1 ዉርሰꬃ ጋላሳን ኡንኤꬅያ ዎደይ ያናይሳ ኤራ። 2 አሳይ ባንታና ዶሰይሳታ፥ ሚሸ ሲቀይሳታ፥ ጬቀተይሳታ፥ ኦቶረይሳታ፥ ጫየይሳታ፥ ባንታና የልዳይሳታስ ኪተቶናይስታ፥ ጋላቶናይስታ፥ ጌሻተꬅ ባይናይሳታ፥ 3 ሲቆይ ባይናይሳታ፥ ማሮተꬅ ኤሮናይሳታ፥ ዝግረይሳታ፥ ባንታና ሃሮናይሳታ፥ ዎዛና ምኖታ፥ ሎኦ ዶሶናይሳታ፥ 4 ሞርኬስ አꬅድ እመይሳታ፥ ቆፍ ባይናይሳታ፥ ኦቶሮን ሱገተይሳታ፥ ፆሳፈ አꬅድ አሾ ኡፋይሳናዉ ዶሰይሳታ ግዳና። 5 ኤንቲ አማንያ ዳኖሶናፐ አትሽን፥ አማኖ ዎልቃ ካዶሶና፤ ኔኒ ሄሳ መላ አሳታፐ ባቃታ።

6 ኤንታፈ እሶት እሶት አሳ ኬꬃ ገልድ ናጋራን ኦይከትዳይሳታነ ዱማ ዱማ አሞን ሱገትያ ዳቡራንቾ ማጫሳታ ቦላ ጎዳቶሶና። 7 ሄ ማጫሳት ኡባ ዎደ ታማሮሶናሽን፥ ቱማ ኤራናዉ ዳንዳኦኮና። 8 ያነስነ ያምባሬስ ሙሰራ ኤቀትዳይሳዳ ሀ አሳት ጉገይ ኦꬆናይሳታነ አማኖን ኩንድዳ አሳታ ግድያ ግሾ ቱማራ ኤቀቶሶና። ከሳ 7:11. 9 ሽን ያነሳነ ያምባሬሳ ኤያተꬃይ ቆንጭዳይሳዳ ኤንታ ኤያተꬃይካ አሳ ኡባ ስንꬃን ቆንጫና ግሾ ኤንታዉ ሀነና።

10 ሽን ኔኒ ታ ትምርትያ፥ ታ ዱሳ፥ ታ ቆፋ፥ ታ አማኑዋ፥ ታ ዳንዳኣ፥ ታ ሲቁዋ፥ ታ ገንጫ፥ 11 ታ ጎደተꬃነ ታ መቱዋ ኤራሳ። አንፆከ፥ እቆንዮነን፥ ልስፅራ ካታማታን ታና ጋክዳባነ ታኒ ዳንዳእዳ መቱዋ ኤራሳ፤ ጎዳይ ታና ሄ ኡባፈ አሽስ። ሀዋ 13:14-52፤ 14:1-20. 12 ክርስቶስ የሱሳን ፆሳ ኡፋይስያ ደኦ ዳናዉ ኮይያ ኡባይ ጎደታና። 13 ኢታ አሳትነ ባለይሳት ባንታዉ ባለትሸነ ሀራታ ባለꬅሸ ካሰፐ ኢት ኢት ባና።

14 ሽን ነ ታማርዳ ቱማንነ ነ አማንዳ አማኑዋን ኤቃ። ነ ኦደፈ ታማርዳኮ ኤራሳ። 15 ኔኒ ነ ናአተꬃፈ ዶማዳ ክርስቶሳ የሱሳ አማናዳ፥ አቶተꬅ ደምያ ጭንጫተꬅ እማናዉ ዳንዳእያ ጌሻ ማፃፋታ ኤራዳሳ። 16 ጌሻ ማፃፋ ኡባይ ፆሳፈ እመትዳ ቃላ። ሄ ማፃፋይ ቱማ ታማርሳናዉ፥ ባልዳይሳታ ሴራናዉ፥ ሱርሳናዉነ ፅሎተꬃ ዱሳስ ኮሽያ ዞረ እማናዉ ማዴስ። 17 ፆሳ አስ ፖሎነ ሎኦ ኦሶ ኡባ ኦꬃናዉ ጊግዳይሳ ግዳና መላ ማዴስ።