23
ዳዊታ ዉርሰꬃ ሃሳያ
1 ሀይስ ዳዊታ ዉርሰꬃ ሃሳያ።
እሰየ ናኣ ዳዊታ ዉረሰꬃይ ሀይሳ፤
እ ያይቆባ ፆሳን ትየትዳይሳ፤
ፆሳይ እያ ꬎቁ ꬎቁ ኦꬅዳይሳ፤
እስራኤለን ሎኦ ማዝሙረ የፀይሳ።
2 “ጎዳ አያናይ ታ ባጋራ ኦዴስ፤
እያ ቃላይ ታ እንፃርሳን ደኤስ።
3 እስራኤለ ፆሳይ ታዉ ኦድስ፤
እስራኤለ ዛላይ ሀይሳዳ ያግስ።
‘ፅሎተꬃን ሃርያ ካዎይ፥
ፆሳ ያሻን አይስያ ካዎይ፥
4 እ ሻር ባይና ጉራ ዶልያ
ፃልቀ ፖኦ መላ።
እ እር ቡክድ አꬍን፥
ቢታፈ ማታ ዶልስያ ቦቃልሳ መላ።’
5 ቱማ ታ ኬꬃ አሳይ ፆሳ ስንꬃን ሱረ፤
እ ታራ መርናዉ ጫቅስ፤
ሀ ጫቆይ ጊግድ፥ ምንድነ ናገትድ ደኤስ።
ፆሳይ ታዉ ፆኖ እማና፤
ታ አሞትዳባ ኡባ እ ቱማ ፖላና።
6 ሽን ኢታ አሳት ኡባይ
ኩሸን ሺሻናዉ ሀኖና አጉንꬃዳ ዎራ ሆለታና።
7 አጉንꬁ ቦችያ ኦንካ
ዋለ ዎይኮ ፃምአ ባ ኩሸን ኦይካናዉ ኮሼስ፤
ሄስ ባ ደእያ በሳን ኤፃና” ያግስ።
ዳዊታራ ደእያ ምኖ አሳታ
(1 ታር 11:10-41)
8 ምኖ ዳዊታ አሳታ ሱንꬃይ ሀይሳፈ ካልድ ደኤይሳታ። ኮይሮይ፥ ታክሞና የለታ ግድዳ ዮሴብ-በስትቤተ ጌተቴስ፤ እ ሄꬓታ ሀላቃ፤ እስ ቶሆ ኦላን ባ ቶራን ሆስፑን ፄቱ አስ ዎꬍስ።
9 ሄꬓታፐ እሶይ፥ እያ ካልያ ናምአንꬆይ፥ አሆሀ ሼሽ ግድዳ ዶዶ ናኣ አላዛራ። እስ ጋላስ እነ ዳዊቲ ኦላስ ሺቅዳ ፍልስፄመታ ማንድዶሶና፤ እስራኤለ አሳይ ጉየ ስምስ። 10 ሽን እ ባ በሳን ምን ኤቅድ፥ እያ ኩሸይ አርጋጭድ ማሻራ ኦይከታና ጋካናዉ ፍልስፄመታ ሾጭስ። ሄ ጋላስ ጎዳይ ግታ ፆኖ እሚስ። ኦላይ ኤቅን፥ ኦላንቾት አላዛራኮ ስሚድ ይዶሶና፤ ሽን ኤንቲ ሀይቅዳ ፍልስፄመታፐ ኦላ ማኦ ቃርዶሶናፐ አትሽን፥ ሀራባ ኦꬅቦኮና።
11 እያፐ ካለይ ቃስ አሮዳ የለታ ግድዳ አጋ ናኣ ሳማ። እስ ጋላስ ፍልስፄመት ምስረይ ኩምዳ ሾቃን፥ ሌህ ጌተትያ በሳን ሺቅን፥ እስራኤለት ኤንታ ስንꬃፈ ባቃትዶሶና። 12 ሽን ሳም ሾቃ ግዶን ሙርት ኤቅድ ኦለትስ። ፍልስፄመታ ዎꬍስ፤ ሄ ጋላስ ጎዳይ ዎልቃማ ፆኖ እሚስ።
13 ካꬃ ጫካ ዎደ ሀስታሙ ምኖ አሳታፐ ሄꬓት አዱላማ ጎንጎሉዋ ዳዊታኮ ብዶሶና። ሄ ዎደ ፍልስፄመ ኦላንቾት ራፋይመ ዛንጋራን ዱንካንዶሶና። 14 ሄ ዎደ ዳዊቲ ሚፃን ደኤስ፤ ፍልስፄመ ኦላንቾታ ጩጋይ ቃስ ቤተለመን ኦላ ካምበ ደኤስ። 15 ዳዊቲ ሃ ኡያናዉ አሞትድ፥ “ቤተለመ ካታማ ፐንግያ ማታን ደእያ ኦላፐ ሃ ታና ኦነ ኡሻናይ” ያግስ። 16 ሀ ሄꬑ ምኖ አሳት ፍልስፄመ ኦላንቾታ ጉታ ካንꬅድ፥ ቤተለመ ካታማ ፐንገን ደእያ ኦላፈ ሃ ዱቅድ ዳዊታስ ኤህዶሶና። ሽን እ ኡዮና እፅድ፥ ጎዳ ስንꬃን ትግድ፥ 17 “አቤት ጎዳዉ፥ ሀይሳ ኡያናይስ ታፐ ሃኮ! ሀ ሃꬃ ባንታ ሸምፑዋ ባይዝድ ኤህዳ አሳታ ሱꬁ ግደኔ?” ያግድ ኡዮና እፅስ።
ሀ ሄꬑ ምኖ አሳት ሀይሳ ኦꬅዶሶና።
18 ፃሩያ ናኣ እዮኣባ እሻይ አብስ ሀስታማታ ሀላቃ፤ እ ሄꬑ ፄቱ አሳታ ባ ቶራን ኦልድ ዎꬍስ፤ እካ ሄꬓታዳ ኤረትስ። 19 እ ሀስታማታፐ አꬍድ ቦንቸትዳ አስ፤ እ ሄꬓታ መላ ኤረትዳ አስ ግዶና እፅኮካ ሀስታማታስ ሀላቃ።
20 ቃብፅኤላ የለታ ግድዳ ዮዳሄ ናአይ ባናያስ ምኖ ኦሶ ኦꬅዳ ግታ አስ። እ ናምኡ ኤረትዳ ሞአበ አሳታ ዎꬍስ። እስ ዎደ ሻች ዎꬍያ ጋላስ ኦላን ዎꬍድ ጋሞ ዎꬍስ። 21 ቃስ እስ ግታ ግብፀ አድያ ዎꬍስ፤ ግብፀ አደይ ቶራ ኦይክስ፤ ሽን እ ፃምአ ኦይክድ እያኮ ብድ፥ እያ ኩሸፐ ቶራ ዳፍ ኤክድ፥ እያ ቶራራ እያ ዎꬍስ። 22 ዮዳሄ ናአይ ባናያስ ሀይሳ ኦꬅስ፤ እያ ሱንꬃይ ሄꬓታይሳዳ ኤረትስ። 23 እ ሀስታማታ ግዶን ዳሮ ቦንቸትዳ አስ፥ ሽን እ ሄꬓታ ታይቡዋን ዴና። ዳዊቲ እያ ባና ናግያ ዎታዳረታስ ቶራ ሞጮና ኦꬅስ።
24 ሄ ሀስታማታ ግዶን ደኤይሳት፥ እዮኣባ እሻ አሳሄላ፥ ቤተለመ የለታ ግድዳ ዶዳ ናኣ ኤልያና፥ 25 አሮዳ የለታ ግድዳ ሳማነ ኤልቃ፥ 26 ፋልፃ ያራ ግድዳ ሰለሳ፥ ታቆሀ አድያ ኤስካ ናኣ እራሳ፥ 27 አናቶተ የለታ ግድዳ አብኤዘራ፥ ኩሳ የለታ ግድዳ ማቡናያ፥ 28 አሆሀ ያራ ግድዳ ፃልሞና፥ 29 ናፆፋ የለታ ግድዳ ማህራያነ ባአና ናኣ ሄለባ። ብንያመ ቢታን፥ ግብአ የለታ ግድዳ ርባያ ናኣ እታያ፥ 30 ጵርአቶና የለታ ግድዳ ባናያ፥ ጋኣሳ ዛንጋራ ማታፐ ይዳ ህዳያ፥ 31 አራባ የለታ ግድዳ አባልቦና፥ ባርሁማ አድያ አዝሞታ፥ 32 ሻአልቦና የለታ ግድዳ ኤልያባ፥ አሳና ናይታ፥ ዮናታና፥ 33 አሮዳ የለታ ግድዳ ሳማነ ሻራ ናኣ አህኣማ፥ 34 ማእካ የለታ ግድዳ አሀስባያ ናኣ ኤልፋላፃ፥ ግሎ የለታ ግድዳ አክፆፈላ ናኣ ኤልኣማ፥ 35 ቃርመሎሳ የለታ ግድዳ ሄፅራ፥ አራባ የለታ ግድዳ ፓኣራ፥ 36 ሱባ የለታ ግድዳ ናታና ናኣ ይግኣላ፥ ጋደ የለታ ግድዳ ባና፥ 37 አሞነ የለታ ግድዳ ሰለቃ፥ ፃሩያ ናኣ እዮኣባ ኦላ ሚሽያ ቶክያ ባኤሮታ የለታ ግድዳ ናህራያ፥ 38 ያትራ ያራ ግድያ እራያነ ጋሬባ፥ 39 ህተ አድያ ኦርዮና። ኤንቲ ኩመꬅ ሀስታማነ ላፑና።