21
ጋባኦናታ ሀሎ ከሳ
1 ዳዊታ ካዎተꬃ ላይꬃን ቢታይ ሄꬑ ላይꬅ ኩመꬅ ኮሻትስ። ሄሳ ግሾ፥ ዳዊታ ጎዳ ኦይችን፥ ጎዳይ፥ “ሄስ ሀንዳይ ሳኦልነ እያ ሶ አሳይ ጋባኦና አሳ ዎꬍዳ ግሾ ሱꬃ ጎመይ ኤንታ ጋክስ” ያግስ።
2 ያትን ካዎይ ጋባኦና አሳ ፄግድ ኦድስስ። ጋባኦና አሳት እስራኤለ ዛረ ግዶናሽን፥ ኤንቲ አሞረ አሳፐ አትዳይሳታ። እስራኤለት ኤንታ አሻናዉ ኤንታራ ጫቅዶሶና፤ ሽን ሳኦል እስራኤለስነ ይሁዳስ ምሸትዳ ግሾ፥ ኤንታ ኩመꬅ ꬋይሳናዉ ኮይስ። 3 ዳዊቲ ጋባኦና አሳ፥ “ታኒ ህንተዉ አይ ኦꬆ? ጎዳ ላታ ህንተ አንጃና መላ ታኒ ህንተና አይ አጮ?” ያግስ።
4 ኤንቲ ዛሪድ፥ “ኑኒ ሳኦላፐ ዎይኮ እያ ሶ አሳፐ ዎርቃ ዎይኮ ብራ ኦይቾኮ። ቃስ እስራኤለ ግዶፈ እስ አስካ ዎꬋናዉ ኑስ ማት ባዋ” ያግዶሶና።
ዳዊቲ፥ “ያትን፥ ታኒ ህንተዉ አይ ኦꬃና መላ ኮዬቲ?” ያግድ ኦይችስ።
5 ኤንቲ፥ “ሳኦል ኑና ꬋይስስ፤ ኑፐ አይ አስካ እስራኤለ ቢታን አዉንካ ፓፃ ዶና መላ ማቀትስ። 6 ሄሳ ግሾ፥ ሳኦላ ኮቻፈ ላፑን አደታ ኑስ እማ። ጎዳይ ዶርድ እያ ካዎꬅዳ ሳኦላ ካታማን፥ ግብአን፥ ጎዳ ስንꬃን ኑኒ ኤንታ ካቃና” ያግዶሶና።
ካዎይ፥ “ታኒ ኤንታ ህንተዉ አꬃዳ እማና” ያግስ።
7 ሳኦላ ናአይ ዮናታንነ ዳዊቲ ጎዳ ስንꬃን ጫቅዳ ጫቁዋ ግሾ፥ ሳኦላ ናኣ፥ ዮናታና ናኣ መምፕቦስተ ካዎይ አሽስ። 8 ሽን ካዎይ ዳዊቲ እዮሄላ ናእያ ራፅፋ ሳኦላስ የልዳ ናምኡ አደ ናይታ፥ አርሞናነ መምፕቦስተ፥ ቃስ ሳኦላ ናእያ መሮባ፥ ማሆላ አድያ ባርዝለ ናኣ አድርኤላስ የልዳ እቻሹ አደ ናይታ ኤክስ። 9 ጋባኦና አሳስ አꬅድ እምን፥ ኤንቲ ጎዳ ስንꬃን ዙማ ሁጰን ካቅዶሶና፤ ላፑናይ እስፈ ሀይቅዶሶና። ኤንቲ ባንጋ ጫካ ዶምያ ዎደ ሀይቅዶሶና።
10 እዮሄላ ናእያ ራፅፋ ካዮ አፍላ ኤካዳ ዛላ ቦላ ባዉ ሂፃዳ፥ ካꬅ ጫክያ ዎድያፐ ብድ አሀታ ቦላ እር ቡካና ጋካናዉ ጋላስ ካፎይ፥ ቃማ ዶእ ቦቾናዳ ናጋሱ።
11 ሳኦላ ላገꬅያ፥ እዮሄላ ናእያ ራፅፋ ኦꬅዳይሳ ዳዊቲ ስእስ። 12 ዳዊቲ ብድ፥ ሳኦላ መቀꬃነ እያ ናኣ ዮናታና መቀꬃ ጋላዳን ደእያ ያበሳ አሳፐ ኤክስ። ፍልስፄመት ሳኦላነ እያ ናይታ ግልቦአ ደርያ ቦላ ዎꬍድ፥ ቤት-ሳና ጉታራፐ ያበሳ አሳይ ካይሶትድ ኤክዶሶና። 13 ዳዊቲ ሳኦላ መቀꬃነ እያ ናኣ ዮናታና መቀꬃ ሄ በሳፈ ኤህስ። ቃስ ካቀትዳ ላፑን አሳታ መቀꬃካ ሺሽስ። 14 ሳኦላ መቀꬃነ እያ ናኣ ዮናታና መቀꬃ ብንያመ ቢታን ፀላ ካታማን እያ አዋ ቂሳ ዱፉዋን ሞግዶሶና። ካዎይ ኪትዳባ ኡባ ኤንቲ ፖልዶሶና። ሄሳፈ ጉየ፥ ኤንቲ ሄ ቢታ ግሾ ዎስዳ ዎሳ ፆሳይ ስእስ።
ፍልስፄመታራ ኦለትዳ ኦላ
(1 ታር 20:4-8)
15 ፍልስፄመታ ግዶንነ እስራኤለ አሳ ግዶን ዛሪድ ኦል ደንድን፥ ዳዊቲ ባ አሳራ ብስ። ፍልስፄመታራ ኦለትድ ዳዊቲ ዳቡርስ። 16 ራፋያ ያራፐ ይሽብብኖባ ጌተትያ አደይ ደኤስ። ናሰ ብራታፐ ኦሰትዳ እ ኦይክያ ቶራይ ሄꬑ ክሎ ግራመነ ባጋ፤ እ ኦራꬃ ማሽ ዳንጭድ፥ ዳዊታ ዎꬋናዉ ቆፕድ ደኤስ። 17 ሽን ፃሩያ ናአይ አብስ ዳዊታ አሽስ፤ እ ፍልስፄመ አድያ ዎꬍስ። ሄሳፈ ጉየ፥ ዳዊታ አሳይ፥ “እስራኤለ ፆምፐይ ቶኦናዳ ኔኒ ዛራዳ ኑራ ኦላ ባካ” ያግድ ጫቅዶሶና።
18 ጎባ ጌተትያ በሳን ፍልስፄመታራ ሀራ ኦል ደንድስ። ሄ ዎደ ኩሳታ አደይ ሳባክ፥ ራፋ ያራ ግድዳ ሳፋ ጌተትያ ኡራ ዎꬍስ። 19 ቃስካ ሄ በሳን ፍልስፄመታራ ሀራ ኦል ደንድን፥ ቤተለመፐ ይዳ ያእራ ናኣ፥ ኤልሀናን፥ ቶራ ቶማይ ዋንዳራሸ መላ ግድዳ ጋተ አድያ ጎልያዳ ዎꬍስ።
20 ቃስካ ጋተን ሀራ ኦል ደንድስ። ሄ በሳን እስ አዱሳ አደይ ደኤስ። ሄ አድያስ እስ እስ ኩሽያንነ እስ እስ ቶሁዋን ኡሱፑን፥ ዎል ቦላ ላታማነ ኦይዱ ብራት ደኦሶና። እካ ራፋያ ያራፐ ግድዳ አስ። 21 ሄ አደይ እስራኤለ ቡሻይዳ ዎደ ዳዊታ እሻ ሳማ ናአይ ዮናታን እያ ዎꬍስ።
22 ሀ ኦይዳት ጋተን ደእያ ራፋያ ያራታ። ኤንታ ዳዊቲነ እያ አሳይ ዎꬍዶሶና።