1 ጎዳ ሀንቆይ ቃስካ እስራኤለ ቦላ ኤፅስ፤ ጎዳይ ዳዊታ ኤንታ ቦላ ደንꬅድ፥ “ባዳ እስራኤለነ ይሁዳ አሳ ታይባ” ያግስ። 2 ሄሳ ግሾ፥ ካዎይ ቶራ ሞጮናታ እዮኣባነ ባራ ደኤይሳታኮ ሀይሳዳ ያግስ፤ “እስራኤለ ኮቻታ ዳነፐ በርሳበ ጋካናዉ ታኒ ኤራና መላ እስራኤለ አሳ ብድ ታይብተ” ያግስ።

3 ሽን እዮኣብ፥ “ጎዳይ ነ ፆሳይ ሀ ደእያ አሳ ቦላ ፄቱ ኩሸ ጉጆ! ሄሳ ታ ጎዳ፥ ካዋ አይፈይ በኦ! ሽን ታ ጎዳይ፥ ካዎይ አይስ ሄሳ መላባ ኦꬃናዉ ኮዪ?” ያግስ። 4 ሽን ካዋ ቃላይ እዮኣባነ ቶራ ሞጮናታ ፆንን፥ ኤንቲ ካዋ ስንꬃፈ ከይድ፥ እስራኤለ አሳ ታይባናዉ ብዶሶና።

5 ኤንቲ ዮርዳኖሰ ፕንድ ዱገሀ ባጋን ደእያ፥ ዛንጋራ ግዶን ደእያ አሮኤራ ካታማን ዱንካንዶሶና፤ ያፐ ጋደ ካንꬅድ እያዜራ ጋክዶሶና። 6 ያፐ ኤንቲ ጋላዳነ ህተታ ቢታን ደእያ ቃደሳ ብዶሶና፤ ያፐ ቃስ ዳነ ብዶሶና፤ ያራ ስዶና ጋክዶሶና። 7 ያፐ ደንድድ፥ ፅሮሳ ሚፃነ ህወታነ ካናነታ ካታማ ኡባ ብዶሶና። ዉርሰꬃን ይሁዳ ነገባን ደእያ በርሳበ ብዶሶና።

8 ኤንቲ ቢታ ኡባ ዩይሸ ኡዱፉን አጌናነ ላታሙ ጋላስ ጋምእድ፥ የሩሳላመ ስምዶሶና።

9 እዮኣብ አሳ ታይቡዋ ካዋ ኤርስስ፤ እስራኤለን ማሻን ኦለታናዉ ዳንዳእያ ሆስፑን ፄቱ ሙኩሉ ምኖ ኦላንቾት፥ ይሁዳን ቃስ እቻሹ ፄቱ ሙኩሉ ኦላንቾት ደኦሶና።

10 አሳ ታይብዳፐ ጉየ፥ ዳዊታ ዎዛናይ ህርግን፥ ዳዊቲ፥ “ታኒ ሀ ኦሱዋን ግታ ናጋራ ኦꬃስ። ሽን ሀእ አቤት ጎዳዉ፥ ታኒ ነና ዎሳይስ፤ ታ ናጋራ፥ ነ አይልያ ናጋራ አቶ ጋ። ታኒ ዳሮ ቦዛባ ሀናስ” ያግስ።

11 ዎንተꬃ ጋላስ ዳዊቲ ሂፃፐ ደንድያ ዎደ ዳዊታስ ቆንጨꬅ በእያ፥ ናብያ ጋደኮ ጎዳ ቃል ይስ። 12 “ባዳ፥ ዳዊታኮ፥ ‘ታኒ ነና ሄꬑባፐ እሱዋ ዶራና መላ በሳይስ፤ ታኒ ነ ቦላ ፖላናዉ ኤንታፈ እሱዋ ዶራ’ ያጌስ ጎዳይ” ያግስ።

13 ጋድ ዳዊታኮ ብድ፥ “ሄꬑ ላይꬅ ነ ቢታ ቦላ ኮሻ ኤሆዬ? ዎይኮ ነ ሞርከት ነና የደꬅን፥ ሄꬑ አጌና ኤንታ ስንꬃፈ ባቃታነዬ? ዎይኮ ነ ቢታ ቦላ ሄꬑ ጋላስ ጋዶይ ያናይሳ ዶራይ? አነ ሀእ ቆፓዳ ታኒ ታና ኪትዳይሳስ ዛራናባ ኦዳ” ያግስ።

14 ዳዊቲ ጋደኮ፥ “ታኒ ዳሮ ኡንኤታስ። ጎዳ ማሮታይ ግታ ግድያ ግሾ፥ ኑኒ እያ ኩሸን ኩንዳና፤ ታና አሳ ኩሸን የጎፎ” ያግስ።

15 ሄሳ ግሾ፥ ዎንታፈ ብድ እ ግዳ ጋላሳይ ጋካናዉ ጎዳይ እስራኤለ ቢታን ጋዶ ኪትስ። እስራኤለ ቢታን ዳነፐ ብድ በርሳበ ጋካናዉ ላፑን ታሙ ሙኩሉ አስ ሀይቅስ። 16 የሩሳላመ ꬋይሳናዉ ኪታንቾይ ባ ኩሽያ ምጭዳ ዎደ አሳ ቦላ ጋክዳ ጋዶይ ጎዳ አዛንꬅዳ ግሾ፥ አሳ ሾጭያ ኪታንቹዋኮ፥ “ግዳና! ነ ኩሽያ ዛራ” ያግስ። ጎዳ ኪታንቾይ ሄ ዎደ ያቡሰ አድያ ኦርና ዉዱማን ደኤስ።

17 አሳ ሾጭያ ኪታንቹዋ ዳዊቲ በእዳ ዎደ ጎዳኮ፥ “ናጋራ ኦꬅዳይ ታና፤ ታ ባላስ! ሀ ዶርሳት አይ ኦꬅዶና? ሀያና፥ ታናነ ታ አዋ ሶ አሳ ነ ሴራና መላ ታኒ ዎሳይስ” ያግስ።

18 ሄ ጋላስ ጋድ ዳዊታኮ ይድ፥ “ባዳ፥ ያቡሰ አድያ ኦርና ዉዱማን ጎዳስ ያርሾ በሲ ጊግሳ” ያግስ። 19 ዳዊቲ፥ ጎዳይ ጋደ ባጋራ ኪትዳይሳዳ ኦꬃናዉ ፑደ ብስ። 20 ኦርን ዱገ ፄልያ ዎደ፥ ካዎይነ እያ አሳት ባኮ የይሳ በእስ። እ ጋፃ ከይድ፥ ጉፋንድ ካዋስ ዝግስ።

21 ኦርን፥ “ታ ጎዳይ ካዎይ ባ አይልያኮ፥ አይስ ይዴ?” ያግስ።

ዳዊቲ፥ “አሳ ቦላፈ ጋዶይ ስማና መላ ታኒ ጎዳስ ያርሾ በሲ ጊግሳናዉ ነ ዉዱማ ሻማናዉ ያስ” ያግስ።

22 ኦርን፥ “ታ ጎዳይ፥ ካዎይ ባ ኮይዳባ ኤክድ ያርሾ! ፁሳ ያርሾስ ቦራት ደኦሶና፤ ኤሶ ምꬃስ ቃስ ካꬅ ቡክያ ሚሸይነ ቦራ ቃምባር ደኤስ። 23 ካዋዉ፥ ሀይሳ ኡባ ኦርን ካዋስ እምስ” ያግስ። ጉጅድ ኦርን፥ “ጎዳይ ነ ፆሳይ ነ ያርሹዋ ኤኮ” ያግስ።

24 ሽን ካዎይ፥ “አካይ፥ ታኒ ታ ሚሸን ሻማና። ታ ጎዳ፥ ፆሳስ ፁሳ ያርሾ ጋተይ ባይና ያርሽከ” ያግስ።

ሄሳ ግሾ፥ ካዎይ ዉዱማነ ቦራታ ኦርናፈ እሻታሙ ብራ ሳንትመን ሻምስ። 25 ዳዊቲ ሄ በሳን ያርሾ በሲ ጊግስድ ፁሳ ያርሾነ እስፈተꬃ ያርሾ ጎዳስ ያርሽስ። ጎዳይ ቢታ ግሾ ዎሰትዳ ዎሳ ስእድ፥ ጋዱዋ እስራኤለፐ ድግስ።