1 ታኒ ነና ፆሳ ስንꬃንነ፥ ካዎ ግድድ ሃራናዉ ቆንጭያ ዎደ ፓፃታነ ሀይቅዳይሳታ ፕርዳናዉ ደእያ ክርስቶስ የሱሳ ስንꬃን ዞራይስ። 2 ቃላ ኦዳ፤ ዎደይ እንጀትን እንጀቶና እፅን ምናዳ ኦዳ። ዳሮ ዳንዳአንነ ታማርሶን አሳ ዞራ ሴራነ ደንꬃ። 3 አሳይ ቱማ ትምርትያ ስኦና እፅያ ዎደይ ያና። ኤንቲ ባንታ አሙዋ ካልድ፥ ባንታዉ ስአናዉ ኡፋይስያባ ኦድያ አስታማረታ ሺሾሶና። 4 ኤንቲ ቱማ ትምርትያ አግድ፥ ቱማ ግዶና ኦዳ ስአናዉ ባንታ ሀይꬃ ዛሮሶና። 5 ሽን ኔኒ ኡባባን ነና ሃራ። መቶ ዳንዳአ። ዎንገላ ማርካተꬃ ኦሱዋ ኦꬃ። ነዉ እመትዳ ፆሳ ኦሶ ኡባ ፖላ።

6 ታኒ ያርሸትያ ዎደይ ጋክስ፤ ሀ አላምያ አጋዳ ብያ ዎደይ ማትስ። 7 ታኒ ሎኦ ኦላ ኦለታስ፤ ታ ጋድያ ዎፃዳ ዉርሳስ፤ አማኑዋ ናጋስ። 8 ስንꬃፈ ፅሎተꬃ ካላቻይ *ፅሎተꬃ ካላቻይ፦ ፅሎተꬃ ደኦ ግሾ፥ ታ ኤካና ካላቻ። ፅሎተꬃ ታዉ ካላቻ ኦꬅድ እሜስ ጉሱ። ታና ናጌስ። ሄሳ ፅሎ ፕርዳ ፕርድያ ጎዳይ ሄ ጋላስ ታዉ እማና። ሄሳ ታ ፃላላስ ግዶናሽን፥ እያ ቆንጨꬃ አሞትያ ኡባስ እማና።

9 ኤለሳ ያዳ ታና በአ። 10 ዴማስ ሀእ አላምያ ዶስድ፥ ታና አግድ፥ ተሰሎንቀ ካታማ ብስ። ቀርቅስ ጋላትያ ቢታ፥ ቃስ ትቶይ ድልማፀ ቢታ ብስ። ቆላ 4:14፤ ፍልሞ 24፤ 2 ቆሮ 8:23፤ ጋላ 2:3፤ ትቶ 1:4. 11 ሉቃሳ ፃላል ታራ ደኤስ። ማርቆስ ፆሳ ኦሶን ታና ማዳናዉ ዳንዳእያ ግሾ፥ ኔራ ኤካዳ ያ። ቆላ 4:14፤ ፍልሞ 24፤ ሀዋ 12:12፥ 25፤ 13:13፤ 15:37-39፤ ቆላ 4:10. 12 ታኒ ትክቆሳ ኤፈሶና ካታማ ኪታስ። ሀዋ 20:4፤ ኤፈ 6:21-22፤ ቆላ 4:7-8. 13 ኔኒ ያሸ፥ ፅሮኣዳ ካታማን ካርፖሳ ማታን አጋዳ ይዳ ታ ኮትያነ ማፃፋታ ታዉ ኤካዳ ያ። ኡባካ ጋልባን ፃፈትዳ ማፃፋታ ኤኮና ዮፓ።

14 ብራታ ቆፅያ እስክንድረይ ታና ዳሮ ቆህስ፤ ጎዳይ እያ ኦሱዋዳ እያዉ ዛራና። 1 ፅሞ 1:20፤ ማዝ 62:12፤ ሮመ 2:6. 15 እ ኑ ትምርትያ ዳሮ እፅያ ግሾ እያፐ ነና ናጋ።

16 ኮይሮ ታ ሞተትያ ዎደ ኡባይ አግድ ብዶሶናፐ አትሽን፥ ኦንካ ታና ማድቤና። ፆሳይ ሄ ናቁዋ ኤንታዉ ታይቦፖ። 17 ሽን ታኒ ኩመꬃ ኪታ አይሁደ ግዶና አሳ ኡባስ ማርካትን፥ ኤንቲ ስአና መላ ጎዳይ ታ ማታን ኤቅድ ታዉ ዎልቃ እሚስ። ቃስ ኮሻትዳ ጋሞዳ ዶና ዶይዳ ሀይቁዋፐ ታና አሽስ። 18 ጎዳይ ታና ኢታ ኡባፈ አሽድ ባ ሳሎ ካዎተꬃ ሳሮን ኤፋና። እያዉ መርናፐ መርና ጋካናዉ ቦንቾይ ግዶ። አምንእ።

19 ጵርስቅላስ፥ አቅላስነ አነስፎራ ሶ አሳስ ታ ሳሮꬁዋ ኦዳ። ሀዋ 18:2፤ 2 ፅሞ 1:16-17. 20 ኤራስፆስ ቆሮንቶሳ ካታማን አትስ። ፅሮፍሞስ ሀርገትዳ ግሾ፥ ምልፀ ካታማን አጋስ። ሀዋ 19:22፤ ሮመ 16:23፤ ሀዋ 20:4፤ 21:29. 21 ባልጎይ ገላናፐ ስን ኤለሳዳ ያ።

ኤዉቡሉስ፥ ጱዴስ፥ ልኑስ፥ ቅላደይነ ሀራ አማንያ አሳት ኡባይ ነና ሳሮ ጎሶና።

22 ጎዳይ የሱስ ክርስቶሲ ነ አያናራ ግዶ።

ፆሳ ማሮተꬃይ ህንተ ኡባራ ግዶ።