1 የሱስ ክርስቶሳ ሀዋረይነ ፆሳ አይለይ፥ ጳዉሎስ፥ ፃፍዳ ዳብዳብያ። ፆሳይ ዶርዳ አሳ አማኑዋ ድቻናዳነ ቱማ አያና ደኡዋ ዋንድ ዳነኮ በሲያ ቱማ ኤራኮ ኤንታ ካለꬃናዉ ታኒ ኪተታስ። 2 ሄ አማኖይነ ኤራተꬃይ መርና ደኡዋ ኡፋይሳ ቦላ ዘምፕስ። ሄሳ ዳሮ ዎደፐ ስን ዎርዶቶና ፆሳይ ኑስ እማና ግድ ቃላ ገልስ። 3 ኑና አሽያ ፆሳይ ባ ዎደን ሀ ኪታ ኦዳና መላ ታዉ ሀዳራ እሚስ።

4 ኑ ኮ አማኑዋን ታ ቱማ ናኣ ግድዳ ትቶ፥

ፆሳ አዋፐነ ኑና አሽያ የሱስ ክርስቶሳፐ አꬎ ኬሀተꬃይ፥ ማሮተꬃይነ ሳሮተꬃይ ነዉ ግዶ። 2 ቆሮ 8:23፤ ጋላ 2:3፤ 2 ፅሞ 4:10.

5 ታኒ ነና ቃርፄሳን አጋዳ ይዳይ፥ ኔኒ አትዳባ ጊግሳናዳነ ታኒ ኪትዳይሳዳ ካታማ ኡባን ዎሳ ኬꬃ ጭማታ ዶራና መላሳ። 6 ጭም ቦረቶናይሳ፥ እስ ማቸ አዝና፥ ማራ ꬋዮን ዎይኮ ኪተተꬃ እፆን አስ ቦሮና አማንያ ናይት ደእያ አስ ግዳናዉ በሴስ። 1 ፅሞ 3:2-7. 7 ዎሳ ኬꬃ ጭም ፆሳ ኦሱዋ ሀዳራ ኤክዳ ግሾ፥ ቦረቶናይሳ፥ ኦቶርቶናይሳ፥ ኤለ ይሎቶናይሳ፥ ማꬆቶናይሳ፥ ኦዳ መꬎናይሳነ በሶና ጎአስ ዳፈቶናይሳ ግዳናዉ በሴስ። 8 ሽን እማ ሞከይሳ፥ ሎኦባ ኡባ ዶሰይሳ፥ አኬካንቾ፥ ፅሎ፥ ጌሽነ ባና ሃረይሳ ግዳናዉ በሴስ። 9 ሀራታ ሱረ ትምርትያን ምንꬃናዉነ ሄ ትምርትያ እፀይሳታ ዛራናዉ ባ ታማርዳ ቱማ ቃላን ምንድ ኤቃናዉ በሴስ።

10 ኪተቶናይሳት፥ ፓꬆና ኦዳ ኦደተይሳት፥ ጭመይሳት ኡባካ ቃፃረተꬃ ዎጋ ናግያ ዳሮ አሳት ደኦሶና። 11 ኤንቲ በሶና ኦገን ሚሸ ደማናዉ ኮይድ፥ ታማርሳናዉ በሶናባ ታማርስሸ ኬꬃ አሳ ኡባ ኢስያ ግሾ ኤንታ ትምርትያ ተቃናዉ በሴስ። 12 ኤንታ ናበታፐ እሶይ፥ “ቃርፄሳ አሳይ ኡባ ዎደ ዎርዶ ኦደቶሶና፤ ኢታ ዶአታነ አዛላ ያራምባታ”*ቃርፄሳ አሳይ ኡባ ዎደ ዎርዶ ኦደቶሶና፤ ኢታ ዶአታነ አዛላ ያራምባታ፦ ሄሳ ያግድ ኦድዳ ናበይ ኤጵመንዴሳ ጌተቴስ። ያግስ። 13 ሀ ማርካተꬃይ ቱማ ማርካተꬅ። ሄሳ ግሾ፥ ኤንታዉ ቱማ አማኖይ ዳና መላ ኤንታ ሀንቀታ። 14 ቱማ እፅያ አሳ ትምርትያነ አይሁደታ ፓꬆና ቶስያ ስኦና መላ ኤንታ ሴራ። 15 ባንታዉ ጌሽ ግድዳይሳታስ ኡባይ ጌሽ፥ ሽን ቱናታስነ አማኖናይሳታስ ኤንታ ቆፋይነ ካሀይ ቱንዳ ግሾ፥ ኤንታዉ አይብካ ጌሽ ግደና። 16 ኤንቲ ኑ ፆሳ ኤሮስ ጎሶና፥ ሽን ባንታ ኦሱዋን እያ ካዶሶና። ኤንቲ ፆሳን እፀትዳይሳታ፥ ኪተቶናይሳታነ ሎኦ ኦሶ ኡባስ ግዶናይሳታ።