1 ፆሳ ሸነን፥ የሱስ ክርስቶሳን በንትዳ ደኦ ኡፋይሳ ማርካታናዉ የሱስ ክርስቶሳ ሀዋረ ግድዳ ጳዉሎሳፐ፥ 2 ታ ዶስያ ናኣ ፅሞትዮሳስ ኪተትዳ ኪታ።

ፆሳ አዋፐነ ኑ ጎዳ ክርስቶስ የሱሳፐ አꬎ ኬሀተꬃይ፥ ማሮተꬃይነ ሳሮተꬃይ ነዉ ግዶ። ሀዋ 16:1.

3 ታኒ፥ ታ ዎሳን ቃማነ ጋላስ ነና ቆፓይስ። ታኒ ዎስያ ዎደ ታ ማይዛታ ፆሳነ ታኒ ሎኦ ካሀን ሀጋዝያ ፆሳ ነ ግሾ ጋላታይስ። 4 ታኒ ነ አፉꬃ ቆፓይስ፤ ነና በአዳ ኡፋይታናዉ ዳሮ ላሞታይስ።

5 ቃስ ነዉ ደእያ ቱማ አማኑዋ ኤራይስ። ሄ አማኖይ በን ነ ዎጋ አየ ሎይድንነ ነ አየ ኤዉንቅን ደእያ አማኑዋ መላ። ሀዋ 16:1. 6 ሄሳ ግሾ፥ ታኒ ታ ኩሽያ ነ ቦላ ዎꬅዳ ዎደ ፆሳይ ነዉ እምዳ እሞታ ኔኒ ዛራ ኤꬃና መላ አኬክሳይስ። 7 አይስ ጊኮ፥ ፆሳይ ኑስ ዎልቃ፥ ሲቆነ ኑ ሁጰ ሃርያ አያና እሚስፐ አትሽን፥ ያሻ አያና እምቤና።

8 ህዛ፥ ኑ ጎዳስ ማርካታናዉ ዬላቶፓ፤ ቃስ እያ ግሾ ቃሸትዳ ታናንካ ዬላቶፓ። ሽን ፆሳይ ነዉ እምያ ዎልቃን ዎንገላ ግሾ፥ ታራ መቶ ኤካ። 9 ፆሳይ ባ ሸነንነ ባ አꬎ ኬሀተꬃን ኑና አሽድ፥ ባ ጌሻ ደረ ኦꬃናዉ ኑና ዶርስፐ አትሽን፥ ኑኒ ኦꬅዳ ኦሱዋ ግሾ ግደና። ሀ አꬎ ኬሀተꬃ ክርስቶስ የሱሳ ባጋራ መርና ዎደታፔ ስን ኑስ እሚስ። 10 ሀእ ሀ አꬎ ኬሀተꬃይ ኑና አሽያ ክርስቶስ የሱሳ ዩሳን ቆንጭስ። እ ሀይቆ ዎልቃ ꬋይስድ፥ ዎንገላ ባጋራ ꬋዮና ደኦ ኑስ ቆንጭስስ።

11 ታኒ ዎንገላ ሳባከ፥ ሀዋረነ አስታማረ ግዳና መላ ፆሳይ ታና ዶርስ። 1 ፅሞ 2:7. 12 ታኒ ሄሳ ግሾ ሀ መቱዋ ኤካይስ፤ ሽን ታ አማነይ ኦነኮ ኤርያ ግሾ ዬላትከ። ታዉ እመትዳ ሀዳራ ሄ ጋላሳይ ጋካናዉ እ ናጋናዉ ዳንዳኤይሳ ኤራይስ።

13 ታኒ ነና ታማርስዳ ቱማ ቃላ ሌምሶ ኦꬃ ኦይካዳ ክርስቶስ የሱሳ ባጋራ ኑባ ግድዳ አማኑዋንነ ሲቁዋን ደአ። 14 ኑ ግዶን ደእያ ጌሻ አያና ዎልቃን ነዉ እመትዳ ሎኦ ሀዳራ ናጋ።

15 ኢሰ ቢታን ደእያ ኡባይ ታፐ ሃክዳይሳ ኤራሳ፤ ኤንታ ግዶን ፍገሉስነ ሄርሞገኔስ ደኦሶና።

16 አነስፎር ታና ዳሮ ዎደ ምንꬅዳ ግሾ ጎዳይ እያ ሶ አሳስ ቃቶ። ታኒ ቃሾ ኬꬃን ደእያ ዎደ እ ታናን ዬላትቤና። 17 ሄሳ ቦላ እ ሮመ ካታማ ይዳ ዎደ ታና ምንꬅ ኮይድ ደምስ። 18 ዉርሰꬃ ጋላሳን ጎዳይ እያዉ ቃታና መላ ታኒ ጎዳ ዎሳይስ። ኤፈሶና ካታማን እ ታና አይ መላ ማድዳኮ ነ ሎይꬃ ኤራሳ።