4
ጰፅሮስነ ዮሃንስ ሻንጎ ስንꬃን
1 ጰፅሮስነ ዮሃንስ አሳስ ኦድሽን ካህነ ሀላቃት፥ ፆሳ ኬ ናገይሳታ ሀላቃይነ ሳዱቃወት ኤንታኮ ይዶሶና። 2 ኤንቲ የሱሲ ሀይቆፐ ደንዶይሳነ እያ ጋሶን ሀይቆፐ ደንዶይ ደኤይሳ አሳ ታማርስዳ ግሾ ይሎትዶሶና። 3 ሄሳ ግሾ፥ ኤንታ ኦይክድ ሳእ ኦማርስዳ ግሾ ዎንታና ጋካናዉ ቃሾ ኬꬅ ገልስዶሶና። 4 ሽን ቃላ ስእዳይሳታፐ ዳሮት አማንዶሶና። አማንዳ አደ አሳ ታይቦይ እቻሹ ሙኩሉኮ ብስ።
5 ዎንተꬃ ጋላስ ደርያ ሃረይሳት፥ ጭማትነ፥ ህገ አስታማረት የሩሳላመን ሺቅዶሶና። 6 ሄ አሳ ግዶን ካህነ ሀላቃይ ሃን፥ ቃያፍ፥ ዮሃንስ፥ እስክንድረይነ ካህነ ሀላቃ ሶ አሳት ኡባይ ደኦሶና። 7 ሀዋረታ ባንታ ስንꬃን ኤስድ፥ “አይብ ዎልቃን ዎይኮ ኦደ ሱንꬃን ሀይሳ ህንተ ኦꬅደቲ?” ያግድ ኦይችዶሶና።
8 ሄ ዎደ ጰፅሮስ ጌሻ አያናን ኩምድ፥ “ደርያ ሃረይሳቶ፥ ጭማቶ፥ 9 ሀች ሀ ዎበ አድያስ ኦሰትዳ ሎኦ ኦሱዋስነ እ ዋንድ ፓፅዳኮ ህንተ ኑና ኦይችኮ፥ 10 ማስቃልያ ቦላ ህንተ ካቅን፥ ፆሳይ ሀይቆፐ ደንꬅዳ ናዝረተ የሱስ ክርስቶሳ ሱንꬃን ሀ አደይ ፓፅድ ህንተ ስንꬃን ኤቅዳይስ ህንተዉነ እስራኤለ አሳ ኡባስ ኤረቶ።
11 “ ‘ግምበይሳት ቦርድ እፅዳ ሹቻይ፥
ጎዳ ፃጱዋ ምንꬅያ፥
ኡባፈ አꬍያ ሹቹ ግድስ።
ሄ ሹቻይ የሱሳ።’ማዝ 118:22.
12 ሄሳ ግሾ፥ አቶተꬅ እያ ባጋራፐ አትሽን፥ ሀራ ኦደ ባጋራካ ባዋ። ኑኒ እያ ሱንꬃን አታና መላ አሳ ኡባስ ፆሳይ ሳሎፐ ጋርሳን እምዳ ሀራ ሱንꬅ ባዋ” ያግስ።
13 ሺቅዳ አሳይ ጰፅሮስነ ዮሃንስ ምንዳ ምኖተꬃ በእዳ ዎደ ኤንቲ ታማርቦና ጮ አስ ግድዳይሳ አኬክድ፥ ማላለትዶሶና፤ ኤንቲ የሱሳራ ደኤይሳ ኤርዶሶና። 14 ቃስ ፓፅዳ አደይ ጰፅሮሳራነ ዮሃንሳራ ኤቅዳይሳ አሳይ በእድ ግያባ ꬋይዶሶና። 15 ሽን ጰፅሮሳነ ዮሃንሳ ካረ ከያና መላ ኦꬅድ ባንታ ግዶን፥ 16 “ሀ አሳታ ኑ አይ ኦꬅኖ? ኤንታ ኩሸን ኦሰትዳ ግታ ማላታይ የሩሳላመን ደእያ ኡባስ በንቴስ። ኑኒ ሄሳ ኤሮኮ ጋናዉ ዳንዳኦኮ። 17 ሽን ሀ ኦዳይ አሳ ግዶን ላለቶና መላ ህዛፐ ጉየ፥ ሀ አሳት የሱሳ ሱንꬃን ኦደስካ ኦዶና መላ ምንꬅድ ናግሳና” ያግድ ዞረትዶሶና።
18 ኤንታ ፄግድ፥ የሱሳ ሱንꬃን ህዛፐ ኦዶና መላ ዎይኮ ታማርሶና መላ ኪትዶሶና። 19 ሽን ጰፅሮስነ ዮሃንስ ኤንታኮ ዛሪድ፥ “ፆሳስ ኪተታናይሳፈነ ህንተዉ ኪተታናይሳፈ ፆሳ ስንꬃን አዉስ ሎኦኮ? አነ ህንተ ፕርድተ። 20 ኑኒ በእዳባነ ስእዳባ ኦዶና አጋናዉ ዳንዳኦኮ” ያግዶሶና።
21 ቢታ ጭማትነ ደርያ ሃረይሳት ካሰፐ ምንꬅ ናግስድ ኤንታ የድ አግዶሶና። አሳይ ሀንዳባስ ፆሳ ጋላትያ ግሾ ኤንታ ሴራናዉ ዳንዳእቦኮና። 22 ሄ ማላታን ሀርገፈ ፓፅዳ አድያስ ላይꬅ ኦይታማፐ አꬍስ።
አማንያ አሳ ዎሳ
23 ጰፅሮስነ ዮሃንስ ብርሸትድ ባንታ ዳቦታኮ ብድ፥ ካህነ ሀላቃትነ ጭማት ባንታኮ ግዳባ ኡባ ኤንታዉ ኦድዶሶና። 24 ኤንቲ ሄሳ ስእዳ ዎደ እስ ዎዛናን ግድድ ፆሳ ሀይሳዳ ያግድ ዎስዶሶና፦ “ኡባ ሃርያ ጎዳዉ፥ ሳሉዋ፥ ሳኣ፥ አባነ ኤንታ ግዶን ደእያ ኡባባ መꬍዳይሶ፥ከሳ 20:11፤ ናህ 9:6፤ ማዝ 146:6. 25 ኔኒ ነ አይልያ፥ ኑ አዋ ዳዊታ ዶናን ጌሻ አያናን፥
“ ‘ደረይ አይስ ይሎትዶና?
አሳይ አይስ ጮ ማቀትዶና?ማዝ 2:1-2.
26 ሳኣ ካዎትነ
ደርያ ሃረይሳት እስፈ ጎዳ ቦላነ
ክርስቶሳ ቦላ ደንድዶሶና’ ያጋዳሳ።
27 “ቱማካ፥ ሄሮዲስነ ጰንፀ ጵላፆስ አይሁደ ግዶና አሳራነ እስራኤለ አሳራ ነ ዶርዳ ነ ጌሻ ናኣ የሱሳ ቦላ ደንዳናዉ ሀ ካታማን ሺቅዶሶና። ማቶ 27:1-2፤ ማር 15:1፤ ሉቃ 23:1፥ 7-11፤ ዮሀ 18:28-29. 28 ቃስ ኔኒ ነ ዎልቃንነ ነ ሸንያን ኦꬃና ጋዳ ቆፓ ኡትዳባ ኡባ ፖልዶሶና። 29 ሀእካ ጎዳዉ፥ ኤንታ ማንደꬃ በአ፤ ኑኒ ነ አይለት ነ ቃላ ኩመꬃ ዎዛናን ኦዳና መላ ኑና ዳንዳእሳ። 30 ነ ጌሻ ናኣ የሱሳ ሱንꬃን ሀርጋንቾታ ፓꬃናዉ፥ ኦራꬃባይነ ማላታት ኦሰታና መላ ነ ኩሽያ ምጫ” ግድ ዎስዶሶና።
31 ኤንቲ ፆሳ ዎስዳፐ ጉየ፥ ሄ ኤንቲ ሺቅዳ በሳይ ቃፅስ። ኤንታ ኡባን ጌሻ አያን ኩምን ፆሳ ቃላ ምኖተꬃን ኦድዶሶና።
ኮይሮ አማንዳ አሳ እስፈተꬃ
32 አማነይሳት ኡባይ ቆፋንነ ዎዛናን እስኖ ግድዶሶና። ኤንቲ ባንታዉ ደእያባ ታባ ጎናሽን እስፈ ሻከቶሶና። ሀዋ 2:44-45. 33 ሀዋረት፥ ጎዳ የሱሲ ሀይቆፐ ደንድዳይሳ ግታ ዎልቃን ማርካቶሶና። ፆሳይ ኤንታ ኡባስ አꬎ ኬሀተꬃ ዳርስድ እሚስ። 34 ቢት ዎይኮ ኬꬅ ደኤይሳት ኡባይ ባይዝ ኤክዳ ሚሽያ ኤህያ ግሾ፥ አማነይሳታ ግዶን መቶታንቾይ እሶይካ ባዋ። 35 ሚሸ ኤህድ ሀዋረታስ እሞሶና፤ ሄ ሚሽያ አሳስ ኮሽዳይሳዳ እሱዋስ እሱዋስ ሻክ ሻክ እሜስ።
36 ቆጵሮሳ ጌተትያ በሳን የለትዳ ዮሰፋ ጌተትያ ሌወ ሼሻፐ ግድዳ እሶይ ደኤስ። እያ ሱንꬃ ሀዋረት ባርናባሳ (ምንꬆ ናአ) ግዶሶና። 37 ባርናባስ ባዉ ደእያ ቢታ ባይዝድ ሚሽያ ኤህድ ሀዋረታስ እሚስ።