1 ህዛ፥ ታ ናአዉ፥ ክርስቶስ የሱሳን ደእያ ማሮተꬃን ምና። 2 ዳሮ ማርካታ ስንꬃን ታኒ ነና ታማርስዳ ትምርትያ፥ ሀራታ ታማርሳናዉ ዳንዳእያ አማነትዳ አሳስ ሀዳራ እማ።

3 የሱስ ክርስቶሳስ አማንꬅያ ዎታዳረ ግዳዳ ታራ መቶ ኤካ። 4 ኦላ ዎታዳረይ ባ ቶራ ሞጮና ኡፋይሳናዉ ጊገቴስፐ አትሽን፥ ሀራ ኦሶን ባና ፔሸና። 5 ሄሳዳካ፥ ጋደ ዎፅያ ኦንካ በሲያ ኦገራ ጋደቶና እፅኮ ዎይቶ ኤከና። 6 ጎሻን ዳቡርያ ጎሻንቾይ ባ ዳቡራ አይፍያፐ ምያ ኮይሮ አስ ግዳናዉ በሴስ። 7 ነ አኬካና መላ ጎዳይ ነና ማዳና ግሾ፥ ታ ነዉ ኦድዳባ ነ ዎዛናን ናጋ።

8 ታኒ ማርካትያ ዎንገላ መላ ሀይቆፐ ደንድዳ፥ ዳዊታ ኮቸ ግድዳ የሱስ ክርስቶሳ ቆፓ። 9 ታኒ ዎንገላ ኦድያ ግሾ፥ ኢታባ ኦꬅዳ አሳዳ፥ ቃሸታዳ መቶ ኤካይስ። ሽን ፆሳ ቃላይ ቃሸተና። 10 ሄሳ ግሾ፥ ፆሳይ ዶርዳ አሳት ክርስቶስ የሱሳን ደእያ አቶተꬃ መርና ቦንቹዋራ ኤካና መላ ኤንታ ግሾ ኡባባን ዋየታይስ።

11 ሀይሳዳ ግያ ቱማ ቃል ደኤስ፤

14 ኔኒ ኤንታ ሀይሳ አኬክሳ፤ ኤንቲ ቃላታ ጋሶን ፓላሞና መላ፥ ጎዳ ስንꬃን ኤንታ ዞራ። ሄስ ስኤይሳታ ꬋይሰስፐ አትሽን፥ አይኮካ ማደና። 15 ኔኒ ቱማ ቃላ ሱረተꬃን ታማርሰይሳነ ዬላዮና ኦሳንቾ ግዳዳ፥ ፆሳይ ናሽያ አሳዳ፥ ነናተꬃ እያዉ እማናዉ ምና። 16 ሽን ሀ አላምያስ እንጀትያ ጎኦና ኦዳፐ ባቃታ። ሄሳ መላ ኦዳይ አሰ ፆሳፈ ሃሴስ። 17 ሄሳ መላ ኦዳይ አሳተꬅ ምድግያ ፓፆና ዎይዛዝረ ማዱንꬃ መላ። ሄሳ መላ ኦዳ ኦደተይሳታ ግዶፈ ሄመነዮስነ ፍልፆስ ደኦሶና። 18 ሀ አሳት ቱማ ኦግያ አግድ፥ “ሀይቅዳ አሳይ ሀይቆፐ በን ደንድዶሶና” ያግድ ጉꬃ አሳታ አማኑዋ ꬋይስዶሶና።

19 ግዶሽን፥ ፆሳይ ምኖ ዛላ ሂፅዳ ግሾ ቃፃናዉ ዳንዳኤና። እያ ቦላ፥ “ጎዳይ ባ አሳ ኤሬስ። ጎዳ ሱንꬃ ፄግያ ኦንካ ኢታ ኦሶፐ ሃኮ” ግያ ቃላይ ፃፈትስ። ታይቦ 16:5.

20 እስ ግታ ኬꬃን ዎርቃፈ ዎይኮ ብራፐ ኦሰትዳ ሚሸታ ፃላላ ግዶናሽን፥ ምꬃፈ ዎይኮ ኡርቃፈ ኦሰትዳ ሚሸትካ ደኦሶና። ሄሳታፐ ባጋት ቦንቾ ኦሶስ፥ ቃስ ባጋት ቶሸትያ ኦሶስ ፔኦሶና። 21 ሄሳ ግሾ፥ ኦንካ ኢታ ኡባ አግኮነ ባና ጌሽኮ፥ ቦንቾ ኦሶ ኦꬅያ ሚሸ ግዳና። ኤንታ ደኦይ ጌሽነ ጎዳ ኡፋይስያባ፥ ቃስ ኤንቲ ሎኦ ኦሶ ኡባ ኦꬃናዉ ዳንዳኤይሳታ ግዳና።

22 ናአተꬃ ኢታ አሙዋፐ ባቃታ። ጌሻ ዎዛናን ጎዳ ፄግያ አሳታራ እስፈ፥ ፅሎተꬃ፥ አማኑዋ፥ ሲቆነ ሳሮተꬃ ካላ።

23 ሽን ኦሽ መይሳ ኤራዳ ኤያተꬅነ ሀዳ ግድዳ ፓላማፐ ሃካ። 24 ጎዳ ኦሳንቾይ አሳ ኡባስ ኬሀ፥ ሎኦ ታማርሰይሳነ ዳንዳአንቾ ግዳናዉ በሴስፐ አትሽን፥ ኦየታናዉ በሰና። 25 እ ባራ ኤቀተይሳታ አሽከተꬃን ሴረይሳ ግዳናዉ በሴስ። ኤንቲ ባንታ ናጋራፐ ስሚድ ቱማ ኤራናዳ ፆሳይ ኦꬃነኮ ኦን ኤር። 26 ኤንቲ ባንታ ዎዛናኮ ስሚድ ባ ሸንያ ኦꬃና መላ ኤንታ ኦይክዳ ፃላሄ ፅህያፐ ከስ ኤካና።