22
ዳዊታ ፆኖ ማዝሙረ
(ማዝ 18:1-50)
1 ጎዳይ ሳኦላ ኩሸፐነ እያ ሞርከታ ኡባ ኩሸፐ አሽዳ ጋላስ ዳዊቲ ጎዳስ ሀ ማዝሙርያ የፅስ።
2 ጎዳይ ታ ዛላ፤
ታዉ ሚፃ፤
እ ታና አሸይሳ።
3 ታ ፆሳይ ታኒ ባቃታዳ አትያ ዛላ፤
እ ታ ጎንዳልያ፤
እ ታ አቶተꬃ ዎልቃ።
እ ታኒ ባቃታዳ አትያ በሲ፤
ነ ታና ማካላንቾታ ኩሸፐ አሻሳ።
4 ጋላት በሲያ ጎዳ ታኒ ፄጋና፤
ታኒ ታ ሞርከታፐ አታና።
5 ሀይቆ ዙለይ ታና ተቅስ፤
ꬋዮ ድኦይ ታና ዳጋንꬅስ።
6 ስኦለ ዎዶሮይ ታና ቃቻና ሀኔስ፤
ሀይቆይ ፅሄዳ ታና ኦይክስ።
7 ታና መቶይ ኡንኤꬅን ጎዳ ፄጋስ፤
ታና ማዳና መላ ታ ፆሳኮ ዋሳስ።
እ ባ ኬꬃን ታ ቃላ ስእስ፤
ታ ዋስዳ ዋሶይ እያ ሀይꬃን ዎꬍስ።
8 ፆሳይ ሀንቀትዳ ግሾ፥
ቢት ቃፅስ፤ ቡቀትስ፤
ሳሎታ ፃጶይ ኮኮርስ፤ ቃፅስ
9 እያ ሲꬍያፐ ጩያይ ከይስ፤
እያ ዶናፐ ታማ ላጮይነ
ፁግያ ቦንቆይ ከይስ።
10 ሳሉዋ ጳልቅድ ዱገ ዎꬍስ፤
እያ ቶሁዋፐ ጋርሳራ ሳካና ꬉም ደኤስ።
11 ክሩበታን ኡትድ ፓልስ፤
ጫርኮ ቀፍያ ቦላ ኡትድ ብስ።
12 ባና ꬉማን ተቅስ፤
እያ ዱንካነይ እራራ ስከትዳ ሻራ።
13 እያ ስንꬃን ደእያ ፖኡዋፐ
ታማ ቦንቆይ ከዬስ።
14 ጎዳይ ሳሎፐ ጉምስ፤
ኡባፈ ꬎቃ ፆሳይ ባ ቃላ ስስስ።
15 ባ ዶንግያ ዱክድ፥ ባ ሞርከታ ላልስ፤
ዎልአንꬃ ፖኦ ኪትድ፥ ኤንታ የደꬅስ።
16 ጎዳይ ሴርዳ ዎደነ
ሀንቀትድ ፔኑቅዳ ዎደ፥
አባ ግዶን ቢታይ በንትስ፤
ሳኣ ባሶይካ ቆንጭስ።
17 ጎዳይ ቦላፈ ኩሸ የድድ፥
ታና ኦይክስ፤
ጪሞ ሃꬃፈ ታና ከስስ።
18 እ ታና ታ ዎልቃማ ሞርከታፐ፥
ታ ዎልቃፈ ቦላ ግድዳ ታና እፀይሳታፐ አሽስ።
19 ታ መቱዋ ጋላስ ኤንቲ ታ ቦላ ደንድዶሶና፤
ሽን ጎዳይ ታና ዘምፕሰይሳ።
20 እ ታና ዳልጋ በሲ ከስስ፤
ታናን ኡፋይትዳ ግሾ ታና አሽስ።
21 ታ ፅሎተꬃዳ ጎዳይ ታዉ ቃንፅስ፤
ታ ኩሸ ጌሻተꬃዳ ታዉ ዛርስ።
22 አይስ ጊኮ ታኒ ጎዳ ኦግያ ካላስ፤
ቃስ ታ ፆሳ አጋዳ ኢታ ኦꬃብከ።
23 ታኒ እያ ህግያ ኡባ ናጋስ፤
እያ ዎጋ ፖላናይሳ አጋብከ።
24 ታኒ እያ ስንꬃን ሱረ ደአስ፤
ታና ናጋራፐ ናጋስ።
25 ጎዳይ ታዉ ታ ፅሎተꬃዳነ
ታ ጌሻተꬃዳ ዛርስ።
26 ኔኒ ኬሀታስ ኬሀ፤
ሱረታስ ኔኒ ሱረ።
27 ጌሻታስ ኔኒ ጌሽ፤
ሽን ጌላታስ ኔኒ ሞርከ።
28 ባንታና ካዉሸይሳታ አሻሳ፤
ሽን ኦቶራንቾታ ካዉሻሳ።
29 አቤት ጎዳዉ፥ ታ ፆምፐይ ነና፤
ጎዳይ ታ ꬉማ ፖእስስ።
30 ነ ማዱዋን ታ ሞርከታ የꬋዳ ባና፤
ታ ፆሳን ግምበ ድርሳ ጉፓ አꬋና።
31 ፆሳ ኦገይ ሱረ፤
ጎዳ ቃላይ ጌሽ፤
እያኮ ባቃትያ ኡባስ እ ጎንዳለ።
32 ጎዳይ አትሽን፥ ሀራ ፆሲ ኦኔ?
ኑ ፆሳይ አትሽን፥ ሀራ ዛል ኦኔ?
33 ፆሳይ ታዉ ምኖ ሚፃ፤
እ ታ ኦግያ ፖሎ ኦꬄስ።
34 እ ታ ቶሁዋ ገንኤ ቶሆዳ ምንꬄስ፤
ታና ꬎቃ በሳን ምንꬅድ ኤሴስ።
35 እ ታ ኩሽያ ኦላስ ሎህሴስ፤
ታ ቀሰይ ናሰ ብራታ ዶንገ ዱኬስ።
36 ታና አሽያ ነ ጎንዳልያ ታዉ እማዳሳ፤
ነ ካትሶይ ታና ግታዬስ።
37 ታ ሄመꬃ ዳልግሳሳ፤
ታ ጋድያ ምንꬃሳ።
38 ታ ሞርከታ የደꬃዳ መንረꬃስ፤
ኤንቲ ꬋዮና ደእሽን ጉየ ስምከ።
39 ኤንቲ ዛሪድ ደንዶና መላ ሾጫስ፤
ታ ቶሁዋፐ ጋርሳን ኩንድዶሶና።
40 ኦላስ ታዉ ዎልቃ ዳንጭሳዳሳ፤
ታ ሞርከታ ታዉ ጉልባትሳዳሳ።
41 ታ ሞርከታ ታ ስንꬃፈ ባቃትሳዳሳ፤
ታና እፀይሳታ ꬋይሳስ።
42 ማደ ኮይድ ዋስዶሶና፤
ሽን ኦንካ ኤንታ አሽቤና።
ጎዳ ኤንቲ ፄግዶሶና፤
ሽን እ ኤንታዉ ኮይቤና።
43 ታኒ ኤንታ ባናዳ ሊቅሳስ፤
ኦገ ኡርቃዳ ኤንታ የꬋስ።
44 ማካላ ታ አሳፐ ታና አሻዳሳ፤
ካዎተꬃታ ቦላ ታና ሹማዳሳ፤
ታ ኤሮና አሳይ ታዉ ሃረትስ።
45 አላጋ ደረይ ታና አዳሼስ፤
ታ ዎርያ ስእድ ታዉ ኪተቶሶና።
46 ኤንቲ ዎልቃ ꬋይዶሶና፤
ባንታ ሚፃፐ ኮኮርሸ ከይድ ዮሶና።
47 ጎዳይ ደኦን ደኤስ! ታ ዛላይ አንጀቶ።
ታና አሽያ ዛላይ ꬎቁ ꬎቁ ጎ።
48 እ ታ ሃሉዋ ከይያ ፆሳ፤
ካዎተꬃታ ታፐ ጋርሳን ሃርሴስ።
49 ታ ሞርከታፐ ታና አሼስ፤
ታ ሞርከታ ቦላ ታና ꬎቁ ꬎቁ ኦꬃሳ፤
ኦዳ መꬍያ አሳፐ ታና አሻሳ።
50 አቤት ጎዳዉ ታኒ ካዎተꬃታ ግዶን ነና ጋላታና፤
ነ ሱንꬃ የፃና።
51 ፆሳይ ባ ካዋስ ግታ ፆኖ እሜስ፤
ባ ትይዳ ዳዊታስነ እያ ኮቻስ፥
መርና ሲቁዋ በሴስ።