1 ሽን ኔኒ ሱረ ትምርትያ ጳልቆና ትምርተ ታማርሳናዉ በሴስ። 2 ጭማ አደት ባንታና ሃረይሳታ፥ ዎፑ ግዳይሳታ፥ ቦንቸትዳይሳታ፥ አማኖን፥ ሲቆንነ ዳንዳአን፥ ምኖ ግዳና መላ ዞራ። 3 ሄሳዳካ፥ ጭማ ማጫሳይ ባንታ ዱሳን ጌሻታ፥ ዝግሮናይሳታ፥ ዎይነ ኡሻን ሃረቶናይሳታነ ሎኦባ ታማርሰይሳታ ግዳና መላ ታማርሳ። 4 ኤንቲ ሄሳዳ ሀንኮ ያላጋ ማጫሳይ ባንታ አዝናታነ ባንታ ናይታ ሲቃና መላ ታማርሳናዉ ዳንዳኦሶና። 5 ፆሳ ቃላይ ቦረቶና መላ ባንታና ሃረይሳታ፥ ጌሻታ፥ ባንታ ሶን ኦይሳታ፥ ኬሀታነ ባንታ አዝናታስ ኪተተይሳታ ግዳና መላ ያላጋ ማጫሳ ታማርሶና።

6 ሄሳዳካ፥ ዶንꬓ አደት ባንታና ሃራና መላ ዞራ። 7 ኔኒ ነ ሁጰን ሎኦ ኦሶ ኡባን ኤንታዉ ሌምሶ ግዳ። ኔኒ ነ ትምርትያን ኤቅዳይሳነ አማነትዳይሳ ግዳ። 8 ኑ ሞርከት ኑና ዝግራናዉ ጋሶያባይ ኤንታዉ ꬋይን ኤንቲ ዬላታና መላ ኔኒ ቦረቶና ሎኦ ኦዳ ኦዴታ።

9 አይለት ኡባባን ባንታ ጎዳታስ ኪተታና መላ ኤንታ ኡፋይሳና መላነ ኤንታራ ፓላሞና መላ ዞራ። 10 ኤንቲ ባንታ ጎዳታፐ ካይሶቶፖ። ሄስካ፥ ኑና አሽያ ፆሳ ትምርተይ፥ ኡባ ኦገን ዶሰትዳይሳ ግዳና መላ ባንታ ኦꬅያ ኦሱዋን አማነተይሳታ ግደይሳ በሳና መላ ኤንታ ዞራ።

11 አሰ አሽያ ፆሳ አꬎ ኬሀተꬃይ አሳ ኡባስ ቆንጭስ። 12 ሄ አꬎ ኬሀተꬃይ፥ ኑ ናጋራነ ሀ አላምያ አሙዋ አግድ፥ ሀ ዎድያን ኑና ሃርድ፥ ቱማ አያና ደኡዋንነ ፅሎተꬃን ዳና መላ ኑና ታማርሴስ። 13 ኑኒ አንጀትዳ ኡፋይሳ ግድዳ ግታ ፆሳነ ኑና አሽያ የሱስ ክርስቶሳ ቦንቾ ቆንጨꬃ ናጎስ። 14 ኢታ ኦሶ ኡባፈ ኑና ዎዛናዉነ ሎኦባ ኦꬃናዉ አሞትያ ባ ጌሻ አስ ከሳናዉ ኑ ግሾ ባና አꬅድ እሚስ። ማዝ 130:8፤ ከሳ 19:5፤ ዛረ 4:20፤ 7:6፤ 14:2፤ 1 ጰፅ 2:9.

15 ኔኒ ሀይሳ ታማርሳ፤ ኩመꬃ ማታን ዞራ፥ ሴራ፤ ኦንካ ነና ካꬎፖ።