1 አሳይ ደርያ ሃረይሳታስ፥ አዋተꬃይ ደኤይሳታስ ሃረታናዉ፥ ኪተታናዉነ ሎኦ ኦሶ ኡባ ኦꬃናዉ ጊገትዳይሳታ ግዳና መላ አኬክሳ። 2 ቃስ ኤንቲ ኦደ ቦላካ ኢታ ኦደቶና መላ፥ ሳሮ አስ ግዳና መላ፥ አሽከታነ አሳ ኡባስ ቃተይሳታ ግዳና መላ ዞራ። 3 ኑኒ ካሰ ኤያታ፥ ኪተቶናይሳታ፥ ባለትዳይሳታ፥ ዱማ ዱማ አሾ ኡፋይሳስነ አሞስ አይለትዳይሳታ። ኑኒ ኢታተꬃንነ ቃናተን ኩምዳይሳታ፤ ኑ አሰ እፀይሳታ፥ አስካ ኑና እፀይሳታ። 4 ሽን አሽያ ፆሳ ኬሀተꬃይነ ሲቆይ ቆንጭዳ ዎደ፥ 5 ኑ ኦꬅዳ ፅሎ ኦሱዋ ግሾ ግዶናሽን፥ ባ ማሮተꬃ ግሾ ኑና አሽስ። ኑና እ አሽዳይ፥ ናምአንꬆ የለተꬃ ሜቻንነ ጌሻ አያና ባጋራ እምዳ ኦራꬃ ደኡዋና። 6 ሄ አያና፥ ፆሳይ ኑና አሽያ የሱስ ክርስቶሳ ባጋራ ኑ ቦላ ዳርስድ ጉስስ። 7 ባ አꬎ ኬሀተꬃ ባጋራ ኑና ፅልስድ መርና ደኡዋ ላታ ኡፋይሳ ኦይካና መላ ሄሳ ኦꬅስ። 8 ሀ ቃላይ አማነትዳ ቃላ። ፆሳ አማነይሳት ሎኦ ኦሶ ኦꬃናዉ ጊግዳይሳታ ግዳና መላ ነ ሀ ቃላ ምንꬃዳ ኦዳና መላ ታ ኮያይስ። ሀይሳቲ አሰ ኡባስ ሎኦነ ጎኤይሳታ። 9 ሽን ኤያተꬃ ፓላማፐ፥ ኮቻ ታይቦፐ፥ ካቻፈነ ህገ ጋሶን ደንድያ ኦሻፈ ናገታ። ሄስ ጎእነ ዎይ ባይናባ። 10 ሻሄተꬅ መꬍያ ኡራ ኮይሮ ዞራ፤ ናምአንꬆ ሀንቀታ፥ ሄሳፈ ጉየ፥ እያፐ ሃካ። 11 ሄሳ መላ አስ ጌላነ ናጋራንቾ፤ እ ባ ቦላ ፕርደይሳ ኤራ።

12 ታኒ ባልጎ ያን ሻጫናዉ ቆፕዳ ግሾ፥ አርፀማሳ ዎይኮ ትክቆሳ ኔኮ ኪትያ ዎደ ነ ታኮ ንቆጵልዮና ያናዉ ምና። ሀዋ 20:4፤ ኤፈ 6:21-22፤ ቆላ 4:7-8፤ 2 ፅሞ 4:12. 13 ህገ ኤርያ ዜማስነ አጵሎስ ኦገ ብያ ዎደ ኤንታዉ ኮሽያባይ ፓጮና መላ ኤንታ ማዳ። 14 ኑ አሳይካ ፓꬆና አስ ግድድ አቶና መላ ባንታዉ ኮሽያባ ደማና መላ ሎኦ ኦሶ ኦꬃናዉ ምንድ ታማሮ።

15 ታራ ደእያ ኡባይ ነና ሳሮ ጎሶና፤ አማኖን ኑና ሲቅያ አሳ ሳሮ ጋ።

ፆሳ አꬎ ኬሀተꬃይ ህንተ ኡባራ ግዶ። አምንእ።