ እስፈ ብስ። ይሁዳ ኦላንቾት ኡባይነ እስራኤለ ኦላንቾታፐ ባጋት ካዉዋራ ብዶሶና።

41 እስራኤለ ኡባይ ካዋኮ ብድ፥ “ኑ እሻት፥ ይሁዳ አሳይ ካዋነ እያ ሶ አሳ ቆስድ፥ እያ አሳራ እስፈ ዮርዳኖሰ አይስ ፕንꬅዶና?” ያግዶሶና።

42 ይሁዳ አሳይ፥ “ኑኒ ሄሳ ኦꬅዳይ ካዎይ ኑስ ማታ ዳቦ ግድያ ግሾሳ። ያትን፥ ህንተ ሄሳስ አይስ ይሎተቲ? ኑኒ ካዉዋፐ አይኮ ምዶ? ዎይኮ ኑኒ እያፐ አይኮ ኤክዶ?” ያግዶሶና።

43 እስራኤለ አሳይ፥ “ካዉዋፐ ታሙ ኩሸይ ኑሳ፤ ዳዊታ ማታን ኑስ ህንተፈ አꬎ ማት ደኤስ! ያትን፥ ህንተ ኑና አይስ ካꬍደቲ? ካዋ ጉየ ዛሪድ ኤሀናዉ ኮይሮትድ ኦድዳይ ኑና ግዶኮ?” ያግዶሶና።

ሽን እስራኤለ አሳፐ ይሁዳ አሳይ ዳሮ ዎልቃንꬅድ ሃሳይዶሶና።